انا اللَيلْ

انا اللَيلْ
تأمل
فصنع الله كله جمال
ولو كان لَونْ أسمر
ظلام ٌ فى ظلام
تأمل
فعيونى نجومٌ تلمع
ووجهى قمر
وإبتسامَتى هلال
..
انا اللَيلْ
نشرت الهدوء لمن يسهر
وحجبت الضوء عن من ينام
انا اللَيلْ
تأمل
وأغمِضْ عَيْنَيكْ
فلك عندى بعض الاحلام

ما تشغبطيش على الورق

على كفك خطوط منقوشة

تبوصلها وتستعجب

تكلمها ولا تنطق

فى أى طريق راح تمشى

هتتعب ولا هترتاح

هتبكى ولا راح تضحك

................................

دعى جرحى ينزف لعلها تكون النهاية

واسكبى فى الكأس دمعى وأشربى مثل السكاره

وابتسمى ..

هل رأيتى مريض يومًا اتعبته الابتسامة

أم رأيتى مريض يوماً كان مرضه الخيانه

لن تلاقى احد مثلك إلا أمامك فى المرايا

خونى احد غيرى فلقد نهيت الرواية

ولقد سئمتها نهاية

...........................

ابتسم ضاحكا على القدر

أيختارنى من دون البشر

كنت اظن انه ينسانى

او بعد مائة عام سوف يلقانى

وجده أمامه على الطريق ينتظر

قلت .. سأخطوه بخطايا فى طريق غيره

فوجد قدمى تسير نحوه

تمشى اليه فى عجل

فما كان منى إلا ان ابتسم

..................................

ام فلسطينية ....1

طفلى ..هنا يقتلون الاطفال

لانهم يحملون احجار

ويدافعون عن فلسطين الوطن

وعن اقصى سمعنا صوته عند الاذان

أاذهب بك عن ذاك الوطن

ام

اتتركك هنا تكون شهيد

ولك فى الجنة بيت جديد

جنة هى خير من الف وطن

........................2

طفلى ماذا افعل

أنطق ان كنت تعلم

أاذهب والقيك فى اليم

ام أتركك فى ارض غير ذى ماء ولا زرع

ام اذهب واهز النخل

انى اهز النخل ولكن لا ينزل تمر

طفلى ماذا افعل انطق ان كنت تعلم

.....................................

بتسكت .. اشوف الحلم فى عيونها بيلمع

وتكلم .. سعات اسكت عشان اسمع

سعات اتكلم أقاطعها

عشان بتحكى اوجاعها

وانا نفسى اشوف الحلم فى عيونها بيتكلم

بنمشى انا وهى

وعارفين بإن الطريق مسدود

وإن الليل بيلون خطاوينا بإلوان سود

ولا نيأس ونكمل

........................................

قالوا أيها المهاجر من بلد الى بلد

بأى ارض لك زوجة

وبأى ارض لك ولد

وما هى ارض اباك

وما اسم تلك البلد

قلت .. أيها السائلين

ما انا إلا بذاهب من بلد الاسلام

الى بلاد المسلمين

ما أنا بمهاجر ولكن

ما زلت بروحى وكيانى

اعيش داخل وطنى الاسلامى

...................................

مدى اديكى ارويلى حلمى اللى اتولد

ما تشغبطيش على الورق

دا جوه منى حلم اتولد

حلم خايف يتسرق

..............................

ياقمر بحجاب باين منك نور

جاية من الجامعة

شايلة كتاب ويا الكشكول

وعنيا عليكى تسهر .. ماشافت نوم

.............................

بين ضلوعى خنجر لا يقتل ولا يرحم

............................

خدت القرار

واثق من نفسى

ماشى وبخطى بإقدامى

مش خايف اقع او انصدم بحاجز أدامى

انا مش محتاجلك

انا مش محتاج اسند عليك علشان اعدى

انا خدت قرار لو وقعت اقع وحدى

انا مش محتاجلك

طريقى طويل وصعب الاختيار

وعشان ابدأ

كان لازم منى .. اخد قرار

............................

بينى وبينك مسافات

بنا ليل ونجوم وسحاب

مشوار طويل علشان اوصلك

وكل خطوة تكون بحساب

........................

...

....
..
تاعبتونى يا ناس
...
..
...
..
..

هلال صغير

(1)
ولسه عندى امل
إنك فى يوم راح تكتمل
يا هلال
كل عيوبك إن انت بس وسط الظلام
يمكن دى حكمة علشان تبان
أتأملك
......
(2)
يا اللى انت فى السما
من غير جناح عمال تلف
قرب كمان
دانا جوه منى الف سؤال
ونفسى الاقى إجابة من اللى فيها الشفى
قلبى العليل يصبح يخف

قرب كمان
اروينى نور
من اللى مكتوب علـ الورق
فهمنى معنى الكلمة ومعنى الحرف
اروينى نور
من اللى شوفته لما سجدت
فى قلب جامع
هناك دمعت
اروينى نور دا الدمع جف

قرب كمان
نفسى اكتمل
اصبح قمر
نفسى اشقشق من وسط البيوت
يدن أذان
يعلن للفجر صوت
يمحى السكوت
يمحى الظلام
..............

بوتريكة (قصة)

الساعة الثانية ..بعد منتصف الليل .. من ليل القاهرة

يدخل "مصطفى يحيى" الشارع ليتفاجئ بأحدهم ينادى (تعالى .. خد .. خد )
لجنة(مجموعة من الشرطة)
الظابط = بطاقتك .. اسمك اى
# اسمى مصطفى يحيى
الظابط = جى منين
# من الشغل
..يبدأ الظابط بتفتيش مصطفى بطريقة حيوانية ثم يردد شكلك نضيف امشى ..ويرمى البطاقة على الارض
مصطفى# ليه كدة يا كويس
الظابط = "كويس" يصفعه على وجهه وهو يردد .. انا الظابط مجدى غنيم يا *** ركبوه البوكس

****************
فى الصباح .. من صباح القاهرة

عربية تمشى مسرعة ثم تتوقف فجأة يخرج منها رجل ينظر بإستغراب الى الزبالة المرمية فى الشارع
فى خلال دقيقة يتجمع حوله المتواجدين فى المكان وهم يرددون " هو ابو تريكة هو " ...الجميع يسلم على ابو تريكة وهم يرددون " بنحبك اوى يا كابتن " ... احدهم يطلب من ابو تريكة ان يتصور معاه
ابو تريكة = اسف انا بصراحة ماوقفتش هنا علشان اتصور .. ممكن حد يجيب (مقشة)
ابو تريكة يكنس الشارع والجميع يكنسون معه ويلموا الزبالة ...فى خلال دقائق اصبح الشارع قطعة من باريس
***************
عربية تمشى مسرعة تتوقف فجأة امام احد جامعات القاهرة ينزل ابو التريكة من العربية يتصنع انه يتحدث فى التلفون
جميع طلبة الجامعة يلتفون حوله ..يسلمون عليه وهم يرددون عبارات الحب لابو تريكة ...يطلبون ان يتصورا معه
ابو تريكة = معلش يا جماعة مفيش وقت اخد صور مع حد اصلى انا رايح المستشفى اللى قريبة من هنا علشان المستشفى بقالها اسبوع بتطلب حد يتبرع بالدم ...لو حد حابب يجى معايا اكون سعيد
...الجميع يذهبوا الى المستشفى من اجل ان يتبرعوا بالدم
****************
عربية تمشى مسرعة على الطريق ...موتسيكل رجل المرور يلاحقها ويشاور ..اقف
العربية تقف
رجل المرور # العربية دى متبلغ عنها انها مسروقة الصبح
ابو تريكة = بس دى عربتى
رجل المرور يدقق النظر فى وجه ابو تريكة ويدقق فى صوته
رجل المرور # انا اسف اوى انا ازاى مخدش بالى على فكرة يا كابتن انا زملكاوى اصيل بس بحبك اووى وبشجعك وانت مع المنتخب وكان نفسى اقابلك من زمان
ابو تريكة = انا كمان كنت عاوز اقابلك اصل بصراحة لما بعدى من عند كوبرى غمرة كل يوم بتوع الميكروباص بيقفلوا الطريق علشان يحملوا ركاب ..ده غير كمان ان الطريق بيكون واقف علشان مشروع خط المترو الجديد
رجل المرور # هو انت بتعدى من هناك كل يوم
ابو تريكة يومئ برأسه اى نعم
رجل المرور # انا من بكرة هكون هناك كل يوم وهظبطلك الدنيا
***************
عربية تمشى مسرعة تتوقف فجأة امام احد اقسام شرطة القاهرة
يدخل ابو تريكة الى مكتب الظابط مجدى غنيم
ابو تريكة =كان فى ولد لسه متخرج جديد وهو بيشتغل شغلانة عادية على ما يلاقى وظيفة وانت قبضت عليه عليه بدون سبب هو اسمه مصطفى يحيى
الظابط $ انت تعرفه
يومئ ابو تريكة برأسه اى نعم
يحضر مصطفى الى مكتب الظابط
ابو تريكة = ممكن مصطفى يمشى معايا ويروح
الظابط $ طبعا ممكن ده مصطفى ده اخويا الصغير ...بس ناخد صورة مع بعض الاول
.....
خارج القسم
مصطفى @ هو انت بجد يا كابتن تعرفنى
ابو تريكة = طبعا اعرفك يا مصطفى واعرف شباب زيك كتير ... على فكرة يا مصطفى كان نفسى اوصلك بالعربية بس بصراحة طريقى غير طريقك
مصطفى @ مش مهم يا كابتن المهم هوان انت تعرفنى وانى بدأت احبها من تانى
ابو تريكة = تحبها ..هى مين
مصطفى @ مصر .. مصر يا كابتن
*****************
يدخل ابو تريكة شقته يقف امام المراّة ينظر الى نفسه مدة طويلة ثم يقوم بخلع "قناع ابو تريكة " من وجهه
ثم ينظر ذلك الرجل الغريب الى وجهه فى المراّة والى قناع ابو تريكة ثم يغادر المراّة والقناع
****************
انتهت

