عاوز تقول اى

اتكلم ..هى مجموعة قصصية ..اتمنى ان تعجبكم

1-برنامج عاوز تقول اى

اهلا بيكم فى برنامجكم المفضل ..عاوز تقول اى

معاكوا على الهوا ولمدة ساعة ..استاذ ممدوح بتاع الاذاعة

ازيكم عاملين اى ..زى ما اتعودنا كل مرة ..اتصلوا وقولنا اى اللى انتوا نفسكوا تقولوا

وافتكروا قبل ما تتكلموا ان الحياة جميلة ومصر بخير والدنيا حلوة

وناخد احلى تلفون من احلى ناس ونقول

@الو

#الو

@ايوة

#سامعنى يا استاذ ممدوح

@ايوة سامعك..والناس عاوزة تسمعك ..اتكلم احكى ..عاوز تقول اى

#يا استاذ ممدوح ..انا اسمى وحيد ساكن فى امبابة ..تحديداً تحديداً يعنى فى شارع سميرة العايمة

تحديدا يعنى فى بيت رقم 7 الدور التالت من غير الارضى ورقم تلفونى 0128762.

@بس .. هو اى ده دا انت ناقص تبعتلنا صورتك

#يا استاذ ممدوح مش انت اللى قولت قول اللى انت عايزه

@ايوة انا قولت كدة ..بس مقولتش عرفنا بنفسك وبالتفصيل

#يا استاذ ممدوح ماهو انا كنت عاوز اتكلم عن نفسى اللى محبوسة جوايا اللى محدش بيحب يسمع عنها حاجة يا استاذ ممدوح ..انا..انا..انا نفسى اتكلم عنى ..نفسى الناس تعرفنى ومبقاش وحيد.

@يااااااا..اى ده ...انا بصراحة مش عارف ده حزن ولا كئابة

وبعدين اى يا عم 012 دى يا ابنى الناس كلها دلوقتى غيرت اتصالات ..اتقدموا بقى

شكرا يا وحيد على اتصالك ...ودلوقتى بعد ما وحيد عكنن علينا . انا كمان هعكنن عليكوا أكتر ونسمع مع بعض أغنية حمادة هلال(ديما دموع) برعاية اتصالات 19 قرش للدقيقة لاى شبكة فى مصر

........

ورجعنا تانى ومعاكوا على الهوا ولمدة ساعة استاذ ممدوح بتاع الاذاعة ..

بصراحة فى ناس كتير بتتصل ..لكن واحد بس هو اللى هيتكلم

ناخد مين..ناخد مين يا ممدوح يا بتاع الاذاعة ..اممممممممممم ..انتى ..ايوة انتى اتفضلى

# انـا

@ايوة بقالى ساعة بقولك انتى

#ازيك يا استاذ ممدوح انا سارة

@كويس الحمد لله .اهلا يا سارة يا ترى يا سارة عاوزة تقولى اى

# انا عاوزة أقوله يسامحنى .

@ هو ده بس اللى انتى عاوزة تقوليه

# ايوة ..ونفسى كلامى يوصله

@ طب هو انتى عاوزه يسامحك على اى

# انا عاوزاه يسامحنى علشان انا بحب ماكدونالدز وبحبه هو كمان فى نفس الوقت

@ طب هو أكيد سامعنا دلوقتى وانا بقوله يا ريت تسامحها وعلى فكرة هى انسانة كويسة علشان اعترفت بالحقيقة ومش اى حد دلوقتى بيقول الحقيقة ..اللى بيقول الحقيقة فى الزمن ده هو بس الانسان المغفل ...وعشان هى مغفلة لازم كلنا نسامحها

واسيبكوا دلوقتى مع اغنية ايهاب توفيق (تترجى فيا تبكى عليا ممش ممكن يوم اقدر اسامح) برعاية ماكدونالدز انا احبه براب با با ...

..............

ورجعنا تانى ومعاكوا على الهوا ولمدة ساعة استاذ ممدوح بتاع الاذاعة

جوه كل واحد منا كلام ..عاوز يقوله ..عايز الناس تسمعه ..قولنا انت عاوز تقول اى

ناخد اتصال ونقول الو.

...

@الو

...

...

