RSS Feed

احلام الصباح


اى هو الشئ اللى ممكن يخليك تصحى الصبح بدرى ؟
1= المدرسة
2=الشغل
3= اغير للحمام اكل ومياه

4=اسبوع اقضيه فى اسكندرية حبيبتى والحق الشط وهو فاضى والمياه ساقعة .. وعيش
5=سهران من بليل ومش جايلى نوم
الاجابة الحالية هى رقم 3 ورقم 5

احلام الصباح ..

الصبح .. السابعة صباحا .. افتح البلكونة .فى الشارع عيال رايحة المدارس . طعم الهوا الساقع يطير من عينى النوم .. احط للحمام اكل ومياه وافضل ابص على عشة الحمام وعلى الحمام واسند ضهرى على سور البلكونة وانا بحلم .. بـ احلام الصباح

.. السابعة صباحا .. بيكون الشارع مليان ناس ..صوت الاصحاب ( القدامى والجدد ) وشوش كتير كلها وشوش بريئة كلها وشوش تلاميذ شايلة الشونط على كتافها .. فيه اللى ماشى بيتكلم واللى بيتخيل واللى ساكت واللى بيحلم احلام الصباح .

.. السابعة صباحا .. اتذكرهم جميعهم كانت اسمائهم تبدأ بحرف الميم والهاء والـ نون والـ واو جميعهم كانوا فى الفصل احلى اصحاب .. وسعات اخوات .. وسعات نتخانق نرجع نتصالح .. وفى حصة الالعاب كورة بتجمعنا ونبدأ نتقسم فريق وفريق والصوت بيعلى على كلمة جوون..

السابعة صباحا .. قلب الحياة بيدب .. والمدرسة مغنطيس بتسحب خطوات كل اللى مشيين فى الشوارع

.. السابعة صباحا .. سيبك النهاردة من المدرسة وتعالى نروح الحديقة الدولية يمكن نقابل هناك البنات بتاعت الاسبوع اللى فات .

.. السابعة صباحا ..اتذكرها وهى على راسها حجاب ابيض ولابسة ابيض فى كحلى اشوفها اغمض عينى عشان هى كانت بيضة وكانت بتعكس نور الشمس .. يزغلل عينى وسعات يزغلل قلبى

..السابعة صباحا .. مش عارف ليه النت فاصل .. يمكن علشان النهاردة اجازة والنت انضم للحزب الوطنى وقرر انه يعكنن عليا السهرة الصباحى ..

.. السابعة صباحا ..رغم ان النت فاصل ورغم انى مقتنع ان فى حجات احسن من كدة ممكن تكتب .. الا انى كان ليا مزاج اكتب .. احلام الصباح


.. السابعة صباحا .. يأتى الى خاطرى اغنية ياصباح الخير ياللى معانا ياللى معانا .. وبرنامج صباح الخير يا مصر اللى كنت بشوفه صدفة قبل ما انزل من البيت على المدرسة

.. السابعة صباحا .. ( يااا هو انت لسه صاحى دى الساعة بقت سابعة ) لسه بدرى اعمليلى بس كباية شاى

السابعة صباحا .. كلاكس عربية نقل كبيرة .. بتعدى فى الشارع العمومى

السابعة صباحا .. واحد فى الشارع معاه جردل مياه وعمال بيمسح العربيات المركونة فى الشارع العمومى

السابعة صباحا .. حبيت اقول صباح الخير .. لحجات جوايا


السابعة صباحا ..بالتوقيت الشتوى

السابعة صباحا .. محدش هيفكر انه يرن عليا

.. السابعة صباحا ..ياااا دى بقت (8) تصبحوا على خير

29 الناس الى بتكتب فى الكشكول:

داليـ ـ ـ ـ ـ ـ ــــا يقول...

ما أحلاها الزكريات
بحلوها بمرها
ما أحلاها

أنا كمان كنت بحب أسمع أغنيه ياصباح الخير ياللى معانا
كنت افتح التليفزيون مخصوص عشان اسمعها

جميله ذكرياتك ياويل باشا

حنين الزكريات

أنا - الريس يقول...

بعد السلام والتحية
أما بعد
من رئيس الجمهورية

الفكرة جامدة والمشاعر اجمد واحلام الصباح والعيال والصبايا اجمد واجمد والقفلة كانت الأجمد بينهم كلهم تحياتي ليكي يا ويل

طهر فؤادك يقول...

السلام عليكم ورحمة الله وبركاتة

اخبارك اية يااويل


طمنى عنك

وبوست جميل والذكريات اكيدد فيها الجميل وفيها المؤلم ونقول الحمد الله على كل حال لان المؤمن يحمد ربة على السراء والضراء كما قال رسول الله صلى الله عليه وسلم عجبا لأمر المؤمن إن أمره كله خير وليس ذاك لأحد إلا للمؤمن إن أصابته سراء شكر فكان خيرا له وإن أصابته ضراء صبر فكان خيرا له

الحياة الطيبة يقول...

