عندما تتحدث الفراعنة

اتكلم ..هى مجموعة قصصية ..اتمنى ان تعجبكم


2- عندما تتحدث الفراعنة





بينما كنت فى الجيزة اشاهد الاهرامات .. فجأة لقيت مصباح علاء الدين .. دعكت المصباح طلع منه عفريت لابس فرعونى


قالى ..حاما تاما تاحاتون ... انا طبعا استنتجت ان هو بيقول تطلب اى .. قولتله انا عاوز ابو الهول يتكلم بس بالعربى وكمان مصرى


قالى ..تان ماح تون ...وفجأة سمعت صوت غريب


#اى ده يا عم انت رجعنى زى ما كنت رجعنى ساكت ..اى ده انا مش عارف اقفل بقى مش عارف اسكت


قال له العفريت الفرعونى وهو يشاور عليا .. تاحا تام تاحنوت


# يا كابتن قوله يخلينى اسكت


$ وأنت عاوز تسكت ليه


# اصلى ... أصلى كلامى مش هيعجبهم


$ مش لازم كلامك يعجب كل الناس


# اصل هما لو كلامى معجبهمش مش هيسبونى فى حالى


$ ليه هو انت هتقول اى


# هقول اى !! هقول التاريخ طبعاً


$ يا راجل ..


# اى ده هو انت متعرفش ان انا شاهد على التاريخ ولا أى .


$ بجد !


# اى طبعا أومال انت فكرك اى


$ بس اللى بيقبى شاهد على التاريخ بيتكلم ويقول الحقيقة .


# حقيقة واحدة دا أنا عندى حقايق ....تعرف انا هقولك على واحدة منهم بس خلى بالك لان الحقيقة دى ممكن تغير حجات كتير اوى انت متتخيلهاش


$ واو ... قول بسرعة


# الحقيقة دى بقى هى ...اى ده... انتو مين ؟ ...هى الناس دى واخدانى على فين ..انا مقولتش حاجة ..يا كابتن قولهم ان انا برئ انا مقولتش حاجة .. يا خفرع قولهم ان انا تابعك ..يا جماعة حد يتصل بإخناتون ....يا كابتن اطلب من العفريت انه يخلينى اسكت ..انا مش عارف اسكت..مش عارف



.

ممكن بقى تفوق شوية

ممكن بقى تفوق شوية

ممكن تفوق للقضية

ممكن تبطل رقص راب

ممكن تطفى الاغنية

ركز معايا ولو دقايق

ركز هقولك علـ الحقايق

ركز كدة وخليك فايق

ارضك خدوها من بين ايديك

ارضك خدوها قدام عنيك

ارضك..يعنى عرضك

يعنى وطنك

يعنى معنى الرجولة فيك

ارضك خدوها وانت ساكت

مقطوع لسانك ولا الرجولة ماتت

حرك شعورك رجع بلادك

وشيل سلاح وبندقية

ممكن بقى تفوق شوية

مرجان احمد مرجان

لو عاوز تركب المترو ممكن تنزل محطة مبارك ولو عاوز تقرا كتاب ممكن تروح مكتبة مبارك أما بقى لو عاوز تلعب رياضة عندك ستاد مبارك بالسويس واستاد مبارك لمتحدى الاعاقة ببنى سويف

وعندك كمان أكاديمية مبارك للامن ومعهد مبارك للاورام بالزقازيق

تعرف ان اسم مبارك مرتبط بأكثر من 2600 مدرسة و 400 مستشفى ومركز صحي و 52 مشروع إسكان و300 قرية و90 مركزًا بحثيًا و 180 مشروعًا زراعيًا، و600 قاعة كبرى للاجتماعات بالمؤسسات الحكومية و62 شارعًا ومحطة باصات

انا والليل

بيقولوا ما ينمش غير مرتاح البال زمان كانت الناس بتنام وتشخر دلوقتى الناس ولا عارفة تشخرولا عارفة تنام الكل ما بقاش يجيله نوم زى الاول يعنى مثلاً عندك محمود محسن جارنا طول الليل بيبقى صاحى بيفكر في عياله هيأكلهم منين ويعلمهم منين ويجيبلهم كسوة منين ويجهز بناته منين وكل حاجة بقت غالية وهو يدوب مرتبه على قد الاكل والايجار وبس . اما بقى على شوقى صاحبى اللى ساكن فى اخر الشارع من ساعة ما ربى دقنه وهو بقى يخاف ينام اصله خايف يحسن امن الدولة تطب عليه مرة واحدة ولما سألته لما انت بتخاف كده طب ربتها ليه قالى نفسى اعمل حاجة اعرف بيها العالم اننا مسلمين . اما بقى جابر شرف او زى ما بيقولولوا ( جابر باشا ) ده بقه بيخاف ينام اصله بيحلم بكاوابيس بيحلم ان الناس اللى ظالمهم بينتقموا منه ومبيقدرش يدافع عن نفسه . اما البيت اللى على اليمين ده ساكن فيه واحد عنده 80سنة ده بقى بيخاف ينام يحسن يموت وهو نايم اصله كون فلوس كتير اوى لكن معندوش عمل صالح يدافع عنه لما يموت . اما البيت اللى هناك ده بقى ساكن فيه ابو فضل او زى ما بيقولولوا ( المعلم ابو فضل ) ده بقى ما بيعرفش ينام من ابنه فضل الصغير طول الليل فضل بيصرخ العلاج مش جايب معاه نتيجة وبعدين ازاى هيجيب نتيجة وهو اصلا بفلوس حرام ..فلوس حشيش.
كل دول بالليل بشوف بيوتهم منورة وبتخيل عيونهم الحمرة نفسها تنام لكن مش عارفة او خايفة .

Differences

ليس كل منا حظه كالاخر يمكن ان نكون متساوين فى اشياء كثيرة ولكن سوف تجد اننا نختلف فى شئ . فدائما يوجد شئ يجعلك تختلف عنى ويوجد شئ يجعلنى اختلف عنك ولو لم نكن مختلفين لكنت اصبحت انا هو انت ....فلا تنتظر منى ان يكون حظى مثل حظك وتفكيرى مثل تفكيرك واحب ما تحب واكره ما تكره ..... لا تنتظر منى ان اكون انا هو انت .