مـعـتـز الـصـيـنـى 私は私が逃す愛するتانى مرة

مـعـتـز الـصـيـنـى تانى مرة 私は私が逃す愛する :

بعد الرعد والبرق والمطرة كان لازم البس الجاكت اللى اشترته الشتا اللى فات ..هو جاكت صينى بس شكله حلو بجد ..واول ما اشتريته جات فى بالى قصة معتز الصينى ونشرتها على المدونة اللى كانت لسه جديدة طازة ..النهاردة وانا بنظر الى الجاكت افتكرت معتز الصينى وعشان كدة قررت اعيد مـعـتـز الـصـيـنـى 私は私が逃す愛する: هتعجبكوا ان شاء الله

المشهد الاول

######## لقاء الحبايب

معتز ينتظر نيرفانا عند محطة كوبرى القبة
نيرفانا تتقدم من معتز وتحمل ابتسامة
نيرفانا .. عامل اى يا حبيبى
معتز..الحمد لله
نيرفانا تنظر الى جاكت معتز
نيرفانا .. أش أش اى الحجات الحلوة دى
معتز.. اى رئيك
نيرفانا .. حلو الجاكت ده
معتز.. جيبتوا امبارح
نيرفانا .. بس حلو أوي ..شكله غالى
معتز.. تديلوه كام
نيرفانا ..اممم 250 جنية
معتز .. هاتى 200 جنيه وخديي
نيرفانا .. ههـ .. انت جيبتوا بكام اصلا
معتز .. بـ 150 جنيه
نيرفانا .. بس بجد حلو
معتز .. هو رخيص بس علشان صينى
نيرفانا .. اممم
نيرفانا .. نسيتنى صح .. فى اى ياعم
جايبنى على مالا وشى
معتز .. مفاجأة . . مشكلتنا اتحلت
نيرفانا .. بتكلم جد .. يعنى جبت الشقة
معتز .. لأ . بس جبت الشبكة
نيرفانا .. بجد يا معتز
معتز .. ايوة يا نيرفانا .. والشبكة كتيرة
نيرفانا.. كتيرة .. انت جيبت فلوسها منين يامعتز
معتز.. مش مهم جبت فلوسها منين المهم انها جات
نيرفانا .. معتز اوعى تكونــ..
معتز.. اكون اى بس .. ماتبقيش عبيطة انا مش بتاع الكلام ده
نيرفانا.. يعنى الشبكة دى فلوسها حلال
معتز .. ايوة ياستى فلوسها حلال
نيرفانا .. عارف يا معتز ممكن بعد ما تشبكنى
نبيع الشبكة ونكمل عليها ونجيب الشقة .. منى بنت خلتى عملت كدة
معتز .. ابيع الشبكة ...مش انا اللى ااقلعك الشبكة علشان ابيعها يا ماما
نيرفانا .. طول عمرك راجل يا معتز
معتز.. انا جي بكرة انا ومصطفى ابن خالتى الساعة 7 علشان
أورى الشبكة لأبوكى وامك
نيرفانا .. انت ومصطفى .. طب وأمك
معتز .. امي تعبانة شوية
نيرفانا .. الف سلامة عليها .. طب وأختك
معتز .. اختى قعدة معاها .. مينفعش تسيبها لوحدها
نيرفانا .. خلاص ماشى يا معتز
********
المشهد التانى

#######
في بيت نيرفانا
كيمو .. ايي . اسمع منى وركزلى
وكل واحد يجهزلى عل ترمادول
انا هتكلم ورييت محدش يغمزلى
نيرفانا ..انت يا زفت ياكيمو وطى الكمبيوتر
ده شوية معتز زمانه جى
ام نيرفانا .. ماتسيبى الواد يفرح يابت
دانا النهاردة هنشوف الشبكة
نيرفانا.. ياماما طب يشغل اغانى فاررحى
مش يشغلى الترمادول
ابو نيرفانا .. ما هى دى برضوا اغانى
بتاعت افراح .. شغل ياض