صباح الخير WELL كل هذه الأشياء الجميلة تحدث في الصباح لا عجب إن قالوا أن أمير النهار أوله وسيد الخلق جميعاً سيدنا محمد صلى الله عليه وسلم دعا بالبركة لأمته في بكورها ... يبدأ كل يوم وكأنه عالم جديد ...أبدعت في وصف أول يومك ...بوست يشرح القلب ,شكراً ومساؤك أفضل من صباحك بإذن الله .

همسات وبحــ الحياه ــر يقول...

الله الله
رجعتنى 8 سنين لورا بجد احلى ايام
ياصباح الخير ياللى معانا ياسلام ياسلام
ياحلو صبح ياحلو طل ياحلو صبح نهارنا فل هههههه
جميل ياول :)
ومتقفلش التعليقات تانى لانى بستنى بوستاتك :)
صبااااحك سكر زياده

غير معرف يقول...

جزاكم الله خيرا كثيرا

richardCatheart يقول...

السابعه صباحا صباحك فل بأحلام صباحك الابيض


شميت فى كلامك ريحه الهوا البارد اللى بينعش الواحد ويفوقه زمان ماكنش فى جيوب انفيه وكان الواحد بينتعش

شميت ذكريات جميله وشوفتنى ماشيه رايحه معاكم المدرسه وبتكلم مع البنات
ياااااااااااه ايام

سمعت فى كلامك يابنت يا ام المريله الكحلى ههههههههه

فكرتنى بالعب فى حوش المدرسه يا اخرااااابى
ماكنتش بلعب غير مع الولاد
ونلعب كره بالدوم وفى ازاز العربيات وطاخ ونطلع نجرى ههههههههههه
وفريق المزيكا والتمثيل اياااااااااااام

تعرف انا ماحستش بموضوع ان المدرسه مغنطيس غير لما خلصت تعليم وبقيت اشوف المنظر من بره زى ما انت وصفته الشارع زحمه وكله فى اتجاه واحد ومره وحده بخ هههههههه اتشفطو

انا عموما كنت بكره الصحيان بدرى عمى
كنت بصحى الولاد ويركبو العربيات واجرى انام
من فتره والصحيلان بدرى بقى اطعم لانى ساعات كتير بكلم قرفه وزعربه صديقاتى الصبح ونقعد نقضيها فله
الصبح بقى طعمه غير صحيح انا مخلوق ليلى وسهيره بس بقيت بحب الساعه السابعه صباحا

بس انا بقى ايه دا الساعه 10 طب تصبحو على خير ههههههههههه

جميل يا ويل الواحد كان مفتقد بوستاتك اللى كلها شجن واحساس
بالزمان والمكان

well يقول...

داليـــــــا ..

...

الزكريات ديما بيبقى ليها طعم ..

اغنية يا صباح الخير مرتبطة بالزمن الجميل والحنين

الاجمل تعليقك يا اجمل داليا

تحياتى

well يقول...

MR.PRESIDENT..

تعليقك هو الاجمد وديما بيرفع من روحى المعنوية

لك احلى تحياتى ..وامنياتى لك بأحلى احلام (الصباح والمساء)
..

well يقول...

طهر فؤادك ..

وعليكم السلام ورحمة الله وبركاته ..

الصبر له طعم جميل .. طعم الايمان فى القلب

شكرا على تعليقك وجزاكم الله خير

تحياتى

ساسو يقول...

دايما الذكريات بتبقي ممتعه
واليوم اللي يعدي مش بيجي زيه
وعلي رأي الست ( قول للزمان ارجع يا زمان )
وبجد اغنيه في الجون
ميختلفش عليها اتنين

ذكرياتك جميله ورقيقه جدا

دايما يارب في سعاده

غير معرف يقول...

مصر فى مهب الريح

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 – العدالة الاجتماعية .. وأطفال الشوارع والذين يملكون كل شىء .
5 – ضرورة الاتحاد مع السودان لتوفير الغذاء وحماية الأمن القومى المصرى.
6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

لمزيد من التفاصيل أذهب إلى مقالات ثقافة الهزيمة بالرابط التالى
www.ouregypt.us

أبو العريف يقول...

قلب الحياة بيدب .. والمدرسة مغنطيس بتسحب خطوات كل اللى مشيين فى الشوارع


هى كانت بيضة وكانت بتعكس نور الشمس .. يزغلل عينى وسعات يزغلل قلبى

حلوووووووووووووو قوووووووووووووي


اولا انا بحب قوووووي البوستات اللي من النوع ده


ثانيا زكريات حلوه قوي
وكلام واسلوب جميل قووووي


وحشتني مدونتك

osama44 اسامه 44 يقول...

