RSS Feed

عاوز تقول اى

اتكلم ..هى مجموعة قصصية ..اتمنى ان تعجبكم

1-برنامج عاوز تقول اى

اهلا بيكم فى برنامجكم المفضل ..عاوز تقول اى

معاكوا على الهوا ولمدة ساعة ..استاذ ممدوح بتاع الاذاعة

ازيكم عاملين اى ..زى ما اتعودنا كل مرة ..اتصلوا وقولنا اى اللى انتوا نفسكوا تقولوا

وافتكروا قبل ما تتكلموا ان الحياة جميلة ومصر بخير والدنيا حلوة

وناخد احلى تلفون من احلى ناس ونقول

@الو

#الو

@ايوة

#سامعنى يا استاذ ممدوح

@ايوة سامعك..والناس عاوزة تسمعك ..اتكلم احكى ..عاوز تقول اى

#يا استاذ ممدوح ..انا اسمى وحيد ساكن فى امبابة ..تحديداً تحديداً يعنى فى شارع سميرة العايمة

تحديدا يعنى فى بيت رقم 7 الدور التالت من غير الارضى ورقم تلفونى 0128762.

@بس .. هو اى ده دا انت ناقص تبعتلنا صورتك

#يا استاذ ممدوح مش انت اللى قولت قول اللى انت عايزه

@ايوة انا قولت كدة ..بس مقولتش عرفنا بنفسك وبالتفصيل

#يا استاذ ممدوح ماهو انا كنت عاوز اتكلم عن نفسى اللى محبوسة جوايا اللى محدش بيحب يسمع عنها حاجة يا استاذ ممدوح ..انا..انا..انا نفسى اتكلم عنى ..نفسى الناس تعرفنى ومبقاش وحيد.

@يااااااا..اى ده ...انا بصراحة مش عارف ده حزن ولا كئابة

وبعدين اى يا عم 012 دى يا ابنى الناس كلها دلوقتى غيرت اتصالات ..اتقدموا بقى

شكرا يا وحيد على اتصالك ...ودلوقتى بعد ما وحيد عكنن علينا . انا كمان هعكنن عليكوا أكتر ونسمع مع بعض أغنية حمادة هلال(ديما دموع) برعاية اتصالات 19 قرش للدقيقة لاى شبكة فى مصر

........

ورجعنا تانى ومعاكوا على الهوا ولمدة ساعة استاذ ممدوح بتاع الاذاعة ..

بصراحة فى ناس كتير بتتصل ..لكن واحد بس هو اللى هيتكلم

ناخد مين..ناخد مين يا ممدوح يا بتاع الاذاعة ..اممممممممممم ..انتى ..ايوة انتى اتفضلى

# انـا

@ايوة بقالى ساعة بقولك انتى

#ازيك يا استاذ ممدوح انا سارة

@كويس الحمد لله .اهلا يا سارة يا ترى يا سارة عاوزة تقولى اى

# انا عاوزة أقوله يسامحنى .

@ هو ده بس اللى انتى عاوزة تقوليه

# ايوة ..ونفسى كلامى يوصله

@ طب هو انتى عاوزه يسامحك على اى

# انا عاوزاه يسامحنى علشان انا بحب ماكدونالدز وبحبه هو كمان فى نفس الوقت

@ طب هو أكيد سامعنا دلوقتى وانا بقوله يا ريت تسامحها وعلى فكرة هى انسانة كويسة علشان اعترفت بالحقيقة ومش اى حد دلوقتى بيقول الحقيقة ..اللى بيقول الحقيقة فى الزمن ده هو بس الانسان المغفل ...وعشان هى مغفلة لازم كلنا نسامحها

واسيبكوا دلوقتى مع اغنية ايهاب توفيق (تترجى فيا تبكى عليا ممش ممكن يوم اقدر اسامح) برعاية ماكدونالدز انا احبه براب با با ...

..............

ورجعنا تانى ومعاكوا على الهوا ولمدة ساعة استاذ ممدوح بتاع الاذاعة

جوه كل واحد منا كلام ..عاوز يقوله ..عايز الناس تسمعه ..قولنا انت عاوز تقول اى

ناخد اتصال ونقول الو.

...

@الو

...

...

معلش الاتصال اتقطع باين عليه مكنش رايق

من فضلك اشرب شاى ليبتون وحاول الاتصال فى وقت لاحق وياريت لو تسمع اغنية قول الو برعاية ليبتون

معانا اتصال تانى ونقول الو

# الو..ازيك يا استاذ ممدوحاتى

@ممدوحاتى

#ههههههـ..ما هو انا بحب ادلعك

@طيب اتفضل عاوز تقول اى يا استاذ متلفناتى

# ههههههـ حلوة متلفناتى دى يا استاذ ممدوحاتى

هى يعنى اى متلفناتى دى ..اوعى تكون شتيمة

@ لا يا سيدى دى مش شتيمة ..ده بما ان انت متلفن عليا وفى عملية تلفنة بنا فنتيجة التلفنة دى انا سميتك متلفناتى