اغنية سيجارة بنى
ام نيرفانا.. تفتكري يا بت الواد معتز جاب
فلوس الشبكة منين ..اوعي
يابت يكون سارقهم
نيرفانا.. يا ماما هو معتز برضوا بتاع كدة
ابو نيرفانا..هو ده لو كان بتاع كدة
كان ده بقه حاله
جرس الباب يرن
نيرفانا .. ياكيمو اطفى الزفت ده وافتح الباب ده اكيد معتز
كيمو يفتح الباب يجد معتزشايل علبة شوكلاته
في اليمين وشنطة الشبكة فى الشمال
ومعاه مصطفى بن خالته
ابو نيرفانا .. ادخل ياعريس بنتى نورت البيت
ادخل يا مصطفى يا ابنى
يجلسوا داخل غرفة الصالون
مصطفى ينظر الى معتز ويغمزله برجله
معتز .. عامل اى يا عمى
ابو نيرفانا.. الحمد لله
معتز.. وانتى ياحماتى عاملة اي
ام نيرفانا.. الحمد لله .. انا زعلت على امك لما عرفت انها تعبانة
قولها ان انا جيا ازورها انا ونيرفانا
معتز.. فيكى الخير ياحماتى
ام نيرفانا .. ماتورينا يابنى الشبكة
معتز يفتح علبة الشبكة والجميع ينظر فى زهول
ام نيرفانا تمسك غويشة وتقعد تبص فيها
ام نيرفانا .. ده اى ده يا ابنى
معتز .. دي.. الشبكة
ابو نيرفانا..دى عيار كام دى يا ابنى
معتز .. ده ده عيار
معتز.. ده ياعمى دهب صينى
ام نيرفانا .. صينى .. انا بنتى تشبك بدهب صينى
هي بنات الناس لعبة فى اديك ولا اى
معتز .. ولا لعبة ولا حاجة ياحماتى
ام نيرفانا.. اخرس متجيبش كلمة حماتى دى على لسانك
مصطفى .. ياجماعة وحدوا الله بس مش كدة
ابو نيرفانا .. لا اله الا الله .. انت مش سامع
يامصطفى ابن خالتك بيقول اى
ابن خالتك بيقول صينى بذمتك

يا مصطفى يا ابنى انت ترضاها لاختك
معتز.. ياعمى اي بس المشكلة ماهو ده دهب وده دهب
ام نيرفانا .. اسمع يا ابنى . انا بنتى مش لعبة فى اديك
وياحبيبى اللى معهوش مايلزموش
نيرفانا مازالت مزهولة تريد ان تغير عقارب الساعة
وترجع بالزمن .. ترجع لغاية محطة كوبرى القبة
وتقول لمعتز ..ليه كدة يا معتز .. انا بس كنت عملتلك اى
ولا هى دى غلطتى علشان حبيتك.

************

المشهد الثالث..

######### علــ القهوة

معتز يجلس هو ومصطفى على القهوة

معتز يخرج سيجارة من العلبة LM بتاعت مصطفى

ويولع بالولاعة السخان

مصطفى .. يا ابنى حرام عليك دى تاسع سيجارة بتشربها

وانت اصلا مبتشربش سجاير .. وكمان دى

خامس كباية شاى ..

