RSS Feed

ايتها الابتسامة


المنظر الاول
ينظر صاحب الكشك فإذا الذى امامه وجه عابس
صاحب الكشك .. أأمر يا استاذ
الوجه العابس ..!!!!!!!!!!!!
صاحب الكشك يهز رئسه وكأنه يقول ايوة انا فاهم بس قول انت
الوجه العابس .. يعطى له 20 جنيها وكمان يقوله علبة روزمن (وكل ده فى حركة واحدة)
صاحب الكشك .. اتفضل
الوجه العابس .. وولاعة لو سمحت
صاحب الكشك .. فى عادية وفى سخان تحب اجيبلك اى
الوجه العابس ..سخان . . من الزرقة دى .. ايوة اللون الغامق
صاحب الكشك.. اتفضل
الوجه العابس يمشى
صاحب الكشك ..يا استاذ يا كابتن
الوجه العابس ينظر فى زهول
صاحب الكشك .. بقيت العشرين جنيه
المنظر الثانى
الوجه العابس .. يقف امام النيل
الوجه العابس يخرج سيجارة ويضعها في فمه ويخرج الولاعة السخان
الوجه العابس يشعل الولاعة ثم يطفئها دون ان يشعل السيجارة
وقبل مايولع السيجارة كدة هنعمل تعديل صغير بدل الوجه العابس هنقول ميدو
يلا بقه نرجع لميدو
ميدو يشعل الولاعة ولكنه يطفيها دون ان يشعل السيجارة
ميدو والسيجارة المطفية فى فمه .. يتذكر ذلك المشهد
امه تمسك يده ..وتقوله ميدو ماتشربش سجاير تانى علشان خاطرى .. .. ثم تفارق الحياة بعد ساعة من هذه الكلمات
هذا المشهد فات عليه حوالى سنتين و7 شهور وميدو من ساعتها لم يشرب سجاير ...



ميدو كان بيشرب سجاير بقاله خمس تشهر لكن امه ماتعرفش
امه عرفت من ام بهاء
ميدو بيكره ام بهاء ..ميدو الان يضم يده جامد نفسه يضرب ام بهاء
وبهاء وكل عائلة بهاء
ميدو يمسك السيجارة بين اصابعه دون ان تشتعل ويسند علي صور كورنيش النيل
ميدو حوليه بنات وولاد جم علشان يحبوا بعض عند النيل
لكن ميدو جي للنيل علشان يقوله كل اسراره
والنيل تعب من كتر هموم ميدو ودلوقتى بقى استنوا علشان ميدوا هيقولى اسراره ..ميدو بيندهلى .. ويقول .. فاكرنى يانيل ولا نسيتنى ..يا نـيل
ميدو بيحكيلي .. ان هو واخته مابيكلموش بعض بقالهم 4 ايام
اخته ..ميدو بيجهزها علشان على وش جواز ..هو الكبير دلوقتى
ميدو عاوز يكلمها ويصالحها ويخدها فى حضنه ..لكنه زعقلها بصوت عالى..لغاية ما بكت
اصل ميدو مخنوق .. مسجون جوه شغل بيروح الصبح بدري ويدخل المعتقل
قصدى المصنع .. مايخرجش منه الا بالليل..يتعشى وينام وسعات بينام من غير عشى ..علشان مبيجلوش نفس ياكل
ميدو كان نفسه يشتغل فى وظيفة بالشهادة بتاعته ..
الوظايف كتير بس ميدو معندوش وسطة ..
ميدو بيرفع عينه لسما .. انا سمعه بيقول
انا عارف ان الوصية الوحيدة اللى امى وصتنى بيها
انى مشربش سجاير .. بس اعمل اى يا رب انا مخنوق
مخنوق من الشغل ومن زعلى مع اختى ..وو.. ميدو نزلت من عينه دمعة
..عاوز اشرب سجاير علشان تطلعنى من الخنقة دى .. ميدو مسح الدمعة لكن الحزن باين فى عيونه ووجه العابس
.. فى صوت غريب .. ده تليفون ميدو .
الحمد لله ان التليفون رن يحسن كنت خلاص هدمع ويحصل فيضان
. ميدو طلع من جيبه عدة اريكسون من العدد القديمة ...ميدو كان كل مايشوف العدة دي يحلم انه يرميها فى اقرب صفيحة زبالة ويجيب عدة N90....لكن دلوقتى نسى الحلم ده .. كل حلمه اخته تتجهز ووظيفة حلوة
ميدو بيبص فى التليفون .. ده الواد عليوة
عليوة ده بقى ميدو مصاحبه بقاله كدة سنة و 8 شهور ميدو صاحبه علشان لقاه أقلع عن التدخين .. وقال فى نفسه هو ده اللى هيساعدنى علشان اقلع عن التدخين
ميدو .. اي بس اللى خلاك تتصل دلوقتى وانا هشرب السيجارة
ميدو يفتح التليفون ..الو اى يا علوة عامل اى
علوة .. الحمد لله .. انت فين كدة
ميدو .. انا عند كورنيش النيل كدة
علوة .. مع مين ياض .. بتمشى مع مزز من ورايا
ميدو .. مزز..انا لوحدى والله يا علوة
علوة .. عليا انا .. المهم انا كنت معدى من قدام بيتك وعارف ان النهاردة اجازتك
وقولت لما اتصل بيك كنت عاوز اعزمك علي حاجة ساقعة بس مالكش نصيب ..الحمد لله وفرت
ميدو .. فعلا مليش نصيب
علوة .. انت مالك ياعم من صوتك كدة باين عليك مخنوق
ميدو .. مفيش ياعلوة
علوة .. ياعم انت بس قول يارب وهو هيساعدك ويطلعك من الخنقة اللى انت فيها
علوة .. خلاص بقه لما توصل المنطقة ابقى رن عليا
ميدو .. ماشى ياصاحبى سلام .. تيت تيت ..
ميدو ..حط السيجارة تانى على بقه وولع الولاعة
ميدو بيولع السيجارة ..لكن فجأة افتكر كلام علوة
السيجارة وقعت من فمه .
قول يارب وهو هيساعدك ويطلعك من الخنقة اللى انت فيها
ميدو رفع عينه للسما ..معقول كنت بقول لربنا محتاج حاجة تساعدنى
وهو اللى بإيده يساعدنى ..
يارب ساعدنى ..
ميدو يرمى الولاعة فى النيل ..ويمشى خطوتين
ويرجع تانى ..يطلع علبة السجاير الروزمن ويرميها فى النيل
المنظر الاخير
ميدو طالع على السلم ..
ميدو شفايفه ما بتتحركش لكن لسانه بيتحرك ويقول لا اله الا الله
بيقولها من ساعة ما مشى من عند كورنيش النيل
ميدو قلبه اطمن شوية ..الابذكر الله تطمئن القلوب
ومن علامات الايمان ان الانسان يكون مطمن
ميدو خبط اخته فتحت ... نفسه يقولها ماتزعليش منى لكنه ساكت
ميدو دخل علي الاوضه بتاعته .. دخل بذلك الوجه العابس
خطوات تقترب من ميدو
ميدو ينظر .. إذ بوجه مبتسم يقترب منه ويقوله
(اى ياعم مالك اى بس اللى مزعلك منى )
ميدو يبتسم ..وقلبه يقول الحمد لله .