ويل حبيب قلبى
بجد انتى اصلى وبجد بوستك اصلى اصلى
وبجد انت رجعتنى لاحلى ايام فى حياتى
قد ايه انا بحبك وبحب دماغك
واجمل حاجه فيك هو الصدق
متعنا كمان وكمان
ومتغيبش عننا
سلام يا اعز ويل

well يقول...

الحياة الطيبة ..

صباح النور .. وفعلا الصبح فيه بركة بتخلى للنهار طعم جميل
شكرا لما اضافتى ..

تحياتى

well يقول...

همسات وبحــ الحياه ــر
..
صباح النور يا همسات ونهارك زى الفل ..

8 سنين .. احلى ايام .. وربنا يجعل كل ايامك جميلة

صباحك نور

تحياتى

well يقول...

غير معروووف ..

شكراً.. ووففقكم الله لما يحبوا ويرضاه

تحياتى

well يقول...

richardCatheart ..
..
السابعة صباحاً .. صباح الفل
الهوا فعلا كان بارد..هو ده الهوا اللى يفوق واللى الواحد يملى صدره منه ..

(فكرتنى بالعب فى حوش المدرسه يا اخرااااابى
ماكنتش بلعب غير مع الولاد)..شكلك كنتى شاقية يا ريتشارد
للصبح طعم جميل
.. اوام كدة الساعة بقت 10..

ديما يا ريتشارد الاحساس فى تعليقك بيغلب البوست نفسه
تحياتى لتعليق احسن من البوست ..

well يقول...

ساسو ..

( قول للزمان ارجع يا زمان ) .. لو مرجعش فكفاية ان زكريات الزمان الجميل تفضل جوانا..

تحياتى لزكرياتك

well يقول...

أبو العريف..

صباح الففل يا صديقى القديم ..

سعيد بإن البوست عجبك .. ووحشنى تعليقك وكمان مدونتك .. ان شاء الله ربنا يدووم التواصل

تحياتى

well يقول...

اسامة ..

حمدالله على السلامة .. ايوة كدة عاوز تعليقك ينور الصفحة والكشكول والاشة كلها
شكرا على كلامك الجميل يا اوس اوس

تحياتى

راجية الرحمه يقول...

السابعة صباحا .. ترحل يمامتى من غارها قاصده الغذاء او ربما لتنعم بالهواء اتمنى ان اسألها لما ترحل ولكنها غادرت البلاد

اممممممممممممم
اصل انا كان عندى حمامه بتبات كل يوم فى عيشه بانتها على شباكى وسمتها يمامه الغار اعدت معايا مده طويـــــــله وكالعاده فى يوم مجتش بالليل فى وقتها وقت المغرب وبطير تانى الصبح الساعه سابعه
حضرتك فكرتنى بيها
اجمل حاجه فى الدنيا الذكريات اللى مبتننسيش دايما ريحه الشتا بتفكرنى بالذكريات اللى كتبتها كلها
الاسكندرنيه هيفهموا يعنى ايه ريحه الشتا

well يقول...

رااجية الرحمة ...

اليمام حساس اوى لدرجة الخوف .. ممكن تكون خافت من اى حركة علشان كدة مارجعتش تانى ..

طعم الشتا فى اسكندرية اكيد ليه طعم مختلف .... طعم جميل
ديما الزكريات بتكون مربوطة بالشتا وطعم الهوا الساقع .. لان زكريات الاصحاب بتكون فى المدارس .. والمدارس بتكون فى الشتا ..

وسلام خاص لاسكندرية

وتحياتى

Unknown يقول...

تقبل مرورى وتقديرى واحترامى

مرايتى يقول...

للأسف ما بقتش بشوف السابعه صباحا دى خالص
بس رجعتنا لذكريات كانت جميله ونظره مختلفه خليتها أجمل

تحياتى للمبدع
جزاك الله خيرا

غير معرف يقول...

شكرا على البوست

!! a7mad sala7 !! يقول...

تصدق انا روحت هناك وانت بتتكلم :D


بجد جميل اوى :)

همسات وبحــ الحياه ــر يقول...

جاية اسلم
واشرب كوباية ينسون :)
واكل حته كيك وامشى :) ودقدق هيحاسب هيقيد على النوته

miroooo يقول...

السلام عليكم
البوست جميل والاسلوب شيق
رجعتنا لايام جميله ايام المدرسه
وكمان الاستيقاظ بدرى مهم وجميل لكن لما نكون نايمين بدرى لو مكناش نايمين بدرى بقى بيبقى زهق هههههه
بس بجد رجعت مع البوست ده لحاجات جميله فى حياتى
اشكرك بشده