#يا سيدى متلفناتى متلفناتى انا ما بيهمنيش حاجة

وعشان انا ما بيهمنيش حاجة ومبخفش من حاجة انا عاوز اقول للعيال بتاعت القاهرة اللى فاكرة نفسها ان هى رقم واحد فى مصر لا ..والف لأ هما مش رقم واحد ..وعاوز اقولهم ان العيال بتاعت اسكندرية هى رقم واحد فى مصر من ايام ما اليونان كانوا عاملنها عاصمة

وبما انه شغل عيال بعيال فأنا بقولهم مش عاوزين غلط لأن انتوا مسيركوا هتيجوا هتيجوا علشان تصيفوا عندنا فى اسكندرية ..وشكرا يا استاذ ممدوحاتى

@ العفو يااا عيل

بالذمة ده اسمه كلام ..اى الفرق بين النادى بتاع نادى عيال القاهرة ونادى عيال اسكندرية ..الاتنين واحد .

ليه بقى نقول ان ده رقم واحد وده رقم اتنين ....ما انا عاوز افهم

لو الوضع استمر اكتر من كدة ممكن تحصل حرب اهلية

ومش بعيد شواطئ اسكندرية تغرق شوارع القاهرة

ومش بعيد برضوا فيضان النيل يغرق مكتبة الاسكندرية
...ليه نوصلها لكدة

ارجو من مجلس الشعب ونادى 6 أكتوبر ومدرسة بلال الابتدائى لغات ..ان هما يهتموا بالمسألة دى وشكــراً

وبما ان دخل فيها مجلس الشعب نسمع شرين ومشربتش من نيلها برعاية شركة (الوطنى)لإلحاق العماله المصريه للعمل في الخارج

........

ورجعنا تانى علشان احنا حلال والحلال بيرجع ..شكرا على الوقت الجميل اللى قضناه مع بعض وبشكر كل اللى اتصل بيا وانا اسف انى مقولتش الرسايل اللى جاتلى على الاميل علشان وقت البرنامج خلص لكنى هقولها بكرة الساعة تلاتة مساءاً فى الاعادة ..وتصبحوا على خير احلام سعيدة واسيبكوا مع محمد منير واغنية قبل ما تحلم فوق برعاية برنامجكم المفضل عاوز تقول اى



27 الناس الى بتكتب فى الكشكول:

اسامه الى ان يستدل له على عنوان على البلوجر يقول...

هههههههههههههههه جامده جدا ميه ميه حلوه اوى يا ويل
والحقيقه بانت عليك موهبة المذيع
نصيحه روح قدم فى الاذاعه
ان شاء الله الحد هبعتلك حاجاتى خليك فاتح
سلام موقت

منــار فايد يقول...

سعيده جدا بالتجول في مدونتك
عاجبني اوي الحوار اللي انت عامله
انت بتتريقا على اسامه منير ولا ايه
والله شكلك كدا.....
ولا ده برنامج مايطلبه المستمعون وسلام من ابله تهاني الى نوجا.........
ههههههههههههه
يارب تكون وصلت


لي عوده لاحقا


منااااااااااااااار فايد

mimi يقول...

استاذ اسامة منير

مكنتش اعرف ان حضرتك عامل مدونة ... وكمان مستخفي في أسم ويل ؟؟

ويل يا ويل ...

اظهر وبان عليك الأمان

" أنا في الأول قريتها مين عاوز يقول أي للتوجع ..."

تحياتي ...

بجد دماغ

well يقول...

اسامه الى ان يستدل له على عنوان على البلوجر
مذيع مذيع يا عم بس يقبلونى
النهاردة الحد ..قبل ما تبعت الحاجة اتصل

well يقول...

شباك موارب..نورتى المدونة يا منار
على فكرة انا مش بتريق على اسامة منير
بس بينى وبينك حاسس ان روحه بتحلق فى المكان
واكيد نوجا سمعانا دلوقتى واحنا كمان بنهدى سلامنا الى نوجا وبنهدلها اغنية (ومن الشباك لارميلك حالى ) برعاية شباك موارب

well يقول...

mimi ..انا ابتديت فعلا احس ان انا اسامة منير
اهلا بيكم ومعاكم على الهو اسامة منير ..وناخد اتصال ونقول الو
mimi نورتى المدونة.. ونورتى انا والنجوم وهواك وبنهديلك اغنية (انا مش انا انا واحد تانى غير اللى عرفتوه زمان)برعاية fm

اسامه الهندى يقول...

انا فاتح الميل


اسامه

osama44 اسامه 44 يقول...

اشكرك يا ويل على تعبك معايا اسامه استدل على عنوان البلوجر

حفيدة عرابى يقول...

لا عسل بجد
بس ياعم احسن لك تقولها فى سرك

well يقول...

اسامه استدل على عنوان البلوجر
اللهم لك الحمد مبروك يا اسامة

well يقول...

