RSS Feed

تاج .. الاسرار الستة

المرة الاولى اللى جانى تاج فيها كان من مصعب صلاح ...واعتذرت وقولتله ان لسه بدرى عليا على ما افكر اعمل تاج

المرة دى التاج من مرايتى ..التاج بيقول (تحدث عن ستة أسرار قد لا يكتشفها من يقابلك للمرة الأولى ) ..

اولا شكرا يا مرايتى على التاج ..واسف انى اتأخرت فى الرد عليه

بس انا قعدت افكر فى السؤال ده كتير ...وسألت نفسى هو انا عندى اسرار ..كانت الاجابة لأ..لكن بعد تعمق اكتشفت ان عندى ملاين الاسرار .

عارف الانسان ليه بيسكت كتير ..علشان مخبى جواه كلام ..خايف يتكلم يحسن يقول الكلام من غير ما يقصد ..خايف يحسن يقول السر

فى ناس بتعيش علشان تدور على حل السر وفى ناس بتعيش علشان تخبى السر

هو يعنى اى سر ..؟ السر هو كل شئ بنحاول نخبيه
السيئة لما بنرتكبها بنحاول نخبيها ...الحب بنحاول نخبيه جوانا ...حتى المشاعر وحتى الكلمة ...
اى علاقة السر بالتدوين ...المدونة هى شئ متوصل باسلاك جوانا بنكتب فيها كل شئ جوانا بنكتبه بكل براءة والسر هو شئ مستخبى جوانا
بس السر لو اتقال او انكتب مش هيكون سر
السر اللى جوانا ممكن نقوله لانسان واحد بس ..ممكن نعيش حياتنا كلها ندور على الانسان ده ...ممكن مانلاقوش وفى نفس الوقت بيكون قدامنا لكن هى الدنيا كدة
..عموما اللى هيقابلنى للمرة الاولى
1* مش هيعرف انى البطاقة بتاعتى بقالها اكتر من سبع سنين ولازم تجدد
2*مش هيعرف انى عندى مدونة واسمها كشكول 100 ورقة
3*مش هيعرف انى بحب النجوم اوى وان فى نجمة فى السما بعتبرها نجمتى انا وبس وسعات خيالى بيقولى ان النجمة دى هدية ليا انا وبس ومش هيعرف انى كمان حلمت بالنجمة دى وانى بحب الشتا علشان هى بتبان فى الشتا وبس
4*اللى هيقابلنى للمرة الاولى مش هيعرف انى مش بعرف اسوق ...موقف حصل معايا كذا مرة (معلش ياوليد خد المفاتيح واركن العربية على اى جمب او عدى العربية دى على ما خلص الحجات اللى فى ايدى ) بيكون جوابى مابعرفش اسوق ...ينظر الشخص اليا بإستغراب ويقولى انت بتكلم جد ولا بتهزر ...
اصل الحكاية انى صحبى الانتيم هو اللى معلمهم السواقة وبما انى اكتر واحد مصاحبه المفروض انى اكون اتعلمت السواقة من زمان ..وبعدين انا مش سواق عندهم علشان اركن العربيات
5*اللى هيقابلنى للمرة الاولى مش هيعرف انى انا مش انا ونفسى اكون انا ونفسى الاقى نفسى
6*اللى هيقابلنى للمرة الاولى مش هيكتشف انى بحبكوا كلكوا فى الله وبحب عالم التدوين لان الحب جوايا وكل شئ جوايا بيكون سر ...وكمان مش هيكتشف انى بحب اصالة وفيروز وعمرو دياب وعادل امام وكونان وتمسلية راجل وست ستات واوليفر كان.. بتاع المانيا وكمان مش هيكتشف ان البوست القادم ان شاء الله هيكون اسمه ..حلم هربت منه الالوان 1..2..3 كلمتين شعر صغنتتين كدة على قدى يارب يعجبكوا

21 الناس الى بتكتب فى الكشكول:

promise is promise يقول...

اه صح تصدق انا كمان بطاقتى انتهمت والمفروض اغيرها الشهر ده

شكرا انك فكرتنى

يالا سلام عليكم

well يقول...

promise is promise ...

اى خدمة ..

وعليكم السلام

مرايتى يقول...

متشكره إنك قبلت التاج

وردودك طبعا هايله
وإتفقنا فى إن الاسرار عمر الى بيشوفنا أول مره مش حيعرفها

وكويس اننا عرفنا بعض الاسرار الى مش أسرار قوى
وما تركبش عربيات مع حد تانى منعاللإحراج

well يقول...

مرايتى..
وكويس اننا عرفنا بعض الاسرار الى مش أسرار قوى
صدقينى من الاول كنت عارف ان اللى هكتبه مش هيعجب حد
تحياتى

غير معرف يقول...

السلام عليكم

أسرار متغيره
ههههههههه

البطاقه وهتتجدد ان شاء الله

والبوست الجديد كلها يومين وهينزل وهيتعرف



أحنا عايزيننعرف الأسرار اللى جواك

بس بجد 6 اسرار لذاذ

تقبل تعليقى ويسعدنى زيارتك فى مدونتى

ودوام التواصل

well يقول...