احبك اكرهك

ان اردت ان تكره مصر كل الكره ... فهذا امر سهل فكل ما عليك فعله هو ان تنزل تشترى "عيش" من اى فرنة

وإن اردت ان تحب مصر كل الحب ..فهذا امر سهل فكل ما عليك فعله هو ان تشاهد منتخب مصر وهو بيلعب فى اى بطولة ..وتردد مصر مصر ..وتدعى لمصر ولمنتخب مصر ولحسن شحاته وابو تريكة ...

.."بوتريكة"..

القوة .. والمراّة

إن اردت ان اخبرك هل انت قوى ام لا .. فقل لى هل لك اعداء؟
إنها العداوة أحدهم لا يحبك لسبب معلوم او مجهول .. ولماذا العداوة .. لأن ليست كل الناس بشر
وهل لك اعداء .. أتفكر .. امازلت تفكر .. من منا ليس له اعداء ..كان لموسى (عليه السلام )عدو وهو فرعون .. وكان لرسول الله (عليه الصلاة والسلام) عدو وهو ابو جهل .. وكان للمسلمين اعداء كثيرون .. اتريد المزيد
إنها القوة تأتى عندما يكون لك اعداء ..وكان هذا سبب من الاسباب التى جعلت المسلمين اكثر قوة
دعنى اوضح .. .. كانت مصر اكثر قوة عندما كانت لها عدو واضح (اسرائيل ) الان ورغم ان مصر اصبحت احدث سلاحا إلا إنها اقل قوة (الا ما رحم ربى ) ولماذا اصبحت اقل قوة .. انه السلام .. ليس لنا اعداء .. لما الحذر كن مسالم
ما معنى مسالم وهل انت مسالم .. كم مرة تعطى العذر للأخرين ..كم مرة تقول اسف .. لو مؤاخذة .. اكسيوزمى ..كم مرة تردد عبارة (المعذرة) فى اليوم الواحد ؟...هل هم على حق وانت على باطل لتعتذر لهم ... ولماذا لا يعتذروا هم لك .. دعنى اجاوب (لانك مسالم) ليس لك اعداء عديم القوة
وما هى القوة ...اهى قوة العضلات .. .. حسنا تمرن على لعب الحديد لمدة عام ثم قم بعركة مع احد الضعفاء .. قد تضربه ...ولكن احذر انه يمكنه ان يهزمك اذا كان يحمل بيده (موس حلاقة ) .. نصيحة ان وجدت هذا الموس فى يده ابتعد (الضربة فى الوش مفهاش معلش)
انت تبتعد حسنا .. لنرجع الى الوراء الى العداوة .. ما نتيجة العداوة (حرب على المستوى العالمى ) (خناقة على المستوى الشخصى)
أ انا قولت خناقة ..ولماذا الخناقة وكيف ومتى .. واين؟ ...الخناقة ببساطة ضارب ومضروب ...اتخانق حتى لو عدوك هيضربك ..مش مهم لانك تانى مرة هتضرب عدوك وتنتصر .. زيك زى الجميع .. احسن ما تكون مسالم .. غلبان .. ضعيف..
أ انا قولت ضعيف .. انه الضعف .. تكره الحياة ..تزعل ..تتمنى الانتحار .. الانتحار ضعف .. الانتحار كفر ..حسنا انها الخناقة مرة اخرى
مازلت احاور نفسى ..خناقة أى عركة تأتى من كلمة معركة .. هل هذه محاورة فى اللغة بدأت اشعر ان هذه (محاورة كراتيليوس في فلسفة اللغة_ أفلاطون) نعم هى محاورة ولكن نفسى ليست كراتيليوس وانا لست افلاطون .. .. ولكن ربما تكون هذه فلسفة الخناقة .. ولماذا الخناقة ..لان احدهم يريد ان يستكبر عليك وانت تقول فى نفسك .. محدش احسن من حد محدش احسن منى ...حسناً بدأت الخناقة .. ولكن لحظة ماذا اريد من هذه المحاورة ؟...ولماذا هذه المحاورة ...وهل هذه محاورة ...
امممممممممم .. اريد ان اكون مراّة كل اللى يبص فيها مايرجعش تانى غلبان مسالم ضعيف ... حسنا سوف انظر الان فى تلك المراّة ..ما هذا انا ارى احدهم كانت بيننا عداوة .. ادقق النظر فى وجه وأتسائل فى اى مكان ابدأ بالضرب فى وجه ..بدأت اشعر بضمة يدى .. ما هذا ..إنها العداوة ...وما هذا الذى فى ضمة يدى ..إنها القوة ...أنظر الى عينى إنها اصبحت تشبه عين الصقر ..انا مستعد لك اخرج من المراّة واجهنى ولكن احذر فأنا معى (موس) ..وربما احضر مطوى ..سافوريا..حتة ستة وتلاتين .. احذر
..
لا تكن لطيفا اكثر من الازم .. هذا اسم كتاب وان اردت نصيحتى لا تكن لطيفا مع الجميع لا تحب الجميع فالذى يحب لا يكره وانت لك اعداء كثيرون على المستوى الشخصى والدولى انظر الى اعدائك تمرن على الكراهية انت تضم يدك بقوة انت تكره .. هنيئاً لك القوة
اقولت هنيئاً .. وهل القوة هدية .. ولماذا القوة ومتى وكيف .. واين ...احذر .. ولماذا الحذر .. من لا يَرحم لا يُرحم ...وارحموا من فى الارض يرحمكم من فى السماء ... واستغفر ربك حتى يجعل لك مخرج من كل ضيق ويزيدك قوة الى قوتك ... .. .. ..
- ما هذا اتتلاعب بى وبالدين .. انا اكرهك ..
=لحظة انا لا اتلاعب.. انت لست لعبة .. وانا لست لاعب .. انا مراّة انظر فيى جيداً..

انا الطبيعة تتحدى الانسان

ارشادات البوست ;;; جميع وثائق هذا البوست غير موثوق بها;;;
........................................................................

...انا الطبيعة تتحدى الانسان....