معتز .. سيبنى وحياة ابوك يامصطفى .. يحسن انا مخنوق

مصطفى ..أنت بتحسسنى ان انت بتشرب خمرة علشان تنسى

معتز.. انسى .. انا مش ممكن انسى الا لما اقتلها

مصطفى .. حرام عليك يا ابنى تقتلها اى بس .. دى البت بنت حلال وبتحبك

معتز.. بنت اى اللى اقتلها .. انا اقصد امها الحيزبون المملة .. نفسى افش غلى فيها

مصطفى .. حيزبون .. ومملة .. وعايز تفش غلك ..انا عندى اللى يحققلك حلمك

مصطفى يخرج التليفون من جيبه وأصابعه تلامس زراير التليفون

معتز .. هو أنت..هـتكلم مين

مصطفى .. تسمع عن اللهو الخفى ..ده بقى اجمد من اللهو الخفى

معتز..ده مجرم ده ولا اى

مصطفى..ههــ ال مجرم ال __ ده بقه ياعم وخدها هيواية

مصطفى .. الو .. ازيك ياباشا .. ليك عندى حتة من اللى قلبك يحبها

..حيزبون ومملة .. ايوة مملة ..طب اكتب العنوان عندك

*******

المشهد الرابع

#######نهاية طاغية

ام نيرفانا قاعدة فى الاوضة بتاعتها

والواد كيمو مشغل اغنية سيجارة بنى بصوت عالى قوى

ام نيرفانا تنظر الى الغوايش اللى لبساها وتقول

ام نيرفانا..ال صينى ال ..ده عبيط ده ولا شكله كدة

.. الحق مش عليه الحق على الهبلة بنتى

.. ال بتحبه ال ...

ام نيرفانا ..بصوت عالى .. ياض ياكيمو وطى الزفت ده

ام نيرفانا.. شربت سيجارة بنى لللا للللااا .. ياعم ولع يا سيدى ولع

وفجأة ام نيرفانا تحس ان حد واقف وراها . تبص تلاقى واد عجل

لابس اصفر فى اصفر وعامل جناحات سودة ..يمسك النضارة وينزلها

على عينه ويقولها .

الواد العجل ..دانا اللى هولع فيكى

طاخ..طرااااااااااااااااااااااااااااخ....بـــ..ـومممم

ام نيرفانا .. اه ........اه..............ه

طــ...........ــ.......ــ..ــراااااااااخ

**********مولدى تتحدى المملل**********

************The End*************

جوايا نور

جوايا نور.. وانا مش إزاز علشان انور

جوايا نور شوفه بقلبك إبحث ودَوّرْ

حس المشاعر وافهم..الصمت لما يطول

اقرا العيون لما ..تبتسم او تزعل

جوايا نور المسه ..علشان يفضل

الارض لو اتشققت أرويها نور مقدرش يطفيه المطر

قلبك لو عطش ..يشوف نورى ويعكسه يصبح قمر

جوايا نور يلا المسه قبل ما يعدى الزمن

اصل الحقيقة ان الحياة ...سكة سفر

مصر ..كرمها الله

سعات بسأل نفسى هو ليه الرسول عليه الصلاة والسلام قال استوصوا بأهل مصر خيرا فإن لهم نسبا وصهرا.....وكمان حس المسلمين على فتح مصر عندما قال اذا فتح الله عليكم مصر فأتخذوا منها جندا كثيفا فأنهم خير جنود الارض ..مع ان سعتها مصر كانت لا تنطق العربية بل وكانت غير مسلمة ..وكانت بالنسبة للعرب دولة قوية ...ورغم كدة الرسول صلى الله عليه وسلم وصى علينا احنا ..يمكن كان عارف ان هيجى يوم ويحصل فينا كدة ..يمكن كان عارف ان هيجى يوم نحب العرب ونقف جمبهم وكأن الرسول عليه الصلاة والسلام وصانا عليهم وهما يعملوا فينا كدة ..يا رسول الله صلى الله عليك وسلم المسلمين والعرب المسلمين خاصة لم يستوصوا بنا خيرا الا ما رحم ربى ...احنا اللى استوصينا بيهم خيرا ..احنا اللى شهدائنا فى فلسطين واحنا اللى حررنا القدس فى عهد صلاح الدين وهزمنا المغول وشهدائنا فى اليمن وكل مكان زكر فيه اسم الله ..احنا خير جنود الارض احنا اللى لينا نسب فى نبى الله ابراهيم ونبى الله محمد عليهم الصلاة والسلام ..يا ترى كنت عارف ان هيتعمل فينا كدة ...انا بحبك وعارف ان هما كمان بيحبوك وربنا يحكم بنا وبنهم بالحق ويكفينى ان ربنا عارف اننا مظلومين ..مش هقدر اسامحهم ومش هقدر اقول غير حسبنا الله ونعم الوكيل فى كل جزائرى اهان مصر والمصريين ..

