RSS Feed

مصر ..كرمها الله


سعات بسأل نفسى هو ليه الرسول عليه الصلاة والسلام قال استوصوا بأهل مصر خيرا فإن لهم نسبا وصهرا.....وكمان حس المسلمين على فتح مصر عندما قال اذا فتح الله عليكم مصر فأتخذوا منها جندا كثيفا فأنهم خير جنود الارض ..مع ان سعتها مصر كانت لا تنطق العربية بل وكانت غير مسلمة ..وكانت بالنسبة للعرب دولة قوية ...ورغم كدة الرسول صلى الله عليه وسلم وصى علينا احنا ..يمكن كان عارف ان هيجى يوم ويحصل فينا كدة ..يمكن كان عارف ان هيجى يوم نحب العرب ونقف جمبهم وكأن الرسول عليه الصلاة والسلام وصانا عليهم وهما يعملوا فينا كدة ..يا رسول الله صلى الله عليك وسلم المسلمين والعرب المسلمين خاصة لم يستوصوا بنا خيرا الا ما رحم ربى ...احنا اللى استوصينا بيهم خيرا ..احنا اللى شهدائنا فى فلسطين واحنا اللى حررنا القدس فى عهد صلاح الدين وهزمنا المغول وشهدائنا فى اليمن وكل مكان زكر فيه اسم الله ..احنا خير جنود الارض احنا اللى لينا نسب فى نبى الله ابراهيم ونبى الله محمد عليهم الصلاة والسلام ..يا ترى كنت عارف ان هيتعمل فينا كدة ...انا بحبك وعارف ان هما كمان بيحبوك وربنا يحكم بنا وبنهم بالحق ويكفينى ان ربنا عارف اننا مظلومين ..مش هقدر اسامحهم ومش هقدر اقول غير حسبنا الله ونعم الوكيل فى كل جزائرى اهان مصر والمصريين ..

بحاول اتخيل واحد جزائرى اهان مصر والمصريين وحرق العلم المصرى مع الاسرائيلى وكأن مصر هى اسرائيل التانية بحاول اتخيلوه بعد كل ده وبعد ما يعدى الوقت بيفتح مصحف ويقرأ القرأن ويلاقى أمامه الاية اللى بتقول﴿ادْخُلُوا مِصْرَ إِنْ شَاءَ اللَّهُ آمِنِينَ﴾ (يوسف: من الآية 99)..يا ترى ساعتها هيحس بأى ..الحمد لله ان الله كرم مصر وزكرها فى القرءان والحمد لله ان رسول الله محمد صلى الله عليه وسلم وصى علينا ووصى على اهل مصر حتى قبل ما يبقوا مسلمين فما بالك وهما مسلمين ..الحمد لله


33 الناس الى بتكتب فى الكشكول:

donya يقول...

مساء الخير
بوستك لخص حاجات كتير
في ناس بتزعل لما نقول ان مصر ماكانتش عربيه كانت حاجه لوحدها كده
بيزعلوا
وكأن الاهرامات والفراعنه دول متخفيين
معروف ان مصر مش من اصل العرب
مصر كانت ولاتزال فرعونيه
فتحها العرب واتخذوها بلد لهم
وصارت عربيه
لطيبة اهلها

تحياتي

لقد خلقنا الله احرارا يقول...

يا باشمهندس
هقولك كلام يمكن يكون صادم ويزعلك
بس معلش
الجزائريين غلطانيين
دى حاجة مش محتاجة نقاش
بس كويس ان الناس اتأكدت ان العرب بيكرهونا
ودى حقيقة
واضح ان ناس كتير مصدومين منها

لكن السؤال ليه بيكرهونا

ده اللى لازم نعرفه بعد ماالدنيا تهدأ

انا قرأت بسرعة مدونات ومقالات كتير
وخصوصا مقال ابراهيم عيسى
واللى فهمته
اننا خيبنا
امل العرب من زمان
مرة بدون قصد فى 67
والمرة التانية مع سبق الاصرار والترصد
فى كامب ديفيد وتوابعها
هنقول طيب العرب عملوا ايه لقضايانا المصيرية
هقولك العرب مالهمش لازمة وظاهرة صوتية بس
وعايزين يحاربوا لاخر جندى مصرى
كل الكلام ده انا موافقه عليه
لكن احنا عودناهم على نغمة الشقيقة الكبرى
وهما كبروا واتغيروا
واحنا حكومتنا بتحط راسنا فى الارض
وبقينا الشقيقة اللى بتتمنظر عليهم بالماضى
ومالهاش فى الحاضر
هما غلطانيين؟
هما همج وجاحدين
واحنا كمان معرفناش نحتفظ بدورنا وبمكانتنا