قيل فيما قال ...ان بين الطبيعة والانسان علاقة طيبة...
ولكنهم اخطئوا عندما ظنوا انهم يكونوا (الانسان)

..
تعريف الطبيعة
.....................
قال العلماء ان الطبيعة هى كل ما يحيط بنا .
وسئلونى يوما وانا تلميذ ;; ما هى الطبيعة ؟ .. فأجبت بثقة ' انا الطبيعة ' .. فضحك الجميع

..
انا الطبيعة بالاثيات
........................
انا الطبيعة .. .. انا موج البحر بيعلى لما اغضب
انا الطبيعة .. .. انا الحمام بيزوم لما احزن
انا الطبيعة .. .. لما افتح عيونى تفتح معاها عيون الشمس
انا الطبيعة .. .. لما اسهر يسهر معايا القمر يونسنى
انا الطبيعة .. .. لما ابتسم الورد يلون بأحلى الوان
انا الهوا لما بتنفس الربيع
انا البحر الاحمر المتوسط
انا النيل مياه قابلة للشرب
..
.....اما عن الانسان.......

الانسان هو نغمة موبايل لهاتف يمكنه تشغيل mb3
الانسان هو دبدوب احمر فى الفلانتين
الانسان هو سمنة روابى تتحدى السمنة البلدى
الانسان هو كورة نفسها تدخل جون .. لكن الحكم مرتشى
الانسان هو شقة اربع حيطان ناقصها غسالة اوتماتيك
الانسان هو فيلم فى السيما مالوش اى لازمة
الانسان هو قبض موظف غلبان
الانسان هو بضاعة صينى بتتلف بسرعة
الانسان هو شئ يضر مياه النيل

..
مازلت اعشق الطبيعة .. .. ومازلت انا الطبيعة اتحدى الانسان

.. .. ..

انا نجمة تايهة فى السما

وكان نفسى اكون معصوم
ولا ذنب يسود إديا اللى فيها بياض
وعلى وشى يبان النور
وفى قلبى إيمان
يكفى بلاد
وكان نفسى ..

........

انا .. انا نجمة وضعت هنا من اجل ان تحارب تلك الشياطين التى تحاول ان تستمع الى السماء .. انا نجمة مهددة بالانطفاء انا نجمة مهددة بالانتهاء ..انا نجمة تايهة فى السما ..علشان فى يوم "سمعت كلام شيطان" .

انا .. انا طائر جميلة الوانه كنت اطير المس بجناحى القمر .. دلوقتى مش قادر اطير وزنى اصبح تقيل .. علشان فى يوم اكلت من زرع قالوا عليه "زرع شيطانى" .

انا .. انا من رأى باب الجنة مفتوح وشوفت نور وشممت رائحة لحم طير انا بشتهيى ..جريت علـ الباب عشان ادخل .. فجأة لقيت "نفسى" بتصرخ فيا تقولى اقف " انت مكانك مش هنا" انت بس جيت هنا عشان شئ ابيض جواك شئ طيب لكن "انت مكانك مش هنا "..انت صفحاتك كلها سواد .. انت عمرك فى يوم ما سمعت كلام نبى "انت مكانك مش هنا" ...انت لو دخلت من هنا مفيش حد من الصالحين راح يبتسملك ولا هتتمدلك إيد نبى .. .. فضلت افكر فى الكلام وقعدت جمب الباب وسندت ضهرى اللى انحنى من كتر الذنوب ... مستنى إيد تتمدلى

تليفون غير صامت

تليفونى كانت رناته مزعجة
شكله جميل
معمول بفن
كل الاسامى اللى عليه متسجلة
لسه فاكرها
وليها قلبى حن
عدى الزمن
ولاحد
رفع سمعته وسئل
ولا حد رن
..

احلام الصباح

اى هو الشئ اللى ممكن يخليك تصحى الصبح بدرى ؟
1= المدرسة
2=الشغل
3= اغير للحمام اكل ومياه
4=اسبوع اقضيه فى اسكندرية حبيبتى والحق الشط وهو فاضى والمياه ساقعة .. وعيش
5=سهران من بليل ومش جايلى نوم
الاجابة الحالية هى رقم 3 ورقم 5

احلام الصباح ..

الصبح .. السابعة صباحا .. افتح البلكونة .فى الشارع عيال رايحة المدارس . طعم الهوا الساقع يطير من عينى النوم .. احط للحمام اكل ومياه وافضل ابص على عشة الحمام وعلى الحمام واسند ضهرى على سور البلكونة وانا بحلم .. بـ احلام الصباح
.. السابعة صباحا .. بيكون الشارع مليان ناس ..صوت الاصحاب ( القدامى والجدد ) وشوش كتير كلها وشوش بريئة كلها وشوش تلاميذ شايلة الشونط على كتافها .. فيه اللى ماشى بيتكلم واللى بيتخيل واللى ساكت واللى بيحلم احلام الصباح .

.. السابعة صباحا .. اتذكرهم جميعهم كانت اسمائهم تبدأ بحرف الميم والهاء والـ نون والـ واو جميعهم كانوا فى الفصل احلى اصحاب .. وسعات اخوات .. وسعات نتخانق نرجع نتصالح .. وفى حصة الالعاب كورة بتجمعنا ونبدأ نتقسم فريق وفريق والصوت بيعلى على كلمة جوون..
السابعة صباحا .. قلب الحياة بيدب .. والمدرسة مغنطيس بتسحب خطوات كل اللى مشيين فى الشوارع

.. السابعة صباحا .. سيبك النهاردة من المدرسة وتعالى نروح الحديقة الدولية يمكن نقابل هناك البنات بتاعت الاسبوع اللى فات .
.. السابعة صباحا ..اتذكرها وهى على راسها حجاب ابيض ولابسة ابيض فى كحلى اشوفها اغمض عينى عشان هى كانت بيضة وكانت بتعكس نور الشمس .. يزغلل عينى وسعات يزغلل قلبى

..السابعة صباحا .. مش عارف ليه النت فاصل .. يمكن علشان النهاردة اجازة والنت انضم للحزب الوطنى وقرر انه يعكنن عليا السهرة الصباحى ..

.. السابعة صباحا ..رغم ان النت فاصل ورغم انى مقتنع ان فى حجات احسن من كدة ممكن تكتب .. الا انى كان ليا مزاج اكتب .. احلام الصباح

.. السابعة صباحا .. يأتى الى خاطرى اغنية ياصباح الخير ياللى معانا ياللى معانا .. وبرنامج صباح الخير يا مصر اللى كنت بشوفه صدفة قبل ما انزل من البيت على المدرسة

.. السابعة صباحا .. ( يااا هو انت لسه صاحى دى الساعة بقت سابعة ) لسه بدرى اعمليلى بس كباية شاى

السابعة صباحا .. كلاكس عربية نقل كبيرة .. بتعدى فى الشارع العمومى

السابعة صباحا .. واحد فى الشارع معاه جردل مياه وعمال بيمسح العربيات المركونة فى الشارع العمومى

السابعة صباحا .. حبيت اقول صباح الخير .. لحجات جوايا

السابعة صباحا ..بالتوقيت الشتوى

السابعة صباحا .. محدش هيفكر انه يرن عليا

.. السابعة صباحا ..ياااا دى بقت (8) تصبحوا على خير

وكان نفسى...1

وكان نفسى اكون معصوم
ولا ذنب يسود إديا اللى فيها بياض
وعلى وشى يبان النور
وفى قلبى إيمان
يكفى بلاد
وكان نفسى ..

اغانى حزينة

دوشة الشغل وتعب الشغل وهم الشغل ممكن الواحد ينساه لو عاش شوية مع الاغانى ..

هى.. معاها تلفون صينى صوته عالى .. كل يوم تفضل تشغله اغانى .. كل الاغانى حزينة وأغلبية الاغانى لمصطفى كامل ..

بدأت احس انى لو قبلت مصطفى كامل ممكن اقتله .. تعبت من الاغانى الحزينة..

