حروف اسمى

ارسم حروف اسمى بلون الطيف

انطق حروف اسمى بشكل لطيف

ولو كان الاسم اصبح من الهم تقيل وحزين

غمض عنيك وانطق .. هيصبح خفيف

.

دخل حروف اسمى فى "جملة فرح" وكونها

واكتب حروف اسمى و"بالنحو" شكلها

وبلاش تزايد .. وتقول شئ مهوش منى

كفاية عليا الدنيا وعمايلها

.

ازرع حروف اسمى مع" جزور الصبار" وارويها

فهمنى من تانى اى معانيها واى معنى الحياة فيها

وبلاش تزايد .. ده فــ قلبى من الجرح نار

امسك كفى وطفيها

.

امسح سواد الذنب من على الحرف العنيد

انا نفسى كفى يصبح ابيض من جديد

وبلاش تزايد .. بكفاية جرحى

بكفاية إنى عايش وحيد

.

لو قولت اسمى إشبكه فى طرف الامل

وادعيلى .. يمكن حروفى النقصة تكتمل

صحيح ضى القمر مهوش منى ولكن

انا نفسى اخبى فى قلبى ضى القمر

.

ولو فى يوم

لمحت فى اسمى الغرور

كل حروف اسمى إمنعها

ولكن عرفت منين انه غرور

هو انت تعرف اى حالى واى ظروفى وأوجعها

اكتب اسمى فى صفحة زكرياتك

بس امانة بلاش الصفحة تقطعها

..........................................

الهروب من الشوارع المظلمة

مع ان تصميمى بشر

لكن السؤال .. انا قلبى ليه اصبح حجر

وبرغم علمى للحقيقة

بمشى فـ شوارع مظلمة

ورغم إختلاف الازمنة

لسه الظلام "بحر اسود" من غير قمر

ولسه شوارعه متعوجة ..

ولكن زينها الشيطان للبصر

ومعى انى بملك نعمة بصر

لكن السؤال .. انا قلبى ليه اصبح كفيف

ومعى انى عارف انه مجرد سؤال خفيف

لكن الاجابة موجعة

وبرغم علمى للإجابة

انا لسه بسأل

يمكن بفكرى لنور الحق اوصل

..

عارفة يا نفسى

انا نفسى اهرب من الكسوف

كل لما اقول خلاص هتوب

مفيش خلاص

من تانى برجع لنفس الذنوب

كل لما افكر انا أى هقول

لما يحاسبنى ربى ولما اقرب من الرسول (ص)

يملانى الخوف

دانا نفسى اهرب من الكسوف

مع انى قلبى اصبح كفيف

لكنى من نور السما لمحت طيف

..

عارفة يا نفسى

انا نفسى على نفسى انتصر

من غير سبب

انا نفسى اسجد

انا نفسى ابكى زى المطر

يمكن ايمانى يكتمل

لكن السؤال .. ليه الدموع مش عاوزة تنزل

وبرغم علمى للإجابة

انا لسه بسأل

يمكن بفكرى لنور الحق اوصل