حاجة كمان
انا عندى ثقة
ان التصعيد ضد الجزائر
وخصوصا بعد تدخل علاء مبارك
مقصود ومش لوجه الله والوطن
لكن ليه؟
مش قادرة احدد

انا هعيش واموت بأذن الله
فخوره
انى مسلمة ومصرية وعربية
وكمان جذروى فرعونية
ومش شايفة اى تعارض بينهم

يارب اكون وضحت وجهة نظرى

اسفة على الاطالة

لقد خلقنا الله احرارا يقول...

وكمان
ابكى انزف اموت
اختيار موفق جدا
انا بموت فى الاغنية والفيلم

الشجرة الأم يقول...

هذه هي لعبة مدروسة جدا .. وزي ما بيقولوا ما تضيق إلا لما تفرج ..

وإن شاء راح يتفرج هم الأمة الإسلامية العربية وتزاح هذه الغمة.

كل عام وانت بخير.

د/عرفه يقول...

مصر دولة كبيرة وهتفضل طول عمرها عظيمة

والكبير كبير بأخلاقه وتصرفاته وسيطرته

وللاسف احنا محكومين بناس كل يوم بتقلل قيمتنا
وبتزود كره الشعوب العربية لينا

جارة القمر يقول...

معلش

سيبهم يعملو اللي هما عايزينه ويطاوعوا أهداف الاسرائيليين

كلنا بنحب مصر

ومصر ليها فضل كبير علينا


حسب الله ونعم الوكيل

مدونون من اجل الاقصي يقول...

aالسلام عليكم
كل سنة وانت طيب
الي حصل والله مستفز
انك تحس ان اخوك اضرب واتهان
حاجة تقهر طبعا
الي ضرب حد لاوم يتاخد الحق منو
ده الصح
بس انا ضد فتنه بين شعبين مسلمين
كفاية الي بيحصل بين فتح وحماس
كفاية لبنان والعرق
لازم نكون متعصبين لدينا ش لقوميتنا
ناس كتير كاتبة حجات وشتيمة ووصف للجزائريين بانهم اصلا مش مسلمين
هو مين بيحدد اسلام وايمان حد
انا كنت شخصيا بشجع مصر ونفسي تفوز
وزعلت على حصل جدا
بس بجد الاعلام بيزيد الفتنه
وهو لسه بيوصف الي حصل
وبيضخم فالامور
الحق يرجع... ..اه
بس فتنه وفرقه لا
اليهود فرحانين اوي بلي بيحصل
تفتكر ده يرضى حبيبنا الرسول
صلى الله عليه وسلم
تحياتي
سما/سمسم

amirelhob يقول...

عاجبنى اوى البوست بس زى ما قولنا اللى اتظلمنا فيه لازم كمان نقول اتظلمنا ليه
صديقنى هى مش حدوته ولا قصه بنخترعه اول جريمه كانت بين اتنين اخوات عشان معرفوش يفكروا هما بيتخنقه على ايه ولا ليه دلوقتى احنا كمان بقينا عاملين زيهم بقينا متخلفين بنتقدم للخلف هما غلطوا فينا واهانونا ودا عيب لكن العيب اننا نفضل نصقف ونقول مش هنسكت وحقنا بردو يضيع طيب نرجعوا ازاى ونعمل ايه لسه مش عارفين لا سفير هيطرد ولا علاقات هتتقطع ولا اى جديد فى جديد اذا كونا معرفناش نجيب حق الناس اللى ماتت فى السلام 98 وصاحبها كان مصرى وفى بلدنا وهرب منها اذا كونا معرفناش نحافظ على ولادنا اللى بيموتوا بالغلط على حدود رفح وولادنا اللى بيتهانوا فى الخليج ويتسجنه اذا كونا معرفناش نجيب حق مصرى اتقتل فى مصر من بنت امير عربى دستوا بالعربيه واذا كونا معرفناش ناخد حق مصرى شغال فى فندق كلب بنت امير معين عضته هنعرف نجيب حق اللى اتهانوا برا مصر الكلام كتير يا صاحبى بس اللى ينفذ مستعد اقولك اشعار من هنا لبكرا وكلام افلام وجميل بس فى النهايه صفر على الشمال
اسف على رائ بس دا اللى بيحصل
ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

الحياة الطيبة يقول...