هى .. شغلت اغانى حزينة

انا = هو تلفونك ده مبيشغلش إلا اغانى الحزن

هى=تنظر وكأنها اتفاجئت من الخبر .. تسكت وتبتسم

..تعبت نفسيا ..شغلت اغانى على تلفونى بصوت نوكيا المتواضع .... هى من نفسها فصلت الاغانى من تلفونها ..

بدأت بفيروز ثم اصالة حبيبتى ..الدهب والنحاس شعبى ..عمرو دياب يهمك فى اى. صعبان عليا .لو كان يرضيك.ايام وبنعشها.الملاك البرئ .ورجعت من السفر.تعبت انا .ملهاش حل تانى .لو قادر.تقدر تتكلم .مكنتش ناوى اودعك .... محمد منير كان فاضل بس يدوب .خايف .حكايتى مع الزمان .عمر الزمن.. خالد عجاج.على قد حالى. قالتلى خلاص . سميرة سعيد ال جانى بعد يومين

جورج وسوف .اسكت .. كدة كفاية ... عبد الباسط .نفسى ياعلم اصرخ وابكى .. قوليلى اى يا مرايتى قوليلى اى حكايتى ...

اتفاجأ بــ هى واقفة قدامى

هى = ما انت تلفونك برضوا مابيشغلش إلا اغانى حزينة

انا= انظر لها .. اسكت ابتسم

امسك التلفون واقلب فى بقيت الاغانى اجد اغلبيتها اغانى حزينة والاغانى التانية نزلت غلط على كارت الميمورى

اقفل الاغانى .. وادندن مع نفسى .......ماشى وفى حالى انا ماشى وفى حالى واللى جرالى مكان على بالى . عمرو دياب

بلاش تحلم

حكيت للشيخ عن حلم شوفتوا فى منام

لقيت الشيخ بيلتفت يمين وشمال

وقرب منى ..

وقالى بصوت واطى

بلاش تحلم

بلاش احسن

كفاية احلام ..

كفاية كلام . تعبت

وعاوز انام

ومش عاوزفى منامى اشوف احلام

ده اصل الحلم من كتره بقه اوهام

اغمض .. اشوف فى منامى نور

واسمع مصر تندهلى تقولى قوم

وتدينى سيف بيلمع .. سيف مسنون

الاقينى فى فلسطين

بفتح لحمام ابيض .. كان مسجون ونفسه يطير

والاقى ناس بتقرب ..لها روس شياطين

ارفع سيفى .. دانا حالف لاخلى الدم بحور

الاقى شئ بيمنعنى

بيصرخ فيا يفوقنى

افتح عيونى .. الاقى الشيخ

يقولى بلاش تحلم

بلاش احسن

كفاية احلام ..

ده عمر الحلم ما خاف من الزنزانة ولا السجان

لكنى انا خايف عليك تتهان

اقوله يا شيخ سيبنى

دا اصل الحلم من طيبته

خلانى بقيت انسان

وكان نفسى اكون انسان

انت..وطفلة (محاولة كتابة)

طفلة .. تتقدم نحوك تمد يدها .. (انت) تنظر لها نظرة سريعة على ملابسها .. مع ان عينك قد رئتها كلياً الا ان عقلك اصر على ان يمسح ملامح وجهها ..الطفلة تمد يدها (انت) تمد يدك الى جيبك ..تخرج بعض الفضة من العملة..تعطها للطفلة ويدك فوق ويداها تحت
..
طفلة .. هى كما هى بنفس الملابس
(انت) ..لست كأنت ..احدهم قد اعطى لك عقار وانت طفل ..هذا العقار ساعد على ان لا تتوقف قدرات عقلك الا محدودة
تقترب منك الطفلة تنظر لها نظرة سريعة .. يفكر عقلك بقدراته الا محدودة ..يبعث لك احد الرسائل ..انت تبتسم للطفلة .. الطفلة تمد يدها .. انت تمد يدك للطفلة تمسك يداها تمشوا فى خطوات متقاربة ..تنظر لها مرة اخرى تجدها ابتسمت .. تجثو على ركبتك .. اصبح فرق الطول ليس بالكثير .. تمد يدك مرة اخرى تلامس شفايفك ضهر يد الطفلة تترك على يدها قبلة .. عقلك الا محدود يرى نور على وجه الطفلة
..
(انت) ما زلت كما انت .
الطفلة .. مازال النور مخبأ بداخلها

من القلب

اكيد فيه اسف..

صباح الخير ..

افتح عيونى ..

الاقى الشمس على شباكى تستنى

وتندهلى .. صباح الخير

صباح النور يا نور الشمس يوصلنى

بدون ما اسأل ولا اسعى

بدون ما أشقى ينورلى

صباح النور على نورك يقولى فوق يقول اصحى

توكل على ربك وقوم اسعى

صباح النور يفوقنى

. . .

. . .

صباح النور بأجمل لون على جناحك

صباح النور بلون اخضر على فروعك

صباح النور بطول شطك وطول موجك

. . .



صباح النور بأجمل طيبة فى قلوبكوا و مزروعة

دأنا قلبى عاملوه بيبان ومفتوحة

. . .

صباح النور بطعم النيل

ومصر تحب النور

تخاف من الليل

وما تخافى انا معاكى

وأدى إديكى فى إديا

بنمشى انا وانتى

فى وسط الناس

فى نفس الشارع المزحوم

علشان نوصل هناك للنور

. . .

صباح النور على الاقصى اللى يندهلى

يقولى كفاية قربنى

وانا . . . إنسان عادى مش بإيدى شئ

لكن لأ . . مهوش عادى دا أنا ربى أكرمنى

انا جايلك يا ارض التين

هرويكى بطعم النيل

ويا فلسطين

ما تخافى من الضلمة

قلبى معاكى

ومن مكة انا جاى معايا النور

هقول ..ورددى ورايا

ايات فى كتاب تهز بحور

يخاف منها

شيطان جنى

شيطان إنسى

وينور قلبك الصاحى ايات من النور

من مكة انا جاى معايا النور

. . .

وماتخافى انا معاكى

وادى إديكى فى إديا

بنمشى انا وانتى

فى وسط الناس

فى نفس الشارع المزحوم

علشان نوصل هناك للنور

دا أنا قلبى عاملوه بيبان ومفتوحة

وشبابيكوا مكسورة ومجروحة

ومش طالب غير البسمة

ماهيش كميا ولا قصة

دا أصل البسمة صوت مرسوم

بينطق

انا راضى يا رب الكون

ويرضينى ويكفينى بان قلبى الصاحى

يشوف النور

. . .

. . .

صباح النور

دعاء الكروان

اغمض واخاف لأصحى ..
الاقى الدنيا طعمها مر
وناس.. لسه بتشتكى من الهم
وأيام باقية
صعبة ولا بتمر
اغمض ...
يصحينى صوت كروان كلامه جميل
نسى الدنيا
وزكر ربه فى عز الليل
يشتاق قلبى لذكر الله
اردد ورا الكروان ..كإنه إمام فى وقت صلاة
يقول الذكر هو بلغته
وبلغتى اقولها وراه .

.
(الملك لك لك يا صاحب الملك )
..
..

رسالة الى بلوجر 1

من المدون ويل الى السيد بلوجر ..

تحية طيبة وبعد ..نود ان ننبهكم الى انه قد تم كتابة بوست ( انا ..يا فلسطين ) فى مدونة مش هنسكت

وشكرا
دمت بخير

حلم هربت منه الالوان 1..2..3

1
قبل ما يخلص منى الحبر
هكتب إسمك جوه السطر
جوه الصفحة اللى انا هقطعها
.. وهودعها
.. بحلو ومر
قبل ما يخلص منى الحبر
هكتب إسمك جمب الحلم
اللى حلمته
واللى كتبته
قبل ما يخلص منى الصبر
..
2
يا مراكبى لم الشبك
اصل مابقاش عندى صبر ..استنى شوية سمك
من السمك الملوّن
اللى ياما حلمت بإنه يوصل
لكنه غاب من غير سببب
ايوة غاب وطوّل
يا مراكبى لم الشبك
ده ماعدتش يفرق عندى لون السمك
مهما كان ملوّن
..
3
دا مين قالك . بإن سكوتى وصمتى
.. يعنى غياب
وإن كلامى خلص منى
بدون اسباب
وليه ؟ عاوزنى اتكلم عن الاحلام وعن حلمى
وإن الدنيا بكرة راح تفتحلك باب
..انا هسكت
علشان حلمى هرب منى بقه سراب
انا هسكت ..
علشان لو قولتلك احلم
هكون كداب

..

