RSS Feed

ممكن بقى تفوق شوية

ممكن بقى تفوق شوية

ممكن تفوق للقضية

ممكن تبطل رقص راب

ممكن تطفى الاغنية

ركز معايا ولو دقايق

ركز هقولك علـ الحقايق

ركز كدة وخليك فايق

ارضك خدوها من بين ايديك

ارضك خدوها قدام عنيك

ارضك..يعنى عرضك

يعنى وطنك

يعنى معنى الرجولة فيك

ارضك خدوها وانت ساكت

مقطوع لسانك ولا الرجولة ماتت

حرك شعورك رجع بلادك

وشيل سلاح وبندقية

ممكن بقى تفوق شوية



29 الناس الى بتكتب فى الكشكول:

شاب فقرى يقول...

السلام عليكم أخى الباشمهندس well

ما شاء الله

كلامك منسق وموضوع واضح وهام

ترى الناس فى غفله عن المصيبة الكبرى

حاولت فى مرة أفكر فى اللى بيحصل حوالينا

تعرف إستنتجت إيه ؟؟؟

إن كل واحد فى مصر واخد المخدر

شارب مخدر قوى

فى ناس المخدر بتاعها هوا الجرى ورا الأكل والشرب
فى ناس المخدر بتاعها هوا المخدرات والسجاير
فى ناس تانية المخدر بتاعها هوا الكورة والأجوان
وناس تانية المخدر بتاعها هوا المزيكا والأغانى والموبايلات وال sms
وناس تانية المخدر بتاعها هوا النت

صراحة لما صنفت نفسى مدمن لأنهى مخدر
بجد إتكسفت من روحى وغيرت موقفى بشكل فورى :)
لانى فعلا
عندك حق

ممكن تبطل رقص راب

ممكن تطفى الاغنية

ارضك خدوها من بين ايديك

ارضك خدوها قدام عنيك

ارضك..يعنى عرضك

يعنى وطنك

يعنى معنى الرجولة فيك

كلامك أثر فيه كتير جدا

لأنى صراحة بسمع راب
بس بسمع راب بيحترم القضية وبيخدم المجتمع مش بيهد فيه ومش برقص ولا بقلد الغرب
بسمع بس اللى بيتكلم وبينادى بقضية
بيتناقش وبيتفاهم وبيحاول يرفع شعار الوطن فوق الجميع
الأرض هى الروح
مثال : مودى راب

تحياتى أخى العزيز well
وتأكد من متابعتى لمدونتك

شاب فقرى

لقد خلقنا الله احرارا يقول...

والله ماليش خالص فى رقص الراب
وبطلت اسمع اغانى
بس برده مش فايقة000
جميل جدا جدا بس ياريت نفوق
اقولك على حاجة عبيطة كده
احنا مش فايقين من اول كامب ديفيد
وتسعة وتسعين فى المية من اوراق اللعبة فى ايد امريكا
والعودة لحدود ماقبل 5 يونيه 1967
وبالسلام احنا بدينا بالسلام
لو رجعنا نغنى ونخلى العيال يغنوا فدائى واصبح عندى الان بندقية
يمكن يمكن نفوق
يارب

well يقول...

شاب فقرى ...
وعليكم السلام ورحمة الله وبركاته
شكرا على كلمة باشمهندس بجد ابتسمت لما قريتها ..
فعلا الناس متخدرة بس مش عارف هتفوق امتى ..على فكرة انا كمان واخد مخدر ..
وكويس ان فى فرق راب بتستخدم الفن علشان تعبر عن القضية ..
الارض هى الروح...
شكرا على تعليقك الجميل بجد اسعدنى شكرا اخى شاب فقرى

well يقول...

لقد خلقنا الله لحرار...
سيبك من الراب والاغانى وزاكرى
تعرفى كام مستشار قدم استقالته للسادات قبل الاتفاقية دى ..باين عليه كان متخدر
وفدائى فدائى فدائى ..اهدى العروبة دمائى ...بس العروبة تفوق

osama44 اسامه 44 يقول...

ويل
هو ده الكلام كان فين من زمان
بجد روعه وحلوه اوى
عندك حق لازم نفوق
اللهم ازل غفلتنا
ميه
ميه
الله يتور عليك

بيطرية ومش بايدى يقول...

التعليق السادس
ترتيبى دائما
مش موشكل خالص
اولا السلام عليكم
ثانيا:كلامك جميل جدا
والله محتاجين نفوق اوى ده احنا فى غيبوبة اشاسا انا بقى لا بسمع راب ولا اغانى بطلتها من فترة قولت لازم اتعالج يعنى وكده


بجد البوست تحفة
تقبل مرورى ف اول زيارة ودى كانت بسبب شاب فقرى هو اللى دلنى على الطريق
دمت فى حفظ الله ورعايته

ضكتور جدا يقول...

السلام عليكم يا بشمهندس
يارب نفوق كلنا كبير وصغير
فعلا الموضوع مش مستحمل
..الله المستعان
.....................سعدت بزيارتكم لمدونتي

norahaty يقول...

كلام بيوجع
الفعل بيوجع
أكتــــــــــــر

norahaty يقول...

لى فقط ملاحظة:
هو خطأ فى كتابة
كلمة تفوق اللى هو
عنوان الـــتدوينة.
فأرجو المعذرة.

well يقول...

اسامة ..
من بعض ما عندكم
شكرا على تعليقك الجميل
وابقى اسئل يا ابنى ..

well يقول...