معلش الاتصال اتقطع باين عليه مكنش رايق

من فضلك اشرب شاى ليبتون وحاول الاتصال فى وقت لاحق وياريت لو تسمع اغنية قول الو برعاية ليبتون

معانا اتصال تانى ونقول الو

# الو..ازيك يا استاذ ممدوحاتى

@ممدوحاتى

#ههههههـ..ما هو انا بحب ادلعك

@طيب اتفضل عاوز تقول اى يا استاذ متلفناتى

# ههههههـ حلوة متلفناتى دى يا استاذ ممدوحاتى

هى يعنى اى متلفناتى دى ..اوعى تكون شتيمة

@ لا يا سيدى دى مش شتيمة ..ده بما ان انت متلفن عليا وفى عملية تلفنة بنا فنتيجة التلفنة دى انا سميتك متلفناتى

#يا سيدى متلفناتى متلفناتى انا ما بيهمنيش حاجة

وعشان انا ما بيهمنيش حاجة ومبخفش من حاجة انا عاوز اقول للعيال بتاعت القاهرة اللى فاكرة نفسها ان هى رقم واحد فى مصر لا ..والف لأ هما مش رقم واحد ..وعاوز اقولهم ان العيال بتاعت اسكندرية هى رقم واحد فى مصر من ايام ما اليونان كانوا عاملنها عاصمة

وبما انه شغل عيال بعيال فأنا بقولهم مش عاوزين غلط لأن انتوا مسيركوا هتيجوا هتيجوا علشان تصيفوا عندنا فى اسكندرية ..وشكرا يا استاذ ممدوحاتى

@ العفو يااا عيل

بالذمة ده اسمه كلام ..اى الفرق بين النادى بتاع نادى عيال القاهرة ونادى عيال اسكندرية ..الاتنين واحد .

ليه بقى نقول ان ده رقم واحد وده رقم اتنين ....ما انا عاوز افهم

لو الوضع استمر اكتر من كدة ممكن تحصل حرب اهلية

ومش بعيد شواطئ اسكندرية تغرق شوارع القاهرة

ومش بعيد برضوا فيضان النيل يغرق مكتبة الاسكندرية
...ليه نوصلها لكدة

ارجو من مجلس الشعب ونادى 6 أكتوبر ومدرسة بلال الابتدائى لغات ..ان هما يهتموا بالمسألة دى وشكــراً

وبما ان دخل فيها مجلس الشعب نسمع شرين ومشربتش من نيلها برعاية شركة (الوطنى)لإلحاق العماله المصريه للعمل في الخارج

........

ورجعنا تانى علشان احنا حلال والحلال بيرجع ..شكرا على الوقت الجميل اللى قضناه مع بعض وبشكر كل اللى اتصل بيا وانا اسف انى مقولتش الرسايل اللى جاتلى على الاميل علشان وقت البرنامج خلص لكنى هقولها بكرة الساعة تلاتة مساءاً فى الاعادة ..وتصبحوا على خير احلام سعيدة واسيبكوا مع محمد منير واغنية قبل ما تحلم فوق برعاية برنامجكم المفضل عاوز تقول اى

اشياء ابحث عنها

ابحث عن اشياء كثيرة ..فى بعض الاحيان ابحث عن عصا موسى عليه السلام ..حتى اشق ذلك البحر واهرب من هذا المكان

.واحياناً ابحث عن بساط سليمان عليه السلام ..لينقلنى الى مكان اخر غير هذا المكان ..وعندما يضيق بى الحال واتعب من البحث

ابحث عن نخلة مريم رضى الله تعالى عنها .. حتى اّكل من تمرها واظتظل بظلها .

وعندما لا أجد ما ابحث عنه ..أنادى رب موسى وسليمان ومريم عليهم السلام..أذكره فى نفسى ..

فيطمئن قلبى فأعلم انه يذكرنى ..الم يقل ..أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي

هل يوجد شئ أعظم من هذا ..لا أريد العصا ولا البساط ولا النخلة ..وانما اريد منه ان يذكرنى فى نفسه.

لا أعلم فى الدين الكثير فعلمى قليل ولكنى أعلم انه ربى..أحسن خلقى..وهو خالق كل شئ {وَلَئِن سَأَلْتَهُم مَّنْ خَلَقَ السَّمَاوَاتِ وَالْأَرْضَ لَيَقُولُنَّ اللَّهُ قُلِ الْحَمْدُ لِلَّهِ بَلْ أَكْثَرُهُمْ لَا يَعْلَمُونَ} ‏[‏لقمان‏:‏25‏]

..

