RSS Feed

شباك.. بين السما والارض

ديمًا بيكون مكانى علـ الشباك بين السما والارض ..
الشباك اللى بياخد خيالى للسما وسعات يرمينى علـ الارض وسط الواقع بين وشوش الناس اللى بتضحك واللى حزينة .
الشباك سعات بيكون لغة حب ياما سمع كلام عنينا وياما سمع اسرارنا اللى اتقالت بصوت مكتوم وعشان فيه بنا وبينه حنين سكت وكتم السر.
ديما بسأل هما ليه قالوا عليه شباك ..
مع انه مفهوش شبك ومش أداة للصيد ..يمكن علشان قدر يشبك قلوب ببعض ..
اصله كان شاهد على حب وصداقة وجيرة قبل ما يكون فى حاجة اسمها تليفون وموبنيل واتصالات وفودافون كان موجود الشباك علشان الناس تتواصل مع بعض قبل حتى ما يكون فيه انترنت
ممكن بيت ما تلاقيش فيه بلكونه لكن مستحيل انك ما تلاقيش فيه شباك .. اصله لو من غير شباك . . . هيكون سجن
الشباك هو طعم الحرية فى قلب مصر المحروسة واللى كمان ضاعت من الحراس ...


مع انه حجمه اصغر من البلكونة لكن ناس كتير حبت الشباك وناس كتير غنت للشباك ..وقالوا ..ومن الشباك لارميلك حالى ..وناس غنت من حبى فيك يا جارى وقالوا ..وحياة حبك ما شبكنا غير شبكوا وشبكنا ..

الشباك هو لغة التواصل مع الناس ومع كائنات اخرى جميعها أتت من الشباك...

الناس بتفتح الشباك فى عز الحر علشان تدخل نسمة هوا
حتى فى عز المطر بيفتحوا الشباك ..اصل المطر خير ..لعل الخير يجى من الشباك
الشباك صديق البيئة ..ديما بيطرد ثانى اوكسيد الكربون علشان يدخلنا الاكسجين ... علشان خايف علينا وعايزنا نعيش وناكل عيش

هو مين اللى بيتغير احنا ولا الشباك ..

كل ما بنكبر بنشوف المنظر من الشباك بطريقة مختلفة مع ان الالوان هى هى ..
سعات لما تكون فرحان تجرى على الشباك علشان تشوف كام واحد فرحان ولما تكون حزين بتجرى على الشباك علشان تشوف مين بيوسيك فى حزنك
زمان لما كنا نبص من الشباك كنا نشوف القمر ونكلمه ونشكيلوه من الحبيب..نبص للنجوم نلاقيها احلامنها وفـ يوم هنوصلها
دلوقتى بطلنا نبص على الاحلام اصل الاحلام اتغيرت مع انها كانت بعيدة كان نفسى فى يوم امسكها لكنها هربت بعيد وسط النجوم اختفت
..

وانا لسه واقف بين السما والارض ..ابص فى السما على احلامى البعيدة اللى شايفها فى اخر الطريق نجمة بتلمع ..بس بعيدة
وسعات ابص علـ الارض علـ الناس ووشوش الناس اللى عايشة على الارض الطيبة
ولسه بسأل ليه قالوا عليه شباك .. ولسه واقف بين السما والارض








54 الناس الى بتكتب فى الكشكول:

richardCatheart يقول...

يا صباح الفل الناس كانت زمان اوي بيقولو علي الشباك طاءه اعتقد انها تحولت لشباك بعد دخول صناعة المشربيات وانت عارف انها مشبكه زي المشبك وخصوصا ان اصلها في اللغة نافذه و معنها معروف علي فكره دا مجرد تخمين فكرت فيه وانا وقفة في الشباك ليا عوده ان شاء الله اكلمك عن الشباك عشت عمري في شباك كان دنيا علي فكره جمل اوي البوست و رجعني لورا كتير تسلم يا ويل ربنا يثبتك علي عهدك ان شاء الله

مصعب صلاح يقول...