انتهت...

اقرأ ايضاً..stop Drugs.change your Life

اوقف المخدرات وغير حياتك 2قصة

1..دعونى انسان..........تتحدث عن التيمول

2..فى الليل والنهار...... تتحدث عن الحشيش

من هنا



.....




9 الناس الى بتكتب فى الكشكول:

مفكر يقول...

السلام عليكم::

أسعدني مرورك على مدونتي المتواضعة،،نأتمنى اشوفك تاني،،

بالنسبة للموضوع:: فأنا قرأت بعض السطور المتقطعة،،،طبعاً دة مش كفاية إني أحكم على الموضوع،،،

بس إن شاء الله لية عودة مع مواضيعك الجديدة

دمت بكل خير

غير معرف يقول...

ازيك يا ولى انت الله ينور عليك انت بجد لاعيب واتمنى انك تكتب شوية شعر



اسامه ابو كربببببببببببببببببببم

غير معرف يقول...

معلش انا هعلق سيادتك على نقطة واحدة ماله السونى اريكسون انا عدتى كده وزى الفل

غير معرف يقول...

يا وليد يا ريل تفتح اوكى

اسامه ابوووووووووووووووو كريم

حفيدة عرابى يقول...

يابنى انت فين وفين الكشكول

well يقول...

مفكر شكرا لمرورك واتمنى عودتك مرة اخرى

well يقول...

اسامة ... هو انت ليه مبتكتبش الردود من خلال استخدامك اسمك اللى فى مدونة الشعر بتاعتك .... عموما نورت الصفحة ..وانا موجود وفاتح ومستنيك تفتح

well يقول...

استاذتنا ..لقد خلقنا الله احرار.. سونى اريكسون تليفون 100/100 بس انا سعيتها كان جى فى مخيلة عينى تليفون سونى اريكسون قديم بس معرفش الرقم بتاعه ... انا بعترف ان انا مقدرتش اوضح ..غلطة مطبعية يا استاذة ..
وانا موجود والكشكول كمان موجود ومنور بوجودك

well يقول...

انت تسأل والكمبيوتر يجيب
شكرا ان الاذاعة الرئيسية لمصر ..اذاعة البرنامج العام ..شكرا لانها افتكرتنا ...مكنتش اعرف انى مهم كدة ...