مشهد حب

جلست...إبتسمت ..قالت لم أعشق مثلك

من انت ؟ من تكون ؟

فلقد احترت فى وصفك ..

تعجبت لها ...

تبسمت لها ...

وكدت ان اصدق

لولا ان قام المخرج

وقال أعد المشهد

كلام قبل النوم

الرابعة إلا خمس دقائق صباجاً...هكذا هو الوقت الان..عينى تطالبنى بالنوم
اما جسدى يعلن استسلامه ..وبعد اتمام عملية اقفال الكمبيوتر بسلام
لم اجد مكان يؤينى الا (السرير)...
(السرير)..وانت على السرير لن يمكنك ان تجد تعليقات الاخرين على مدونتك
وانت على السرير..لن يمكنك ان تقرأ كتاب الكترونى .. لا يمكنك ان تكتب
موضوع فى المدونة او احد المنتديات ....
إلا إذا كنت تملك اللاب توب
ولهذا قبل ذهابى الى السرير اخذت معى قلم وكشكول ...والتلفون علشان احوله الى منبه
....سافرت وحملت معى منطقى ومسمعى
لم اجد موضوع محدد اتحدث عنه لان كل ما بداخلى الان ..انما هى اشياء متقاطعة
............
الديب فريز فكرة خادعة
يوجد من يستخدم الديب فريز من اجل الحفاظ على النسخة من الاطفال
او من فيرس او من امر الاوتورن..فى جميع الاحوال فإن الديب فريز يحمى الجهاز
ولكن يوجد من يستخدمه ليمسح ذلك الذنب ..يمكنك ان تشغل الديب فريز وتدخل الى
اى موقع إباحى ..وعندها سوف تصيبك الفيروسات ...
ولكن عند إغلاق الجهاز وتشغيله مرة اخرى ..كل شىء يرجع الى طبيعته
وكأن شىء لم يكن ....فقد تمكن الديب فريز من مسح تلك الفيروسات
ولكنه لن يتمكن من مسح الذنوب
الم اقل لك انها فكرة خادعة
...............
...............تومى اند جيرى
ذلك الفأر الذى اسمه جيرى بينما وهو جالس امام شاشة الاب توب
بيشيت على شات رمزاوى بتاع رمزى بن عم دوله..يجد تلك الفتاة التى تدخل الشات بأسم
مادونا لابسة فلة ..تواعده بأن يتقابلوا بعد ساعة امام سيما بكار بشارع الشهيد ميكى ماوس
فى وجه السرعة ذهب الفأر جيرى الى المكان المحدد ولكنه يجد تلك الفتاة انما هى القط تومى
لم يحزن جيرى لان تومى قد امسك به..ولكنه حزن لانه حتى الان لم يجد فتاة احلامه
فتاة احلامه التى هى عبارة عن بنت بتحبه جميلة اهلها مش طالبين شقة غالية وشبكة غالية ..
تومى..بعد ان صعب عليه الفأرجيرى تركه وقال له ..يا جيرى ما تحزنش العلم دلوقتى اتقدم
وبكره الصين تقدر تعملك عروسة احلامك
.................
.................
حتى هذه الايام تخدعك ..احيانا يكون الجو بارد واحيانا حار
واحيانا تنقط بعض المطر ----
الكل فى هذه الايام يريد ان يخدعك انه هو الافضل من غيره ....
...............
...............
ايها القمر ...هل هم يروك كما اراك ...هل سكان امريكا وفرنسا والمانيا واسبانيا
يروك كما اراك ..؟
ام ان الحكومة المصرية قد غيرت بعض ملامحك وبهتت عليك لونها الرمادى الغامق
ايها القمر يا من تسكن فوق ..الحكومة المصرية مكانها مش هنا ...مكانها فوق ...فوق .......
فـــــــوق ....
.................................

حكاية كتبتها الايام

بسم الله الرحمن الرحيم

....................