كشكول 100 ورقة كم أحزنني ما كتبته من أن العرب لم يستوصوا بأهل مصر خيرا ,وأنك مستاء مما فعله بعض الجزائريين من حرق علم مصر مع علم اسرائيل ,فعلا أنا حزنت لحزنك ولما قلت إنك لن تستطيع أن تسامحهم قررت إني أكتب لك .مصر في عيوننا وقلوبنا ,شعب مصر أكثر شعب الطيب فيه سجية لم يكتسبها متأخر أو يتصنعها ,من لا يحب مصر ليس قادر أصلا على الحب ولا يحب حتى نفسة .هذا الكلام ليس مجاملة إنه يحمل الحقيقة كاملة .ونحن إذ نحب مصر وأهلها الطيبين نعمل بوصية سيدنا وحبيبنا محمد صلى الله عليه وسلم وكما قلت أنت في كتاباتك هم أهلنا من زمن سيدنا ابراهيم .لست بحاجة يا ابن مصر أن تذكر ما عملته مصر من أجل كل العرب وما قدمته لنا نحن أهل الكويت من مساهمة في التعليم وأشياء أخرى كثيرة إلى مساهمة وتأييد كامل أثناء الغزو العراقي ,كل ما قدمته مصر لأمتها العربية والإسلامية نابع من معدنها الأصيل ......وحتى دون أن تعمل كل ذلك هي تستحق فعلا أن تسكن في عيون كل عربي وكل مسلم ,حتى عندما قلت لا أستطيع أن أسامحهم ..هذا لأنك حزين من موقفهم ,القلب الأصيل لا يملك إلا أن يسامح ....وأنت صاحب هذا القلب .إن أساء بعض الجزائريين لكم فأهل الجزائر يحبونكم فأنتم جزء من الأمة العربية الإسلامية ,لا تعمم حكمك على الكل ,من أراد أن يهين مصر لن يستطيع أن يهينها بفعله ..إنه فقط قد أهان نفسه بفعله الرديء .لا تساوى مصر بإسرائيل ولا تربط بها بأي حال من الأحوال ...فلا تحزن فعلا أنتم خير جنود الأرض

غير معرف يقول...

انا جيت اسلم على اخواتى وامشى على طول
وكان نفسى اقعد اقرا زى زمان كدا بس الظروف بقى

يارب حضرتك تكون بخير
واتمنى متنسناش من دعواتك
لا اله الا الله

غير معرف يقول...

دموع القمر مرت من هنا :):)

well يقول...

donya...
مساء النور
ولكن الواقع الحالى مصر دولة عربية
وده من فضل الله علينا انها دولة عربية اسلامية
تحياتى

well يقول...

لقد خلقنا الله احرار ..
استاذتنا..
العرب ..كنت فاكر انى فاهمهم ..بس طلعت مش فاهم اى حاجة ..بس واحد كويتى قالها فى الحسين وبصراحة ومن غير زعل (احنا بنحب المصريين ..لكن ما نقفش معاهم )
وصحبتى البحرنية قالتلى انتوا قولتوا ان مشكلة فلسطين لازم تحلها فلسطين بنفسها ودى مشكلتكوا انتوا لوحدكوا حلوها بنفسكوا ...
مشاكلتنا ملهاش دعوة بالعرب ..هى العرب ناقصة مشاكل ..عاش الملك ..وابن الملك ..
وانا كمان فخور انى مسلم عربى لان الرسول صلى الله عليه وسلم كان مسلم عربى
تحياتى
تحياتى

well يقول...

لقد خلقنا الله احرار...
ابكى انزف اموت وتعيشى يا ضحكة مصر

well يقول...

الشجرة الام ....

بأذن الله ربنا هيحكم بالحق
تحياتى

well يقول...

د/عرفة ...
وكمان احنا كنا عايشين فى وهم
تحياتى

well يقول...

جارة القمر ...

