RSS Feed

يُــعاد مرتين

امبارح يوم الاحد الصبح جى اتنين مهندسين من شركة الغاز علشان يعينوا المواسير اللى ركبت فى الشقق ...المهم كل ما يدخلوا شقة فى البيت يلاقوا الماسورة واطية يقولوا لازم تتغير ويعينى صاحبى اللى ساكن فى الشقة اللى قدامى لسه موضب الشقة ومش داقق فيها مسمار لكن برضوا المواسير عنده لازم تعلى ...معلش بقه ياسكان البيت ....واحب برضوا اقول الحمد لله ..شقتنا هى الوحيدة فى البيت اللى مش هتغير فيها مواسير .....متسألش ليه ومتقولش مشربهم شاى باليسمين ....
هو بس الواحد كان عاوز يفهم حاجة المهندسين دول المفروض كانوا جم عاينوا قبل ما العمال تركب المواسير ...لكن العمال هى اللى عاينت وهى اللى ركبت ...وهى اللى هتركب تانى ...يا سلام عليكى يا بلد الرجل الواحد
انا كنت فاكر ان سياسة الاعادة فى المدرسة وبس وان الحاجة الوحيدة اللى بتتعاد هى الواجب وبس
لكن طلعت الدنيا دى اكبر مدرسة واحنا تلاميذ ...والدرس انتهى لموا الكراريس
تحديث...

احنا فى الاول خالص قالونا مش هينفع يدخلوكوا غاز علشان مزلقان السكة الحديد محاصركم من كل ناحية
راحوا بلطوا الحوارى عندنا ....بلاط تعبان اى كلام ....انا مرة كنت فى خان الخليلى وشوفتهم بيشيلوا البلاط القديم ويركبوا بلاط جديد ....البلاط القديم بتاع خان الخليلى كان احسن من الى بيركب عندنا 100 مرة
المهم بعد ما ركبوا البلاط ....جم يحفروا ويبهدلوا الدنيا ...فى اى يا عم الحج ....هنوصلكوا الغاز

18 الناس الى بتكتب فى الكشكول:

غير معرف يقول...

الله عليك
جبت المختصر المفيد

مدونة جميلة
أول زيارة ومش الاخيرة ان شاء الله :)

سيبلي صفحة فاضية في الكشكول بقا عشان اكتب فيها :)

تحياتي

richardCatheart يقول...
أزال المؤلف هذا التعليق.
richardCatheart يقول...

هههههههههه الاعاده فى المدرسه بس الله يا اخى مصر دى امى والام مدرسه يبقى الاعاده موجوده مش عايزة نقاش هانعيد هانعيد
اهو موضوع المواسير دا بردو فكرنى بالناس المحتاسه على بطاقه التموين علشان تشعبط فى الدعم هاتعمل ايه ظروفها كده المسؤلين يحطو طلبات تروح الناس تخلص اورقها شهر لف عل ادارات حكوميه وترجع يقولها الموظف لازم اعاده للروق تم تغير الطلبات والرجل ولا الست يمتو قبل صدور البطاقه الانتخابيه سورى التمونيه

واضح ان العيب فى الشعب مش بيذاكر فابيطلع بملاحق

شكرا تقبل مرورى وتحياتى

Tarkieb يقول...

....بس يحمدو ربهم انه ح يركب الغاز....انت عارف دي عادة فرعونية اول ما الشارع كان يتسفلت يجي يحفرو بتاع كابلات الكهربا ..في العصر الحديث الغازلازم يطلع فوق ....عشان يبان انه الشغل على ودنه

خواطر شابة يقول...

هي جات على كده وبس اوقات بيتسفلت الشارع واول ميخلص وقبل ما نتهنى بيه يجي بتوع شركة الكهرباء يحفروا يخلصوا ويردموا بعديها يجي بتوع شركة الماء يحفروا يخلصوا بعدين بتوع الصرف الصحي وفي النهاية نحصل على مطب صناعي معتبر وعلينا ان نحمد الله ان كان فقط واحد وليس كل شركة عاملة واحد مخصوص

well يقول...

سمو الامير بنفسه ....يا ويلكم يا ويلكم

الكشكول كله تحت امرك اكتب فى اى صفحة تعجبك ...اكتب او حتى شخبط علــ الورق

تحياتى

well يقول...

richardCatheart .....

ممكن الشعب ياخد دروس خصوصية
بس الفرق ان المدرسة العادية بيكون فيها اساتذة
لكن مدرسة الدنيا بيكون فيها ابلاليس
والدرس انتهى لموا بطايق التومين والكراريس
تحياتى

well يقول...

Tarkieb ...

الحمد لله
..مازلت هذه العادة الفرعونية موجودة ...نحن امتداد لحضارة انتهت
تحياتى

well يقول...

خواطر شابه ...

مغربية لكن واضح انك تعرفى مصر بنسبة 100/100
وانا وضحت الكلام ده فى التحديث

تحياتى

خواطر شابة يقول...

هل تعتقد ان هذا في مصر فقط او انني عندما علقت كنت أقصد مصر الحالة عامة للاسف وفي النهاية الخلاصة هي اننا كلنا في الهم شرق

مرايتى يقول...

إطمن دى الجوده المصريه

أمال يعملوا كده الحاجه وتعدى مش لازم دور تانى وثالث اذا أمكن أما يطلعوا عين مين؟

ربنا يحلها العقدة الى كل مادا بتضغط

ЯậŇ MỗŘỹ يقول...

السلام عليكم و رحمة الله و بركاته
احمد ربنا ان هيركبوا ليكم غاز أنا سمعت قريب من واحده صاحبتى ان فى بلد لسه واصلها مايه قريب و فى بلاد تانيه زى ما يكونوا لسه ف العصر الحجرى

well يقول...

خواطر شابه ...

كلنا فى الهم شرق

تحياتى

well يقول...

مرايتى ...

بكرة احسن ان شاء الله

تحياتى

well يقول...

روح بلا فرح ...

الحمد لله على كل شئ

الكشكول نور

تحياتى

فكرة من الزمن ده يقول...

الحكومة عندنا دايما بتحب تشتغل على مية بيضا
يعني يشتغلو على نضافة
مثلا يسفلتو الشارع
عشان يبقى نضيف
وبعدين يبدأو تكسير علشان تركيب كبلات كهربا او مواسير ضغط عالي
وبعد ما يركبوها يسفلتو تاني
استعدادا للتكسير وقت تركيب مواسير الغاز
شعب مايعجبوش العجب
تحياتي

هبة النيـــــل يقول...

بس البلاط القديم كان من ايام الاحتلال فكان الانجليز هما اللي مركبينه، حاجة كدا مستوردة وخامات نضيفة، احنا حتى لو استوردنا بنجيب المضروب،

بالمناسبة قصة الغاز انتهت على ايه؟؟ جم ركبوا؟؟؟

NeVeN يقول...

ههههههههههه
هى دى بقا سياسة الهدم والتعمير

هو دة العادى فى بلدنا
بعد ما نخلى الحاجة منظرها كويس لازم نبوظه عشان التجديدات
طيب ما نجدد وبعدين نجمل المكان؟

ليه وليه يشوفو حتة شكلها حلو فى البلد
زى ميكونو حالفين يبوظو اى حاجة بيعملوها

ومبروك عشان مش هتغيرو انابيب الغاز