بحاول اتخيل واحد جزائرى اهان مصر والمصريين وحرق العلم المصرى مع الاسرائيلى وكأن مصر هى اسرائيل التانية بحاول اتخيلوه بعد كل ده وبعد ما يعدى الوقت بيفتح مصحف ويقرأ القرأن ويلاقى أمامه الاية اللى بتقول﴿ادْخُلُوا مِصْرَ إِنْ شَاءَ اللَّهُ آمِنِينَ﴾ (يوسف: من الآية 99)..يا ترى ساعتها هيحس بأى ..الحمد لله ان الله كرم مصر وزكرها فى القرءان والحمد لله ان رسول الله محمد صلى الله عليه وسلم وصى علينا ووصى على اهل مصر حتى قبل ما يبقوا مسلمين فما بالك وهما مسلمين ..الحمد لله

هقول يا رب وادعيلك

هقول يا رب وادعيلك

وهسمى واشرب من نيلك

واحلم بنور الحق

يظهر بقه ويزيح ليلك

هقول يا رب وهخطى

واخد الخطوة.. واعدى

ولو وقعت ..اسندينى

مدى اديكى وضمينى

دانا برضوا ابنك ..ابن حلال

محمد رسولى (ص) والاسلام دينى

وهقول يا رب وادعيلك

وهسمى واشرب من نيلك

ما تقوم يا مصرى

ما تقوم يا مصرى كفاية نوم
دا انت يا دوب فاضلك جون
وتحقق حلم السنين
حلم ضاع معاك وسط الهموم
ما تقوم يا مصرى ويلا فوق
علمك اهو مرفوع لفوق
دعوتك استجابت
ومن السما جتلك لحظة شروق
ما تقوم يا مصرى سمعنى صوتك
واهتف لبلدك بعلو صوتك
ويلا بينا نعدى الخطوة
قبل ما الحلم يفوتك
ما تقوم يا مصرى كفاية نوم
دا انت يا دوب فاضلك جون

اتفاق

(اقرأ)..جميعنا يعلم ان هذه اول كلمة نزلت من القران بل هى اول كلمة فى الرسالة وعلى كل مسلم ان يقرأ القران وجميعنا نتفق على ذلك ..ومن هنا دعونا نذهب الى اتفاق اخر ...
سوف اقرأ لكل من يكتب وسوف اكتب لكل من يقرأ
ان كنت تقرأ للكل فعليك ان تكتب للكل
وان كنت تكتب للكل فعليك ان تقرأ للكل
فالثقافة هى امتزاج من الكل وللكل
ولا تعجبك مدونة صاحبها قد قرأ للكل وعندما كتب كلماته اصبحب المدونة تلمع بلمعان الثقافة ولكن صاحب المدونة اخطأ عندما بدأ يتلاعب بكلمة الالوهية ..وهى كلمة تخص الله الواحد فقط...وبدأ يتلاعب فى مواضيعه بمضمون ...قلة ادب...واستخدم الصور الجريئة او ان شئت قل الصور الاباحية ..اعترف انه مثقف ولكنه غير اخلاقى.
ولا تعجبك ايضاً مدونة صاحبها اخلاقى يحمل البراءة فى قلبه وكلماته تحكمها الاخلاق ولكنه كتب فقط دون ان يقرأ للكل فلم يضئ فى كلماته نور الثقافة ..
نعم نحن نكتب او نقرأ تحت بند الثقافة
لماذا لا نقرأ للأخرين وقد طلب منا ان نطلب العلم ولو فى الصين وان ندعوا الله ونقول ربى زدنى علما ...
على المدرس ان يقرأ كل شئ حتى يعلم كل شئ حتى اذا سأله التلميذ سؤال يمكنه الجواب عليه.
كذلك على المدون ان يقرأ كل شئ حتى يمكنه ان يكتب موضوع عن اى شئ او يكتب تعليق عن اى موضوع دون ان يجامل ولكنه يكتب تحت ببد المعرفة والثقافة .
لنرجع الى البداية والى الرسالة (اقرأ)...لم نتعب كثيراً اذا فكرنا ان نقرأ ثم نكتب ..فالاغلبية العظمى تمتلك التفكير ولكن ليس الجميع يمتلك التفكير الابداعى ..فالتفكير الابداعى يكون هدية مجانية تمنح مع العلم والمعرفة والثقافة ...فهنيئاً لك تلك الهدية .