بيطرية ومش بإيدى ...
وعليكم السلام ورحمة الله
يا ويلكم يا ويلكم يا مليون ويلكم مش مهم ان تعليقك هو السادس المهم ان انتى نورتى الصفحة كويس ان انتى ولا بتسمعى راب ولا اغانى ..عقبالى كدة
ومن موقعى هذا اشكر شاب فقرى واشكرك على تعليقك اللى بجد اسعدنى ...تحياتى

well يقول...

دكتور (جدا).....
شوف احنا لقينا السبب اللى يخلينا نفوق لكن السؤال اللى المفروض نسئله هنفوق امتى...تحياتى

well يقول...

norahaty ...
الفعل بيوجع لكن بعد كدة هنرتاح ان شاء الله
انا بجد بشكرك انك اخدتى بالك ان فيه خطأ املائى فى العنوان ..انا مش عارف ازاى مكنتش واخد بالى منه ..شكرا

د/عرفه يقول...

انا اول مرة أزور المدونة هنا

والظاهر انها جميلة فعلا

كلماتك جميلة


وربنا يصلح حالنا ان شاء الله

فلسطينية الهوى يقول...

كنت بقرأ قريب مقالة لداعية عايش في أمريكا

قال جملة عجبتني اوي

ان اللي مبيتحركش عشان دم واحد مسلم

وهو في حرمته أعظم عند الله من حرمة الكعبة

مش هيتحرك عشان هدم حجارة الاقصى حتى لو كانت أقدس حجارة على وجه الارض

آيوشة يقول...

كلماتها جميلة جدا تسلم ايديك على فكرة هى نفسها تنفع تتغنى راب :)
ربنا يصلح ويهدى احوال الشباب يارب بقى فعلا كل حياته مغنى الفلانى والممثل العلانى او مكتئب زى حالاتى كده فى اغلب اوقاته وبرضو مش فايق :)

well يقول...

د.عرفة ..
بجد انا سعيد بتعليقك الجميل واتمنى انها منكنش الزيارة الاخيرة ...تقبل تحياتى

well يقول...

فلسطنية الهوى ..
عارفة انا اكتشفت ان كل واحد نفسه يتحرك لكن كل واحد برضوا بيقول ..يعنى هى جات عليا انا ..
شكرا على تعليقك..تحياتى

well يقول...

آيوشة ...
انا معاكى انها تنفع تتغنى راب ..
لكن بجد محتاين معنى لحياتنا معنى يخلينا فايقين ..محتاجين هدف
شكرا على تعليقك وبجد نورتى الصفحة

عطش الصبار يقول...

المشكله يا ويل
ان الناس هى اللى مش عايزه تفوق زى ما قال المدون شاب فقرى المحدر بانواعه
وانا باضيف اليأس والاحباط
مافيش حلم قومى الناس تحلم بيه ويجمعهم
بيقولوا الناس ملهيه فى لقمه العيش امال الناس تعمل ايه طيب ماهو ده الهدف ان الناس تتلهى فى لقمه العيش عشان تبطل تفكر وتشوف اللى بيحصل حواليهاوتفوق ولما يفوق هيعمل ايه

جارة القمر يقول...

ويل ياويل

أنا جيييييييييييت

يارب تكون بخير


وحشني مكاني هنا

شكرا لسؤالك عني

آه وكفى يقول...

جمييييييييييلة
انا اول مرة اجي هنا بس بجد كلامك رائع وفكرتها
نفسي والله يابني يبطلوا فرجة على ستار اكاديمي المستفز و الرقص على الراب اللي ملوش اي لزمة ولا معنى وكلو صداع وبس نفسي الائي واحد في ثانوية عامة عارف هو عايز ايه غير انو يجيب مجموع

حاجة تقرف

well يقول...

عطش الصبار ...
عارفة من مدة كدة لما الناس بدأت تفوق راحوا قالوا ان بقى فيه محافظات جديدة زى محافظة حلوان و6 اكتوبر وده كله علشان الناس تتلهى فى الكلام عنهم ..دلوقتى كمان فى مخدر انا نفسى خد منه وهو كاس العالم للشباب ...معلش بقى مسيرنا نفوق ماهو مفيش حد بيفضل على حاله ..وعشان ربنا يساعدنا على التغير لازم الاول نغير ما بأنفسنا
....شكرا على تعليقك .

well يقول...

جارة القمر ..
يا ويلكم يا ويلكم نورتى الصفحة والكشكول والشاشة ..والله الشاشة منورة
...حمدالله على السلامة

well يقول...

اه وكفى ..
عارف مشكلة ناس كتير اوى انها مش عارفة هى عاوزة اى مش عارفة المعنى الحقيقى ..لكن لو عرفت حجات كتير هتتغير .
تحياتى وشكرا على تعليقك

mimi يقول...

ويل

حلوة الكلمات

والأحلي المعني

يارب ... نفوق شوية

well يقول...

mimi..
وجودك هنا هو اللى احلى
..تحياتى

GiGi world يقول...

لا تعليق
انا مابقتش عارفه احنا فايقين وماعندناش دم من كنر المشاكل
ولا حان اصلا فى غيبوبه الدنيا بتنهار حوالينا واحنا مش حاسين

well يقول...

جى جى ..
نورتى المدونة ...ربنا يصلح حال امة محمد (عليه الصلاة والسلام )