انا مواطن مصرى

علشان انت مصرى انا عاوزك تفكر فى السؤال ده كل يوم اول ما تصحى من النوم ووقت الغروب وقبل ما تنام
السؤال بتسأله خواطر شابه وهى كتبته فى مدونتها
السؤال كما ورد (سؤال والله العظيم برئ ولا يحمل اية مزايدة لاعلى مصر ولا على شعب مصر بالعكس هو من قلب محب لمصر لم الاستمرار في غلق معبر رفح رغم كل هذا الصلف الاسرائيلي? أليس فتح المعبر هو أبلغ رد على التعنت الاسرائيلي ? لم أصبح لتركيا الدور الذي كان يوما لمصر?)

تاج .. الاسرار الستة

المرة الاولى اللى جانى تاج فيها كان من مصعب صلاح ...واعتذرت وقولتله ان لسه بدرى عليا على ما افكر اعمل تاج

المرة دى التاج من مرايتى ..التاج بيقول (تحدث عن ستة أسرار قد لا يكتشفها من يقابلك للمرة الأولى ) ..

اولا شكرا يا مرايتى على التاج ..واسف انى اتأخرت فى الرد عليه

بس انا قعدت افكر فى السؤال ده كتير ...وسألت نفسى هو انا عندى اسرار ..كانت الاجابة لأ..لكن بعد تعمق اكتشفت ان عندى ملاين الاسرار .

عارف الانسان ليه بيسكت كتير ..علشان مخبى جواه كلام ..خايف يتكلم يحسن يقول الكلام من غير ما يقصد ..خايف يحسن يقول السر

فى ناس بتعيش علشان تدور على حل السر وفى ناس بتعيش علشان تخبى السر

هو يعنى اى سر ..؟ السر هو كل شئ بنحاول نخبيه
السيئة لما بنرتكبها بنحاول نخبيها ...الحب بنحاول نخبيه جوانا ...حتى المشاعر وحتى الكلمة ...
اى علاقة السر بالتدوين ...المدونة هى شئ متوصل باسلاك جوانا بنكتب فيها كل شئ جوانا بنكتبه بكل براءة والسر هو شئ مستخبى جوانا
بس السر لو اتقال او انكتب مش هيكون سر
السر اللى جوانا ممكن نقوله لانسان واحد بس ..ممكن نعيش حياتنا كلها ندور على الانسان ده ...ممكن مانلاقوش وفى نفس الوقت بيكون قدامنا لكن هى الدنيا كدة
..عموما اللى هيقابلنى للمرة الاولى
1* مش هيعرف انى البطاقة بتاعتى بقالها اكتر من سبع سنين ولازم تجدد
2*مش هيعرف انى عندى مدونة واسمها كشكول 100 ورقة
3*مش هيعرف انى بحب النجوم اوى وان فى نجمة فى السما بعتبرها نجمتى انا وبس وسعات خيالى بيقولى ان النجمة دى هدية ليا انا وبس ومش هيعرف انى كمان حلمت بالنجمة دى وانى بحب الشتا علشان هى بتبان فى الشتا وبس
4*اللى هيقابلنى للمرة الاولى مش هيعرف انى مش بعرف اسوق ...موقف حصل معايا كذا مرة (معلش ياوليد خد المفاتيح واركن العربية على اى جمب او عدى العربية دى على ما خلص الحجات اللى فى ايدى ) بيكون جوابى مابعرفش اسوق ...ينظر الشخص اليا بإستغراب ويقولى انت بتكلم جد ولا بتهزر ...
اصل الحكاية انى صحبى الانتيم هو اللى معلمهم السواقة وبما انى اكتر واحد مصاحبه المفروض انى اكون اتعلمت السواقة من زمان ..وبعدين انا مش سواق عندهم علشان اركن العربيات
5*اللى هيقابلنى للمرة الاولى مش هيعرف انى انا مش انا ونفسى اكون انا ونفسى الاقى نفسى
6*اللى هيقابلنى للمرة الاولى مش هيكتشف انى بحبكوا كلكوا فى الله وبحب عالم التدوين لان الحب جوايا وكل شئ جوايا بيكون سر ...وكمان مش هيكتشف انى بحب اصالة وفيروز وعمرو دياب وعادل امام وكونان وتمسلية راجل وست ستات واوليفر كان.. بتاع المانيا وكمان مش هيكتشف ان البوست القادم ان شاء الله هيكون اسمه ..حلم هربت منه الالوان 1..2..3 كلمتين شعر صغنتتين كدة على قدى يارب يعجبكوا

تفائل

اتفائل عندما احلم بالنجوم

إنسـان غلبـان ..

ماتمشى ..وعدى

ليه واقف بين الظلمات

وليه عجباك

حجات مرفوضة فى الديانات ..

وليه بتمشى . . يمين مرة

. . . شمال مرة

وترجع تشتكى زمنك

وإن الدنيا دى مُرة

ماتمشى مستقيم ودوق الصبر لو مَرة

علشان توصل .

..

هناك . . باب السما مفتوح

هناك دوا . . لشئ جواك كتير مجروح

وسيبك . . من الدنيا ده توب الدنيا مش توبك

أصلك من جواك طيب . . تحب الخير

ولكن ليه . . تملى بتمشى عكس السير

..أما انت صحيح غلبان..

ولا انت ملاك

ولا انت شيطان ..

وديماً خطوتك تايهة

ولا بتوصل .

..

بتعصى . ورب الكون شيفك

وترضى . كأنه شئ ولا يهمك

....أما انت صحيح قلبك كله سواد

ده أصل الذنب بيموت - قلوب فيها بياض ..

وتندم على ذنبك . . وترجع تحلف يكون مابنكوا فراق

. . وترجع تانى له تشتاق

..أما انت صحيح غلبان ..

ولا انت ملاك

ولا انت شيطان

دا أنا طالب اكون إنسان

ونفسى اوصل .

