بمشى على مهلى

وليه اتمنظر بعربية
مدام معايا رجليا
لا يوم وقفت فى إشارة
ولا بتتسحب رخصة
ولو ماشى عكس السير
ولو ماشى فى مظاهرة
وبهتف...
بإسمك المعشوق
فيشتقلك ..
حمام هاجر عشان مخنوق
..
وليه اتمنظر بعربية
وانا ماليش فى التلكيك
وبمشى على مهلى
عشان إيديها فى إيديا
وهى بتمشى بطئ
من الاخر ...
انا معنديش
وفى الملعب .. ماليش حظ فى التهديف
ماليش حظ فى التوظيف
والشقة إيجار مهش تمليك
..
وبيتنا فـ اخر الشارع بخش يمين
ماليش فى شمال
طريقى يمين
ولو كل اليمين نايمين
..
وليه اتمنظر
انا اصلاً
عامل سنجر
وبغزلك فستان ابيض بخيط من النور
انا قلبى شبابيكو إزاز مكسور
ومـ الاخر انا ماعنديش
غير قلب جرئ
وحلم برئ
واى يمنع .. انا هحلم
ولو حلمى بعيد
مـ انا ليكى علم الوانه من دمى
وبيرفرف.. فى يد شهيد
فيشتقلك .. حمام هاجر عشان مخنوق
...

حصان الاحلام

غمض عنيك 
فتح عنيك 
انت فى دنيا من جديد 
انسى اللى فات
 وانسى الاهات 
واركب حصانك يخطفك يخدك بعيد
يمكن هناك تلقى لجرحك طبيب 
تلقى لقلبك حبيب 
تلقى العمر اللى فات راجع اليك 
 واركب حصانك يخطفك يخدك بعيد

الجراح القديمة

ماعدش باقى مـ الجراح القديمة 
غير حبة وجع
معرفش ليه فى كل ليلة 
قلبى بيتوجع
يمكن عشان مش قادر أئسى 
وانسى اللى حبتهم زمان 
يمكن عشان .. طيب 
طيب ياعم ماتشتكيش 
ما الذنب ذنبك
مانت اللى قدمت الهدايا القديمة كلها 
عبارة عن كلمة (بحبك)
طيب ياعم ما تشتكيش 
لانه قدرك 
كدة هتعيش وكدة هتعيش 
لكن ..
هتعيش بجرح مايتنسيش

وبضرب كف على كف

وبضرب كف على كف 
وانا ماشى فـشوارعك لف
الاقى فقير نام علـ الارض 
فى عز الليل ما رحمه البرد 
ولا اتمد ليده كف

حواديت حقيقية ..

اقول سلامات تقولى عواف 
يا مصر حلوة كاملة الاوصاف 
انا منك
انا ابنك
ولكنى على الاعلام عيوبى كتير 
اللى اتستر منها اكتر من اللى اتشاف ..
..
عيوبنا بقت حواديت بتتقال كتير 
بيحكيها الابراشى وصبايا الخير 
واسرار من تحت الكوبرى 
بيشوفها خليجى وعربى 
والمستخبى ...
مبقاش مستخبى .. وكله اتشاف 
واقول سلامات تقولى عواف 
يا ارض العفة والطيبة 
يا مصر حلوة كاملة الاوصاف 
....
---------
وائل الابراشى... العاشرة مساءً
ريهام سعيد ...صبايا الخير
 طونى خليفة... اسرار من تحت الكوبرى
منى عراقى ...المستخبى 
---------

ياقمر ..