السلام عليكم
شيء جميل هو التحليل للشباك بالشكل ده
حقيقي الشباك هو اللي بيخطف أحلامنا وينقلها بعيد ...
لما تكون ف انتظار حبيب بتقف ف الشباك وحتى لما تشوف الجنازة
الشباك طاءة وبتتغير بتغير عين اللي بيشوف

خواطر شابة يقول...

الشباك هو نفسه في كل الاحوال معلق دوما ومنذ البدء بين السماء والارض نحن من يتغبر ونحن من نظرتنا تختلف حسب مشاعرنا لحظة النظر منه

إمرأه من ثلج يقول...

صباح الخير

عمرى مكان عندى شباك كدة الشارع بس عندى بلكونة

بس فعلا احساسى اختلف كتير من وانا كنت صغيرة وبص على الناس كدة من بعيد كنت حاسة ان الدنيادى مفيش بعد كدة

لكن الوقت لما ببص على الناس بحس قد اية الدنيا ضيقة ومش بيدينا الى عايزنة

تحياتى لاسلوبك المبدع

الملاك الحزين يقول...

السلام عليكم
اخبارك ايه يارب تكون بخير
وارب يطمنى عليك يارب

الملاك الحزين يقول...

حضرتك أتكلمت عن الشباك بأسلوب راقى وجميل ودقيق

انا عن نفسى مش عندى بلكونه بس عندى شباك بغرفتى بحبه اوووى
ودايمآ بليل بناجى ربنا وبكلمه منه وبشوف النجوم والقمر
وبشوف الناس اللى بحبها
وبتأمل حاجات كتير اووى
وكمان التفكير مش بيحلا غير بليل وانا واقفه فيه
قد ايه ليا ذكريات مع شباك اوضتى
هيوحشنى لما اسيبه بيوم ما

ربنا يسعدك يارب ويوفقك ياقمر
وبلاش تغيب عننا كتير احنا بنحبك وبنحب نطمن عليك
تحياتى
اختك
ايناس

مرايتى يقول...

تفصيل جميل قوى للشباك ولخصت حاجات جميله كنا بنعملها بس ترجمتك ليها بالكلام يا ويل خلانا نحس بحاجات حلوه قوى وفكرتنا بحاجات أحلى

بجد تسلم إيدك

نهــــــــــار يقول...

السلام عليكم ...
أكيد نحن إلي نتغير وليس الشباك..
أحلام معتقدات وصفات
ألوان وروائح ويظل الشباك كما هو ..
ولكن نظرتنا له تختلف بإختلاف مشاعرنا..
...
دمت بخير

حفيدة عرابى يقول...

مش عارفة اقولك ايه
كلامك وفلسفتك جميلة جدا
لكن انت بتقول كل ما بنكبر بنشوف المنظر من الشباك بطريقة مختلفة
احنا اتغيرنا
والدنيا كمان اتغيرت
وعايزنا نرجع زى زمان قول للزمان ارجع يازمان
او ارجع ياشباك

well يقول...

richardCatheart..

يا صباح الانوار ..تخمين ممتاز ..
مستنيكى تانى علشان اسمع حكايتك مع الشباك
( رجعني لورا كتير)...علشان جواكى حنين
شكرا على كلماتك الجميلة

well يقول...

مصعب صلاح..

وعليكم السلام ورحمة الله ..

احلامنا بتهلاب من الشباك
بنستنى الحبيب واحنا علـ الشباك
(جنازة)...موجعة شوية

تحياتى

well يقول...

خواطر شابة ..

نحن من يتغير ..

مشاعرنا ليست ثابتة

تحياتى

well يقول...

إمرأه من ثلج...او من حنين

صباح الفل ..

الدنيا مفيش بعد كدة ...يمكن علشان الوانها كانت حلوة ..بس لسه الالوان هى هى

تحياتى

well يقول...

الملاك الحزين ....صاحبة الابتسامة

وعليكم السلام ورحمة الله ..

بخير والحمد لله

well يقول...

الملاك الحزين ..

اضافة جميلة ...اناجى ربى واتأمل وانا واقف علـ الشباك

تحياتى

well يقول...