مابحبش البطاطس ..يوميات راجل فقرى

لسه فاكر كل ليلة ساعة الغدا لما كنت اقول .. يا اما هو كل يوم بطاطس بطاطس انا خلاص بئى فأفأ من كتر اكل البطاطس انا ما بقتش احب البطاطس ..كانت تقولى حد مايحبش النعمة .
اللى فكرنى بالايام دى هو ابنى اللى عنده 8 سنين لما قام من على الاكل وقال هو كل يوم بطاطس بطاطس انا مابحبش البطاطس ..
هو ما يعرفش ان البطاطس ارخص من الفراخ واللحمة والسمك وحجات كتير كنت عاوز افهمه كدة بس اتعصبت عليه وشخط فيه وانا بقوله حد مايحبش النعمة يا ابن الـ*** ده فى اوربا وامريكا ما بيحبوش الا البطاطس
مش عارف ليه الواحد بقى فقير..
لانه افتقر.. ولا لأن كل شئ بيغلى يعنى مثلا زمان كنت بركب اتوبيس الهيئة بربع جنية ولو ركبت منى باص بنص جنيه دلوقتى اتوبيسات الهيئة بتختفى كل يوم والمنى باص غيره لونه وبقه اخضر وبقه لشركات خاصة وبقه بـ جنيه ونص وفين وفين لما بتلقيه .
زمان كان عزيز بنزيما صاحبى بيحلق دقنه بنفسه علشان يوفر اتنين جنيه ونص وكنت بقوله انا عمرى ما اعرف احلق دقنى لازم احلقها عند حلاق اى يعنى اتنين جنيه ونص
دلوقتى تملى بقول ان حلاقة الدقن قدام المرايا ده فن تشكيلى عاوز تحددها حددها عاوز تشيلها انت حر ..وكنت بكتم جوايا انى بكدة بوفر خمسة جنيه .
الحلم ديما كان بيلمع فى عيونى اخدت الشهادة لكن مقدرتش اتوظف اصلى معنديش واسطة وبيقت صنايعى او (ارزقى على باب الله ) اشتغل موسم وأأجز موسم ..ولما كنت بأجز كانت هموم الدنيا كلها بتبقى فى راسى لدرجة انى مبقدرش ارفعها لكن رغم كدة كنت برفعها للسما وانا بقول يا رب واقول لسه فى امل
اصعب شئ انك تمد ايدك لحد وتستلف منه والاصعب انك متقدرش تسد اللى عليك وتهرب من الناس ..وتعيش خايف يحسن وشك يجى فى وش حد مسلفك فلوس .
بيقولوا جاور السعيد تسعد ومن ساعة ما صاحبت عزيز بنزيما وانا ركبنى الفقر ..عزيز بنزيما هو فيلسوف الفقر لما كان يحب يخلع درسه كان يروح جامعة الازهر كلية طب الاسنان ..علشان الطلبة بيخلعولوا ببلاش .
بالمناسبة عزيز بنزيما كان محجوز الاسبوع اللى فات فى مستشفى حكومى علشان يعمل عملية لما روحت ازوره اول يوم طلعلى فلوس من جيبه وقالى ان العيال بتاعت كلية الطب كانوا بيكشفوا عليه ودفعولوا فلوس ...ولما روحت ازوره تانى يوم لقيته مخنوق ونفسه يبكى لما سألته عن السبب عرفت ان طالب من بتوع الطب صوره وهو بيكشف عليه ولما سألته ما منعتوش ليه بص ليا وبص للفلوس وسكت .ايوة سكت مقدرش يتكلم ..لانه محتاج للفلوس
مش عارف ليه كتبت الكلام ده كله يمكن لانى يا ابنى بحبك وعمرى مافكرت اخليك تقف فى طوابير العيش او طوابير الذل علشان تتعود على عزة النفس كان نفسى اقولك ان انا كمان ما بحبش البطاطس ومن شابه اباه فما ظلم ..
بس صدقنى يا ابنى لو كلتها من غير ملح مش هتحس بمرارتها وهيكون طعمها احلى ..انا مش هلومك لانى ما بحبش البطاطس .

..

وبعدهالك..

...

انا صوتى اقوى من الرصاصة ام بَرود

قبل ما تطالب بحقك ..(1)
..

قبل ما تطالب بحقك
البس قميص ضد الرصاص

ودع امك ..وكل احبابك ..ودع اهلك

إتشاهد ..وحضر تبوتك

وشهادة موتك

او شهادة قتلك

قبل ما تطالب بحقك
................................................

دانا صوتى اقوى من الرصاصة ام بَرود..(2)
...
انا ليا حق وهطلبه بعلو صوت
دانا صوتى اعلى منكوا
دانا صوتى اقوى من الرصاصة ام بَرود
وعمر الرصاصة ما خوفتنى
وعمرها ما صنعت سكوت
دانا صوتى أعلى منكوا
وحتى الشهادة حالف لأقولها بعلو صوتى ساعة الموت
دانا صوتى اقوى من الرصاصة ام بَرود
.............................................
ثلاث طرق تؤدى الى الجنة ...(3)

1..تصلى وتصوم
2..تروح فلسطين وتجاهد
3..تمشى فى مظاهرة وتخدلك رصاصة وتبقى كدة (شهيد)

شباك.. بين السما والارض

ديمًا بيكون مكانى علـ الشباك بين السما والارض ..
الشباك اللى بياخد خيالى للسما وسعات يرمينى علـ الارض وسط الواقع بين وشوش الناس اللى بتضحك واللى حزينة .
الشباك سعات بيكون لغة حب ياما سمع كلام عنينا وياما سمع اسرارنا اللى اتقالت بصوت مكتوم وعشان فيه بنا وبينه حنين سكت وكتم السر.
ديما بسأل هما ليه قالوا عليه شباك ..
مع انه مفهوش شبك ومش أداة للصيد ..يمكن علشان قدر يشبك قلوب ببعض ..
اصله كان شاهد على حب وصداقة وجيرة قبل ما يكون فى حاجة اسمها تليفون وموبنيل واتصالات وفودافون كان موجود الشباك علشان الناس تتواصل مع بعض قبل حتى ما يكون فيه انترنت
ممكن بيت ما تلاقيش فيه بلكونه لكن مستحيل انك ما تلاقيش فيه شباك .. اصله لو من غير شباك . . . هيكون سجن
الشباك هو طعم الحرية فى قلب مصر المحروسة واللى كمان ضاعت من الحراس ...

مع انه حجمه اصغر من البلكونة لكن ناس كتير حبت الشباك وناس كتير غنت للشباك ..وقالوا ..ومن الشباك لارميلك حالى ..وناس غنت من حبى فيك يا جارى وقالوا ..وحياة حبك ما شبكنا غير شبكوا وشبكنا ..

الشباك هو لغة التواصل مع الناس ومع كائنات اخرى جميعها أتت من الشباك...

الناس بتفتح الشباك فى عز الحر علشان تدخل نسمة هوا
حتى فى عز المطر بيفتحوا الشباك ..اصل المطر خير ..لعل الخير يجى من الشباك
الشباك صديق البيئة ..ديما بيطرد ثانى اوكسيد الكربون علشان يدخلنا الاكسجين ... علشان خايف علينا وعايزنا نعيش وناكل عيش

هو مين اللى بيتغير احنا ولا الشباك ..

كل ما بنكبر بنشوف المنظر من الشباك بطريقة مختلفة مع ان الالوان هى هى ..
سعات لما تكون فرحان تجرى على الشباك علشان تشوف كام واحد فرحان ولما تكون حزين بتجرى على الشباك علشان تشوف مين بيوسيك فى حزنك
زمان لما كنا نبص من الشباك كنا نشوف القمر ونكلمه ونشكيلوه من الحبيب..نبص للنجوم نلاقيها احلامنها وفـ يوم هنوصلها
دلوقتى بطلنا نبص على الاحلام اصل الاحلام اتغيرت مع انها كانت بعيدة كان نفسى فى يوم امسكها لكنها هربت بعيد وسط النجوم اختفت
..
وانا لسه واقف بين السما والارض ..ابص فى السما على احلامى البعيدة اللى شايفها فى اخر الطريق نجمة بتلمع ..بس بعيدة
وسعات ابص علـ الارض علـ الناس ووشوش الناس اللى عايشة على الارض الطيبة
ولسه بسأل ليه قالوا عليه شباك .. ولسه واقف بين السما والارض

أمايا يا أما

أمايا يا أما حطى إديكى على راسى وأقرى القراّن
وادعيلى يا أما قلبى الصغير الاسى يتملى إيمان
أمايا ليه حاسس بضلمة حاسس بخوف
حاسس انى بغرق فى بحور ظلام مش عارف اشوف

مدى اديكى وضمى راسى فى حضنك ابكى
مدى اديكى دانا جوه منى بيصرخ قلبى
أمايا ليه الناس ليها بدل الوش وشوش
والدنيا ليه ظلام مع ان كل شئ مكشوف
مدى إديكى غمضى عيونى .. علشان بقلبى اشوف
..
أمايا يا أما

صباحو فل

اعترف بنجاح عدد كبير من الاغانى الشعبية ولكن هل هذه الاغانى سوف تنجح مرة اخرى ؟
لقد تعود كاتب الاغنية الشعبية قبل ان يبدأ كتابة الاغنية ان يصتبح (يشرب حشيش) وقد تعود الملحن على هذا حتى المغنى نفسه قبل ان يسجل الاغنية او يظهر على المسرح قد تعود ان يصتبح ...
كل يوم( احد) قبل ان يذهب محسن الى السينما مع الشلة تعود ان يصتبح
حتى هيثم تعود ان يصتبح كل يوم قبل ان يعاكس البنات ...

