مابحبش البطاطس ..يوميات راجل فقرى

لسه فاكر كل ليلة ساعة الغدا لما كنت اقول .. يا اما هو كل يوم بطاطس بطاطس انا خلاص بئى فأفأ من كتر اكل البطاطس انا ما بقتش احب البطاطس ..كانت تقولى حد مايحبش النعمة .
اللى فكرنى بالايام دى هو ابنى اللى عنده 8 سنين لما قام من على الاكل وقال هو كل يوم بطاطس بطاطس انا مابحبش البطاطس ..
هو ما يعرفش ان البطاطس ارخص من الفراخ واللحمة والسمك وحجات كتير كنت عاوز افهمه كدة بس اتعصبت عليه وشخط فيه وانا بقوله حد مايحبش النعمة يا ابن الـ*** ده فى اوربا وامريكا ما بيحبوش الا البطاطس
مش عارف ليه الواحد بقى فقير..
لانه افتقر.. ولا لأن كل شئ بيغلى يعنى مثلا زمان كنت بركب اتوبيس الهيئة بربع جنية ولو ركبت منى باص بنص جنيه دلوقتى اتوبيسات الهيئة بتختفى كل يوم والمنى باص غيره لونه وبقه اخضر وبقه لشركات خاصة وبقه بـ جنيه ونص وفين وفين لما بتلقيه .
زمان كان عزيز بنزيما صاحبى بيحلق دقنه بنفسه علشان يوفر اتنين جنيه ونص وكنت بقوله انا عمرى ما اعرف احلق دقنى لازم احلقها عند حلاق اى يعنى اتنين جنيه ونص
دلوقتى تملى بقول ان حلاقة الدقن قدام المرايا ده فن تشكيلى عاوز تحددها حددها عاوز تشيلها انت حر ..وكنت بكتم جوايا انى بكدة بوفر خمسة جنيه .
الحلم ديما كان بيلمع فى عيونى اخدت الشهادة لكن مقدرتش اتوظف اصلى معنديش واسطة وبيقت صنايعى او (ارزقى على باب الله ) اشتغل موسم وأأجز موسم ..ولما كنت بأجز كانت هموم الدنيا كلها بتبقى فى راسى لدرجة انى مبقدرش ارفعها لكن رغم كدة كنت برفعها للسما وانا بقول يا رب واقول لسه فى امل
اصعب شئ انك تمد ايدك لحد وتستلف منه والاصعب انك متقدرش تسد اللى عليك وتهرب من الناس ..وتعيش خايف يحسن وشك يجى فى وش حد مسلفك فلوس .
بيقولوا جاور السعيد تسعد ومن ساعة ما صاحبت عزيز بنزيما وانا ركبنى الفقر ..عزيز بنزيما هو فيلسوف الفقر لما كان يحب يخلع درسه كان يروح جامعة الازهر كلية طب الاسنان ..علشان الطلبة بيخلعولوا ببلاش .
بالمناسبة عزيز بنزيما كان محجوز الاسبوع اللى فات فى مستشفى حكومى علشان يعمل عملية لما روحت ازوره اول يوم طلعلى فلوس من جيبه وقالى ان العيال بتاعت كلية الطب كانوا بيكشفوا عليه ودفعولوا فلوس ...ولما روحت ازوره تانى يوم لقيته مخنوق ونفسه يبكى لما سألته عن السبب عرفت ان طالب من بتوع الطب صوره وهو بيكشف عليه ولما سألته ما منعتوش ليه بص ليا وبص للفلوس وسكت .ايوة سكت مقدرش يتكلم ..لانه محتاج للفلوس
مش عارف ليه كتبت الكلام ده كله يمكن لانى يا ابنى بحبك وعمرى مافكرت اخليك تقف فى طوابير العيش او طوابير الذل علشان تتعود على عزة النفس كان نفسى اقولك ان انا كمان ما بحبش البطاطس ومن شابه اباه فما ظلم ..
بس صدقنى يا ابنى لو كلتها من غير ملح مش هتحس بمرارتها وهيكون طعمها احلى ..انا مش هلومك لانى ما بحبش البطاطس .