..دى افتتاحية لمدونة اعز اصحاب http://a3zso7ab.blogspot.com/
ابيات من الشعر العامى للشاعر المصرى اسامه السيد باسم ( حكاية كتبتها الايام)

عايز اكتبها عايز ارويها
عايز اقولها عايز احكيها
عايز انشرها ولاخر الدنيا اوديها
................
عايزاكتب قصه باحلى العبارات
مش موجوده فى الروايات
قصه اصلها.. بنت وواد
قصه بدايتها زيارات
قصه من اولها تقول دى خرافات
كره عميق وكوبية الشاى مش على البراد
سبحان مغير الاحوال وشافى الامراض
حاكم بيقولوا الحب ده مرض.. بس مالهوش علاج
ولاحتى فى الاجزاخانات
واول ما بدا الكلام سالها وسالته شوية سؤالات
طبعا بحذر.. والاجابه من غير استعباط
..............
ولما طلب منها تليفونها
حس انها مغامره.. مش هينلها
اصله كان فاكر انه غريب
بس الرد كان عجيب
قالتله عادى و ايه المشكله وهو انت حد غريب
.............
وبعدها خدوا التليفونات
واضوها رنات على بعض فى المناسبات
لحد ماجه النت وبدا الكلام على الشات
بدا الكلام يجر كلام
لحد. ما اصبح ادمان
.............
وكل واحد ابتدا يحس بالتانى
بس مش قادريطلع اللى فى قلبه من معانى
............
وبدوا يحسوا ببعض بشده
بس الخوف ليحصل صدمه
لواحد فيهم وتبقى القصه مجرد ذكرى
.............
حاكم صاحبنا كان خواف
اقوله اعترف بمشاعرك يقولى بخاف
.............
وفى يوم من الايام جات رحلة القناطر الخيريه
قلها ما تيجى معايا دا الرحله هتبقى ميه ميه
قالتله ماقدرش ارفضلك طلب.. دانت فى غلاوة قلبى وعنيا
............
وساعتها صاحبنا حب يجس نبضها
بس هى رفضت تبوحله باللى فى قلبها
اصلها كانت خايفه من رد فعلها
.............
وبعدها جريت الايام وراء الايام
لحد ما جه الفرح فى ماعدوه بالتمام
وساعتها حبت تزنقوه فى الكلام
وتساله عن مشاعره. وكان السؤال باهتمام
قالتله ايه حال قلبك مشغول ولا مانع الا تصال
رد صاحبنا واتعمد الكلام
قالها قلب ايه. دا فاصل شحن من زمان
انا لو مكانها كنت ضربته تلت تلام
بس الحمد لله.. خلص فرحنا
وانتهى على خير وروحنا
...........
وبعدها رجع الكلام من تانى
يتقال فى ماعدوه بالدقايق والثوانى
بس المرادى حبت تحط النقط على الحروف
وتشكله بلون معروف
وساعتها سالته بصوت ملهوف
انت بتحب ولا عندك عزوف
رد صاحبنا.. وساعتها وشه جاب الوان من الكسوف
قالها بالله عليك اعملى فيا معروف
مش لازم السؤال ده دلوقتى حاكم انا مكسوف
قالته وايه سبب الكسوف
............
قالها مانتى اللى بحبها وقلبى دايب بحبها
وساعتها سهمت سكتة هيست ما تعرفش ايه اللى حصلها
صاحبنا فضل مستنى ردها
وساعتها صاحبنا خاف عليها راح قام كتبلها
وبسرعة الاميل بعتلها
...........
قالها انا اسف متزعليش
اصل كنت فاكر ان دمى خفيف
راحت رد ت عليه وقالته.. هوانت كنت بتهزر يا ظريف
قالها لا لا لا ما تخفيش
انا بحبك اوى وكفايه كده وما تكسفنيش
قالها ممكن اعرف جوابك بصراحه وماتخبيش
قالته عيشها وعيش عيشها وعيش
حب حقيقى وكره مافيش
بقولهالك بصراحه ومبخبيش
بحبك اوى ما تسبنيش

........&&&&&.........

دى كانت ابيات من الشعر العامى تاليف : اسامه السيد ( ابو كريم ) صحبى

( حكاية كتبتها الايام) كان فيه موضوع كنت كتبته اسمه اروينى حب لــ علاء واتش والقصيدة دى مرتبطة بالموضوع

اروينى حب http://kashkol100.blogspot.com/2009/03/blog-post_01.html

دى كانت افتتاحية لمدونة اعز اصحاب http://a3zso7ab.blogspot.com/ ...دى مدونة جديدة انا عاملها ليا ولاصحابى وانا هكتب فيها شعر ان شاء الله