الحب الجميل ..

وعليكم السلام ورحمة الله

اسرار متغيره

شكرا على تعليقك الجميل وان شاء الله يكون فى تواصل
تحياتى

ساسو يقول...

خلاص ياصديقي كشفنا أسرارك
وكلهم أسرار يجننوا
بجد أكتر الناس جواهم كده
وبجد البوست دا جميل
وكمان دمك خفيف اوي
دمت متألق يا فنان

richardCatheart يقول...

ازيك ياويل

بقالك مده مختفى وحشتنى كتاباتك جدااااااااا

المهم انك بخير اسرارك اللى قولتها جميله
اوى وخصوصا بتاعت النجمه ايه ياعم الرومانسى يلا الله يسهلك ههههههه

ويارت تغير بطاقتك علشان متتماسكش انت عارف دخلين على انتخابات والكماين بتبقى بالعبيط

هاستنى البوست الجديد

مهموهة أحمد يقول...

شخصية جميلة يا ويل
ربنا يسعدك ويهنيك يارب
ومبروك عليك التاج

خالص تحياتي و تقديري

موجة يقول...

هههههههههه
تحياتى على استخدام ذكائك فى الرد على التاج وبجد اول مرة اشوف رد تاج بالطريقة دى
طريقة جديدة وجميلة ومقبولة
دمت بخير

غير معرف يقول...

ايه الاسرار الجامدة دى


عندك حق فى كلامك عن الاسرار

well يقول...

ساسو .... كل شئ انكشف وبان

شكرا على كلامك الجميل يا ساسو

تحياتى

well يقول...

richardCatheart ...

هههههه لا دى مش رومانسية ده تأمل

وبعدين انا لو اتمسكت ميهمنيش ..انا مواطن مصرى ...

ان شاء الله البوست الجديد هيعجبك

well يقول...

مهمومة ...

شكرا على متابعتك وانا عارف انى مقصر معاكى ومع ناس كتير بس ان شاء الله هيكون فى تواصل

تحياتى

well يقول...

موجة ...

بصراحة انا كنت بكتب الكلام ده وانا مقتنع 100فى 100 انه مش هيعجب حد

الحمد لله انه اتقبل ..

شكرا موجة على كلامك اللى بيرفع من روحى المعنوية

تحياتى

well يقول...

star in the sky....

اى خدمة ...ولسه فى اسرار كتير انا اصلى بير ...

نورتى الكشكول
تحياتى

أنا - الريس يقول...

اسرارك ظريفة ..
رغم اني بحب اقرا التاج للمدونيين إلا اني لا اتمني أن أخذه لأني .. مش هعرف اطلع في الموقف زيك بذكاء .

ومش بحب اشرك اسراري
والا مبقاش سر

لدرجة ان في مدون زعل عشان مردتش علي التاج لأن الموضوع مش اجباري

أنا - الريس يقول...

اسرارك ظريفة ..
رغم اني بحب اقرا التاج للمدونيين إلا اني لا اتمني أن أخذه لأني .. مش هعرف اطلع في الموقف زيك بذكاء .

ومش بحب اشرك اسراري
والا مبقاش سر

لدرجة ان في مدون زعل عشان مردتش علي التاج لأن الموضوع مش اجباري

مرايتى يقول...

لا ازاى والله ما قصدى حاجه
بالعكس ردودك متميزه كالعاده
طبعا كل الى كتبته عجبنى
وأسفه والله لو فهمت حاجه ضايقتك

امنت من الناس المتميزه فى كل كلمه بتكتبها

well يقول...

MR.PRESIDENT ...

انتظر منى ان اهديك تاج قريبا ...

وبعدين يا مستر انا شايف ان التاج شئ جميل بس نفسى الناس ترد عليه بإبداع وطريقة خاصة فى الكتابة وانا واثق انك تقدر على كدة .

تحياتى

well يقول...

مرايتى ...

اولا انا بشكرك جدا انك قدرتينى وافتكرتينى واهديتينى تاج
وانا اضايقت من نفسى اوى لما كتبتلك (صدقينى من الاول كنت عارف ان اللى هكتبه مش هيعجب حد) ..هى غلطتى انى معرفتش اوضح كويس
انا بصراحة كنت واثق ان الكلام ده مش هيعجب حد وان فيه اللى هيقول عليه اى الهيافة دى ....لكن الحمد لله هو اتقبل وعجب الناس
وحتى يا مرايتى لو فى حاجة ضيقتنى انا مقدرش ازعل منك انتى بالذات لانك من المدونين اللى ليهم معزة خاصة عندى وربنا يعلم باللى فى قلبى
....وبعدين يا ستى لو عاوزة تبعتى تاج تانى وتالت ابعتى احنا قدها وقدود
مرة تانية يا مرايتى شكرا انك قدرتينى وفكرتى فيا واهدتينى التاج .
تحياتى ..