مش عارف اقولك اى ...الموضوع مضايقنى بجد ...بس اللى اقدر اقوله ان لو العرب فرقتهم كورة ..يجمعهم الاسلام ..وعمر الاسلام مايرضى باللى حصل
تحياتى

well يقول...

سما /سمسم..
الاعلام صوت الناس
الاعلام المصرى وضح صوت الناس
لكن الاعلام الجزائرى اللى بيتمثل فى صحيفة الشروق الجزائرية وضحت صوت الكدب والفتنة
مبحاولش اجامل مصر علشان انا مصرى
بس صدقينى ..بس صدقينى انا كل كلمة بكتبها بكتبها بما يرضى الله علشان عارف انى هتحاسب عليها
وانا بكتبلك دلوقتى ان الاعلام الجزائرى هو سبب الفتنة
تحياتى

well يقول...

امير الحب
........
الكرامة حق ...والحق لازم يرجع ...والرجوع ممكن يكون صعب ..بس انا واثق كل الثقة انه هيرجع لان الله هو الحق
تحياتى وشكرا على كلماتك واتمنى لك التوفيق والهداية من عند الله

well يقول...

الحياة الطيبة ...
كلامك ده جى فى وقته كلامك كان عبارة عن مياه طفت نار كانت جوايا
تحياتى ...وبفكر انشر تعليقك بوست لوحده
من لا يحب مصر ليس قادر أصلا على الحب ولا يحب حتى نفسة
شكرا

well يقول...

دموع القمر وجارة القمر وكل مدون عربى مكانه هنا علشان احنا اخوات والاخوات ديما بيجمعهم مكان واحد
تحياتى

well يقول...

غير معروف رقم اتنين ..
هو انت دموع القمر ولا اللى فى بالى
لا اله الا الله

تحياتى

لقد خلقنا الله احرارا يقول...

كل سنة وانت طيب ياباشمهندس
السنة الجاية تكون حققت كل احلامك
ممكن يكون فرح
ممكن يكون مشروع
يارب يكون رضا ربنا وحج
المهم انك تكون سعيد

osama44 اسامه 44 يقول...

ويل حبيبى
عايز اقولك حاجه
كشعوب لا احد يكرهنا اما كحكام فهم اساس كل بلوى
على العموم
هتلاقى ردى فى مدونتى
اه صحيح يا ويل فى مشكله فى المدونه
مش عارف فيها ايه
غيبت اسبوعين اتشقلب حالها
بعد اذنك ويل ممكن تجيب الفنى يشوفهنا

norahaty يقول...

كلام (ابلة وفعلاً لا قولاً)
ابلة (لقد خلقنا الله احرارا)
يغنينا عن التعليق :فيه الكفاية
العرب زعلانين مننا لأنهم اتعودوا
على كده وهو ده قدرنا بحكم
الحجم والكم والتاريخ
والمزايا وحاجات كتير
لو عدناها مش حنخلص
وحتخلينى انسى انا
جاية اساساً ليه؟
علشان أقولك
كل سنة وأنت
طيـــــب ياويل:)

أحمد الصعيدي يقول...

السلام عليكم ورحمة الله

عيد عليكم مبارك
وكل عام وأنتم بخير

well يقول...

لقد خلقنا الله احرار ..
وانتى والامة الاسلامية بخير يا رب
تحياتى ونورتى

well يقول...

اسامة ...
الحكام ....والشعب مشكلة كبيرة شوية
كل عام وانت طيب
تحياتى

well يقول...

norahaty ...

وانتى والامة الاسلامية بخير يا رب
....تحياتى ....وفين العيدية

well يقول...

احمد الصعيدى ....
مبارك على طول معانا
كل عام وانت بخير
تحياتى

الحياة الطيبة يقول...

الحمد لله أن تعليقي كان له أثر طيب ,وأرجو من المشاركين في التعليق على هذا الموضوع أن يقولوا كلمات شافية لا كلمات موجعة تزيد من الألم ,مصر غالية وأدعو الله أن لا يبين كم هي غالية.

الحياة الطيبة يقول...

تقبل الله طاعتكم وعيدكم مبارك

well يقول...

الحياة الطيبة ...

مصر غالية وأدعو الله أن يبين كم هي غالية.
كل عام وانتى بخير
تحياتى