ياقمر.. -----
 .. يا قمر انا عاشق فيكى جمال الروح
بتتبسمى فمن غير قصد بداوى القلب المجروح
بتقربى وتتكلمى ..
فمن غير قصد بتكملى
 الحلم اللى كان ممنوع
يا قمر .. 
انا حلمى هلال بيكى بيكمل
 حلمى بيتجمل وبيكبر
 انا نفسى الحب ما بنا يدوم
 قبلك انا قلبى كان إزاز مكسور
ومعاكى شباب سنه بيصغر
 يا قمر
____________________
يا موجة عدى
.................
يا موجة عدى بدون قلق وبدون صداع
قلب الولد مركب ورق من غير شراع
لما الحب منه اتسرق
قلبه انحرق
على كل زكرى وعلى كل حلم منه ضاع
يا موجة عدى بدون قلق وبدون صداع
______________________
اوعاك ..
------ ..
 اوعاك فى يوم تكون حساس زيادة عن اللزوم
 اصل الحساس دمعته قريبة
 اوعاك تكون شاعر جواك مشاعر
 اصل المشاعر متعبة
 واوعاك فى يوم تصدق حد
 اصل الكلام بقه نصه كدب
 واوعاك يا واد تكون بتحب
 ده الحب كدبة مسكرة
 من بعدها .. كل القلوب شبابيك أزاز متكسرة
 ____________________________
 خلاصة الكلام ..
..............
 خلاصة الكلام بإن اللى كان حبك زمان .. خلاص مبقاش يحبك وإنه كمان .. مش عارف يعيش من بعدك
____________________________

الفكرة

الفكرة طلقة ياللى انت قلمك من رصاص

امانة يا زمن

ياما نفسى يا زمن وكل المنى 
ترجعنى بالعمر عشرين سنة 
نفس الملامح والابتسامة 
وإسمى انا 
عيل صغير لكن جدع 
لكن .. امانة يا زمن 
بدللى قلبى اللى اتوجع 
..
..
..
من كل الاحلام القديمة
 ما اتحققش غير حلم واحد 
وهو... فى يوم وانا صغير 
غلطت... وحلمت اكـبر

الهدايا القديمة

لم يتبقى من الهدايا القديمة سوى كلمة بحبك

إقريلى كفى

انا بيكى مش مأمن
... ولكن
إقريلى كفى وإكدبى
قولى السعادة هتبتدى
والفرح هيكون غنوتى
اقريلى كفى مليان خطوط
قولى هتوصل خطوتى
قولى هتكمل فرحتى
منش مأمن ولكن
إكدبى
قولى...
 الجرح بكرة هيختفى

انا قوس قزح

انا قوس قزح .. لكنه انقسم .. لما اتمنع
انا شئ نفسه يوصل .. لكن قدامه الف سد
وفى النهاية انا شئ بجد ..
.. راضى باللى انقسم
..
ساكت وجوايا غُنا
انا بعشقك ياللى انت ايقونة امل
انا بعشقك وانت هلال صابر ..
.. وحتى لما بتكتمل
..
انا قوس قزح الوانه ظاهرة بتترسم
لكن السواد منه انتقم
وفى النهاية بسكت بجد
برفع راسى للسما واقول يا رب
صابر وجوايا امل
..
ساكت وجوايا غُنا
حتى الـ غُنا لما نطقته منى انا
معجبش حد
..
صابر بجد
فى حاجة فى نفسى ... ونفسى تكتمل
وفى النهاية انا شئ بجد ..
..راضى باللى انقسم

..امـ..نـ..يـ..ـة

ياما نفسى انام واصحى الاقينى فى جنتك من غير حساب

يوم مميز

14/12/1985
عند اذان الفجر ..بداية كتبها الله لى .. اللهم احسن خاتمتى

انا بعشق الشتا

انا بعشق الشتا
ايدك فى جيب الجاكت وماشى بكل نزاهة
بتتنفس هوا ساقع يفوقك
ليك فيه اجمل زكريات
مولود فى نص ديسمبر يبقى لازمن اعشق الشتا
بيكون باب السما مفتوح وقت المطر
انا بعشق الدعاء وقت المطر
انا بعشق المطر
انا بعشق ثورة 25 الحق ظهر فى عز الشتا و رغم الشتا .. الناس مقعدتش فى بيوتها ونزلت علشان الحق
اللهم ارنا الحق حقاً وارزقنا اتباعه وارنا الباطل باطل وارزقنا اجتنابه
اللهم كن بجانب المساكين وقت برد الشتا وفى كل حين
اللهم كن بجانبنا جميعا ولا تحرمنا من هداياك وهداك ورحمتك يا ارحم الراحمين

وهعاند ايوة هعاند

الناس حاسين بالبرد
وفي قلبي ده شم نسيم
لو شمس الدنيا دي غابت
انا شمسي تشق الغيم
وهعاند ايوة هعاند
دايما من غير تسليم
ايس كريم في ديسمبر
ايس كريم في جليم...عمرو دياب ♥♥