عندما ذهب مبارك لاجراء عملية له فى المانيا اختفى الحشيش فجأة..
هل الحشيش اختفى حزناً على مبارك ولان الحشيش عنده اصل
ام انه اختفى خوفا من نظيف ..
هل سوف يعود الحشيش مع عودة مبارك ....

قرأت من يومين فى جريدة ( صوباع الحشيش الفستك بـ 150 جنيه ) .. مع العلم فستك تعنى مغشوش .
هل سوف يصتبح الشباب مرة اخرى وتعود لهم حالة النشوى والسعادة
ام سوف يتوبوا بعد ان تتجمع جزيئات مخهم التى لحسها الحشيش ...
تعود صاحب الفرح ان يوجب مع الحبايب بفرشة او اقل حاجة نص فرشة حشيش ...بدون حشيش كيف سوف يكون فى الفرح معزومين ويرقصوا حتى الصباح ....

ايها الحشيش صاحب السعادة الوهمية ذو اللون البنى ان ظهرت ظهر معك الفساد بجميع انواعه وان اختفيت اختفى معك الفساد شيئأ فشيئاً
اختفى ولكن قبل ما تختفى صبحنى الاول

إتجاه حلوان

..

يقولون ان تعرف صديق لالف عام خير من ان تعرف الف صديق كل عام ...تعرفت على اسامة فى السنة الاخيرة فى المعهد وكان اسامة بالنسبة لى هو اول شاعر سلمت عليه يد بيد وهو المدون الوحيد الذى حدثته هاتفيا وقابلته وجه لوجه ..كان اسامة دائما ما يكتب على مدونته الخاصة ويحدثنى على الاميل وهاتفيا ولكن عندما يتوقف كل هذا كان يجب عليا ان اتصل به لأطمئن عليه .
كان دائما اسامة وعلاء يتواجدان معا كان عندما يكلمنى احدهم يعطى الهاتف للاخر ليحدثنى ولذلك بعد ان فشلت محاولاتى فى الاتصال على هاتف اسامة لانه مغلق قررت ان اتصل على هاتف علاء .
تحدثت الى علاء وتبادلنا السلام والتحية والسؤال عن الحال وطلبت منه ان يعطينى اسامة احدثه ان كان بجانبه ففاجئنى علاء بقوله ( اسامة مين يا ابنى انت شارب حاجة ) .
استغربت جدا من كلمة علاء واستغربت اكثر عندما سمعتها من محمد نادى ومحمود سعيد ومن الشاعر الاخر مصطفى سعيد وكأنهم كانوا على اتفاق رجل واحد ولكن السؤال هنا هل اسامة متفق معهم فى هذه اللعبة ؟.
اتصلت بمحمود بهجت لاقابله .. ونحن جالسون فى القهوة لم احدثه بشأن اسامة بينما هو كان يحدثنى فى موضوع ما قطعت حديثه وانا اقول ( ماتجيب دقيقة من معاك يا حودة ) اخذت منه تلفونه وبدأت اقلب فى الاسامي حتى وجدت اسم اسامة ووجدت رقمه وكان غير الذى مسجل على هاتفى ودوست على اتصال .. حسنا الان سوف انهى اللعبة سوف يحدثنى اسامة وسأقول له (عيب عليكوا لما تلعبوا عليا لعبة زى دى انا مش تلميذ يا ابنى )ولكنى لم اقل كلمة واحدة من هذا فقد كان اسامة شخص اخر وهو ايضا كان معنا فى المعهد وهو ايضا لا يتذكر اسامة .. اعطيت الهاتف لمحمود وانا اسئله عن اسامة رفع محمود المبسم من على شفتيه وهو يقول لما انت مش قد الشيشة بتشرب ليه اسامة مين بس الى بتكلم عنه .
الجميع لا يتعرف على اسامة حسنا سوف انهى اللعبة سوف اذهب لهم ومعى الدليل على لعبتهم والدليل هو كتاب مشروع التخرج كان مشروع التخرج عن انشاء ويب سايت عن القدس وكان له كتاب وكان يوجد صفحة فى الكتاب تحتوى على اسماؤنا ..وجدت الكتاب ووجدت الاسامى ولكن لم اجد اسم اسامة معنا ..حتى مدونة اسامة قد اختفت من على الشبكة العنكبوتية وعنوان اميله قد اختفى من على اميلى ورقم هاتفه المسجل على هاتفى قد اختفى ايضا لم يبقى شئ لم يبقى دليل .
يجب ان انهى اللعبة التى تكبر يوم بعد الاخر ..ركبت المترو اتجاه حلوان ذهبت لاقابل علاء سردت له المواقف التى كانت بيننا نحن الثلاثة انا وهو واسامة ولكنه اقسم لى انه لايتذكر شئ من هذا ولا يعلم من يكون اسامة .
اسامة اعلم انك حقيقة وليس خيال لعلك موجود فى مكان اخر من هذا الكوكب الصغير او لعلك فى مهمة انسانية او فى مهمة من اجل انقاذ العالم او لعلك موجود بين صفحات الورق ...
اسامة سوف احدثك كل يوم وانا اكتب اليك الرسائل ... عندما تعود سوف تجد هذه الرسائل ...انتظر ردك على الرسائل .
انتهت

إسمعى

قبل ما تروحى وتسألى

إسمعى ..

انا كل شئ كاتبه هنا

جنونى هنا

وحلمى هنا

وعنوانى ومين انا

و إسمعى ..

الكون ده كله ما يهمنيش

الكون ده على ورقى اشكله بالوان الطيف

ارسم هنا

واشخبط هنا

وعمرى ما خوفت من الكلام

انا خوفت لأصرخ

انا بس خوفت

منى انا

وإسمعى ..

الدنيا لو صيف او شتا ما يهمنيش

انا جوه كشكولى مطر

جواه سحاب

جواه كلام عن البشر

جواه قصص

جواه شعر

جواه غنى

جواه اهات

جواه حنين

جواه انا

مالِــك

يُــعاد مرتين

امبارح يوم الاحد الصبح جى اتنين مهندسين من شركة الغاز علشان يعينوا المواسير اللى ركبت فى الشقق ...المهم كل ما يدخلوا شقة فى البيت يلاقوا الماسورة واطية يقولوا لازم تتغير ويعينى صاحبى اللى ساكن فى الشقة اللى قدامى لسه موضب الشقة ومش داقق فيها مسمار لكن برضوا المواسير عنده لازم تعلى ...معلش بقه ياسكان البيت ....واحب برضوا اقول الحمد لله ..شقتنا هى الوحيدة فى البيت اللى مش هتغير فيها مواسير .....متسألش ليه ومتقولش مشربهم شاى باليسمين ....
هو بس الواحد كان عاوز يفهم حاجة المهندسين دول المفروض كانوا جم عاينوا قبل ما العمال تركب المواسير ...لكن العمال هى اللى عاينت وهى اللى ركبت ...وهى اللى هتركب تانى ...يا سلام عليكى يا بلد الرجل الواحد
انا كنت فاكر ان سياسة الاعادة فى المدرسة وبس وان الحاجة الوحيدة اللى بتتعاد هى الواجب وبس
لكن طلعت الدنيا دى اكبر مدرسة واحنا تلاميذ ...والدرس انتهى لموا الكراريس
تحديث...

احنا فى الاول خالص قالونا مش هينفع يدخلوكوا غاز علشان مزلقان السكة الحديد محاصركم من كل ناحية
راحوا بلطوا الحوارى عندنا ....بلاط تعبان اى كلام ....انا مرة كنت فى خان الخليلى وشوفتهم بيشيلوا البلاط القديم ويركبوا بلاط جديد ....البلاط القديم بتاع خان الخليلى كان احسن من الى بيركب عندنا 100 مرة
المهم بعد ما ركبوا البلاط ....جم يحفروا ويبهدلوا الدنيا ...فى اى يا عم الحج ....هنوصلكوا الغاز

عُملة بطروسية

امبارح كنت بحول رصيد للتلفون واشتريت هاند فرى ..لما اخدت الباقى كان فيه فلوس ورق ..بينى وبين نفسى قولت ياااا هو لسه حد معاه فلوس ورق ...

