كلمة بحبك

يرضيك يا ورق الشجر
يبقى الربيع اخضر
وقلبى انا دبلان
يرضيك يا لون السما
ان القمر يكمل
وقلبى لسه هلال
يرضيك يا طعم الشتا
ان المطر ينزل
وقلبى انا عطشان
نفسه يحب يا ناس
نفسه يدوق من الكاس
نفسه يكون انسان
قبل الاوان بأوان
========
...
شكلك جميل يا صُبح
وانت منور فى القلوب
شكلك جميل يا صبح
وانت ملون علـ بيوت
طعمك جميل يا حب
طعمك جميل يا فرح
قلبى اللى كان
زعلان زمان
لما اتراضا
معدش باقى فى قلبى جرح
شكلك جميل يا صبح
===========
...
كإنها كلمة لو قلتها
هتفتح كل الورود
حتى اللى ورقها لسه بيكتمل
وكل الطيور اللى هجرت راح تعود
والهلال راح يكتمل
كإنها كلمة فيها من الامل
بانت حروفها
على وشى اللى إبتسم
كإنها كلمة لو قلتها
من السعادة هملك جناح واقدر اطير
ومن السعادة هيكونلى تاج واصبح امير
كإنها كلمة واه لو قلتها
لكن ضعفت وقتها
كإنها على لسانى متحرمة
مع ان قلبى قالها متلحنة
كلمة بحبك علشان اقولها قدام عيونك
محتاج احارب ميت سنة