لقد خلقنا الله احرار
نورتى الاذاعة
وبعدين هى اى اللى اقولها فى سرى
ما علينا بما انك شرفتينا بعد غياب بنهديلك اغنية عمرو دياب (حمدالله على السلامة) برعاية كتاب التاريخ

عطش الصبار يقول...

حلو قوى البوست ده
انت مذيع ناجح واللهى خايفه لتكون مذيع متخفى بس بصراحه مذيع قلبك كبير ياسلام بتطلب من كل واحد عايز يقول اى يتصل ياترى كام مليون عاوزين يقولوا اى وكام مليون هتكسبهم شركه الاتصالات
البرنامج الجاى خلى جنبك كام دكتور عشان يشخصوا نوع الاه اللى بيقولها المستمعون لان فيه اى واحدراح زياره للقسم والخبر طبطب على؟ فقال اى
عموما اسباب الاى كتير
تحياتى

النسر المهاجر يقول...

البرنامج جميل وممكن نعمله مكان ايدنى عقلك بس انت الى هتتحمل حرية الراى التى نعيشها هذه الايام وبصراحة المدونة عملاقة

غير معرف يقول...

بجد تحفه
ياريت تبعتهالنا على مجله رؤيتنا
ابعته على مجله رؤيتنا وهناك هتلاقى طريقه اضافه مشاركه
ربنا يعزك ويباركلك يارب
وطبعا اكتب اسمك الحقيقى او المستعار واسم مدونتك
نتمنى قلمك الصادق يشاركنا المجله
جيجي
عالم جيجي الصغير

well يقول...

عطش الصبار ..
على فكرة ..التشخيص اللى انتى اتكلمتى عليه فكرة حلوة
استعدى بقه للحلقة الجاية علشان هيكون فى تشخيص ...

well يقول...

المهاجر ..

انت جبت من الاخر ...الفكرة الاساسية وهى حرية الرأى
تحياتى لك وشكرا على كلامك الجميل فى حق المدونة

well يقول...

شكرا يا جيجى على كلماتك الجميلة
وجارى البحث عن مجله رؤيتنا

حفيدة عرابى يقول...

ممكن يا ويل اطلب منك طلب بايخ
موافق؟
طيب ماشى
انا كبرت فى دماغى احط فى المدونة الاختراع ده اللى بيبين مين من جمهورى العريض زار المدونة
ومش عارفة ابدا
بيقولى حسب مافهمت ماعنديش روابط مع مدونات اصدقائى
بالله عليك ياشيخ تسألى صحابك وترد عليا
الانى عبقرية جدا فى الكمبيوتر وطوب الارض حط الاختراع ده وانا صعبان على نفسى اوى انى فاشلة كده
شكرا مقدما

وحي القلم يقول...

السلام عليكم
كان معكم ع الهوا الاستاذ ممدوح بتاع الاذاعة ودلوقتي معاكم الاستاذ احمد قريب ممدوح بتاع الاذاعة
النهاردة هنتكلم عن موضوع بيهم كل الشباب الموضوع هنعرفه بعد ما نسمع احمد عدوية والسح الدح امبوا



حلوة الاذاعة بتاعتك دي أنا قدمت لك برنامج بعد البرنامج بتاعك عشان تبقى اذاعة جامدة ومليانه برامج لا تقولي Fm ولا محطة مصر بتاعة اسامة منير
يلام ياكبييييييييييييير
تقبل مروري

safsaf يقول...

صعب اتكلم او اعبر ما اقدرش الا اقول الله اكبر موهوب واحساسك فى القلوب

safsaf يقول...

خيال واسع منقطع النظير لانسان محب ومخلص لقلمه عشان ده حته منو وما يقدرش يستغنى عنو هو ويل والاسم وليد وانت انسان قوى وصلب وشديد بتستحمل كل مصايب الدنيا وبتبدى من جديد وهو ده بطل الحكايه اللى بتسرد روايات لو نحكى حكايتو نملى منها دواوين ومين بتشكبلو همك مين غير ورقتك اللى بتفضفضلها اتمنالك خطوه كمان للامام ولا تتعثر مع اى كبوه فى اى زمان

well يقول...

لقد خلقنا الله احرار
زى ما انتى قولتى الواحد عبقرى فى الكمبيوتر بس ميعرفش حاجة فى المدونة بس جارى البحث ان شاء الله ...وعلى تواصل

well يقول...

مصعب صلاح ..
شكرا على برنامجك الجميل اللى كمل صورة الاذاعة
وبما ان انت قريب استاذ ممدوح بتاع الاذاعة فيبخت من كان المدير خاله
ونورت الاذاعة

well يقول...

safsaf ...
من كل قلبى شكرا على كلماتك الجميلة

أحمد مصطفى درويش .............. دروى يقول...

رائعة
رائعة
رائعة

well يقول...

اديب درويش ...
بجد مرورك هو اللى رائع
وشكرا على كلماتك الجميلة

غير معرف يقول...

~................................