لما روحت البيت اكتشفت ان الفلوس الورق فيهم نص جنيه مدمر ...قولت رجعنا تانى للعادة القديمة والواحد لازم يبص كويس فى الفلوس قبل ما ياخدها ...ده الفضة ارحم

النهاردة فى الصباح ..وانا راكب الميكروباص طلعت النص جنيه المدمر مع ربع جنيه وناولته للتباع ...لقيته بيمدلى ايده تانى وهو ماسك النص جنيه ...اخدت منه النص جنيه بصيت فيه وانا بقلبه ال يعنى معرفش فيه اى

انا = ماله ده يا نجم ماهو زى الفل اهو

التباع = انا لو عليا يا برنس عادى بص انت عارف الزبون

ناولتله نص جنيه بداله وشلت النص جنيه المدمر فى جيبى وانا بقول فى نفسى.. مش مشكلة كدة كدة هتتصرف وسط الفلوس

دلوقتى جيبى والحمد لله خالى من اى نص جنيه ورق او جنيه ورق ...

عاشت الفضة لنا وعاشت العُملة البطروسية

..

امنية اتحققت والحمد لله

النهاردة ...تحديدا ..عند صلاة العشاء ...كان هناك صوت فى الميكرفون ...كان الصوت عالى يسمعه اناس كثيرة فى الشارع ..كان الصوت يردد (الله اكبر الله اكبر ..اشهد ان لا اله الا الله ..اشهد ان محمداً رسول الله (ص)..حى الصلاة حى الفلاح ..قد قامت الصلاة قد قامت الصلاة ..الله اكبر الله اكبر..لا اله الا الله ) ..كان الصوت ..صوتى

وبعدَهَالك ...,..,..

وبعدَهَالك ...,..,..
لسه عيونك صاحية يا واد
لسه كلام محبوس جواك
خايف تنطق يحسن تصرخ
علشان كدة ديما فى سكات
وبعدَهَالك ...,..,..
حتى النوم مِنك هربان
حتى عيونك خايفة تنام
كل ما تيجى تتكلم تسكت
خايف ولا انت جبان
وبعدَهَالك ...,..,..
ليه مش عاوز حاجة من الدنيا ؟
هى الدنيا دى وحشه يا واد؟
دى الدنيا شوية شربات
مد اديك واشرب منها
ولا الدنيا دى مش عجباك
وبعدَهَالك ...,..,..
نايم ليه يا واد زعلان ؟
اعند اشتم واضرب كمان
عاوز إيدك تبقى سلاح
عاوزك تبقى يا واد بركان
... ممكن ضربة تصيبك فجأة
نشف عضمك رد الضربة
ممكن تألم ممكن توجع
......لكن اسمع
مش هتنام تانى زعلان
ولا هتخاف ولا تبقى جبان
ولا راح تحبس تانى كلامك
والدنيا هتبقى على بالك
وبعدَهَالك ...,..,..
لسه عيونك صاحية يا واد
لسه كلام محبوس جواك
خايف تنطق يحسن تصرخ
علشان كدة ديما فى سكات

يوم الفرح..اصله معداش على مصر

...فى البدء قولنا حسبنا الله ونعم الوكيل ....
صبرا جميل ,, والله المستعان.....
صبرنا ...واستعنا بالله ....دعونا الله من اجل النصر ...ذكرنا الله من اجل النصر ...
نصرنا الله ...ورضينا ....اللهم ارضى عنا .
الكل يفرح كما يشاء ...اليوم يوم الفرح ...اتقوا الله حتى فى الفرح ولا تخرجوا عن حدود الاسلام
الكل يفرح كما يشاء .....دَعَونا الله من اجل النصر ...دَعٌونا الان نسامح ونمد يدنا للسلام ونرفع يدنا وندعى ان يؤلف الله بين قلوبنا ونكون على قلب رجل واحد وندعى الله ان ينصر الاسلام ويعز المؤمنين
الكل يفرح كما يشاء ...اليوم صفحة جديدة ...اكتب فيها ما تشاء بحبك يا مصر ....وبحبك يا وطن بزيتون وكعبة وبيت ....وبحبك يا فلسطين وحلمى ابنى فيكى بيت وبيوت .....بحبكم كلكم
الكل يفرح كما يشاء ....على فكرة يا ولاد احنا جبنا هنا فى البيت صندوق حاجة ساقعة وهنفرق .....اللى عاوز ييجى .... واللى مستغرب ...اصله معداش على مصر .

خلينا كلنا هنا ...علشان اللى هيخرج من الميدان عمره ما هيبان فى الصورة

على قيد الحياة

لسه الامل ما ماتش
لسه الامل فيه روح
لسه الكلام ماخلص
ولسه فيا جروح

..

لسه الامل من بعيد له أبعاد
ولسه كلام كتير عن حكايات
ولسه ايام مخبية حجات
وجرح عايش وحلم مات

..
ولسه برضوا فيه سكات

أولاويات

هو الله احد
هو مع عبده اذا ذكره
ان تقربت منه يتقرب منك
هو حرم الظلم على نفسه
هو اله....ولا يوجد اله الا هو
فى يوم سوف تقف امامه من اجل الحساب
هو ارسل اليك رسل وكتب سماوية ..حتى تعلم من هو
هو ارسل اليك رسل وكتب سماوية ..حتى تتعلم كيف تعيش بالحق
هو يراك وانت لا تراه ...يعلم ما فى نفسك..يسمعك
..ظن به خير..فانه قال انا عند ظن عبدى بى
هو الذى يرزق بدون حساب يعطى من يشاء بغير حساب
اجعله فى اولاوياتك
....................................................

الحمد لله رب العالمين

الف شكر وحمد ليك يا رب العالمين .....الحمد لله الذى استجاب دعائنا

الف شكر وحمد ليك يا رب العالمين

...1

...2

...3

...4
بحبك يا مصر ..وربنا ينصرك ديما

اضغاث نيويورك

....

منذ سنين كان يوجد بداخلى ارتباط بين كلمة الاندلس وكلمة الجنة ومازال...دائما حلمت اننى اذهب الى جنة الله فى الارض الى الاندلس دائما كنت ارى المغرب هى بوابتى الى الاندلس كان لى صديقة من المغرب هى امازيغية كنت دائما احدثها عن هذا الحلم ..كنت كثيرا احب ان اتحدث عن الاندلس ..كنت اريد ان اذهب الى الاندلس فقط لارى الجنة ...كانت الاندلس لى هى جنة الله فى الارض والنيل هو نهر الجنة على الارض وانا كنت امير الاندلس فى الدنيا ومواطن الفردوس فى الاخرة ان شاء الله ...كان هذا شئ بداخلى منذ سنين ومازال.

جاء عليا فترة كنت مشهور فيها بأمير الاندلس "على الشات والمنتديات وبين اصحابى "

امس حلمت بالجنة الجديدة للارض انها ليست الاندلس انها نيويورك حلمت اننى ذهبت الى هناك نعم هذا حلم من احلامى ولكن فى نيويورك لا يوجد جنة رئيت فى حلمى ناطحات السحاب ورئيت اننى املك شقة فى اعالى الناطحات على شاطئ بحر لم ارى شئ اخر فقط كانت نيويورك كلها شبورة رئيت فيها الناطحات والاغنياء وتعرفت على احدهم ولكن لم ارى الجنة .

نيويورك ان كنتى انتى حلمى من اجل المال والتواصل والتعايش مع الغرب فعفوا الجنة هى حلمى الاكبر حتى وان لم اراها فى احلامى فيكفى إنها فى قلبى ..نيويورك لا اريد ان احلم بكى مرة اخرة فى منامى اريد ان احلم بالاندلس"الجنة".....معذرة نيويورك فأنا امير الاندلس

....

يا شعب مصر ويا كل مسلم

يا شعب مصر ويا كل مسلم ...قولوا لا اله الا الله تفلحوا





...

هقول يا رب وادعيلك وهسمى واشرب من نيلك

...