مرايتى ..

ديما بنحن للماضى ...علشان فيه حجات حلوة

..تحياتى

well يقول...

نهار..

الشباك بيتغير لما احنا بنتغير ...لانه اصبح جزء منا ...اصل بنا وبينه حنين

تحياتى

well يقول...

حفيدة عرابى ...

ياااااا لو اقدر ارجع زمان ....كان الزمان نفسه هيتغير

احنا بنشوف المنظر بطريقة مختلفة .. لان المنظر نفسه اتغير جوانا

تحياتى

richardCatheart يقول...

صباح الخيرات واللى جاى اجمل ان شاء الله من اللى فات

شوف يا ويل الشباك عندى كان نافذه بخترق وبنفذ منها للعالم كله وشباك شبكنى بكل حبيبى واصحابى

احنا كنا ساكنين قبل مانعزل فى دور ارضى
طبعا كان زمان وجود الدور الارضى شىء عادى فى كل البيوت اتولدت لقيت الشباك
من وانا انن انن وانا قاعده على الشباك
ومدلدله رجليا وبهزها مرجحه وبتفرج على الناس واتابعهم لانى اقرب للشارع من اصحابى اللى فى البلكونات
ومكنتش بستعلم باب الشقه فى الطلوع والدخول لاء انط من الشباك انزل الشارع وانط من الشارع ادخل الشقه
ولما كبرنا ومابقاش ينفع نلعب مع اصحبنا غير فى البيت بقينا نقف كلنا بنات اللى فى شباك زيى واللى فى بلكونه
دا على مدى طول الشارع وعلى الصفين
بنات وبنتكلم وبنلعب لعبه الافلام هههههه
والله ماكان فى حد بيضايقنا ولا وهو رايح ولا وهو جاى وشابا الشارع لاننا كلنا اخوتهم وجرانهم كانو يدخلو ويسيبونا كلنا وقفين نتكلم ونلعب
كانت البيوت مش عاليه اقصى بيت 4 اداوار فاكنت ابقى فى الشباك شايفه السما واقعد بالساعات اتفرج عليها واتمتع بلونها الجميل وارقب العصافير
وطبعا الامر ماخلاش كلنا انا واخواتى
الولاد الشباك سايب فينا الاثر التاريخى وقعه من الشباك على ام الرصيف اجرى خيط التعويره هههههههه
حتى لما اتخطبت وحبيت كان الحب فوق هضبه الشباك كان ابن الجيران وكنا هارين بعض حب هو فى البلكونه اللى قصاد الشباك وهات ياحب ومشاورات وهيصه
كنت وانا صغيره اتفرج على البياعين اللى بيعدو ساعات فى الشارع واقلدهم
واكتشفت انا واصحابى انهم مابيخدوش بالهم اوى من البياعين لان شباكى كان اقرب للشارع فابقو يخدو بالهم علشان يشفونى وانا بقلدهم
للاسف البيت بقى عالى لما بنو واحنا سبنا الشباك وطلعنا فوق فى البلكونات
الشباك اتحول لباب لان اصحاب البيت قلبو محل وماتبقاش منه غير حائط وكل ما اعدى عليه وانا رايحه لماما احسس على الحيطه واقولها فكرانى فى سرى طبعا كل المعالم اتغيرت زى كل حاجه فى الزمن
لعبت فى الشباك واتشبكت باصحابى وهيصت معاهم فى الشباك وحبيت واتحبيت فى الشباك وضربت شقلبظات فى الشباك ههههههههه وسرحت ساعات فى السما من الشباك
والله كانت ايام احلى ماتكون
اه على رايك عندى حنين ونفسى الاقى اله الزمن اللى ترجعنى تانى مش علشان دلوقتى وحش لاء الحمد لله بس علشان ايام الشباك كانت احلى واصفى وعلشان ابقى اشقى مما كنت هههههههههه
دى حايتى فى الشباك ياسيدى واشكرك
على البوست الجميل اللى رجعنى كتير لفتره جميله
اسفه للاطاله تقبل مرورى

well يقول...

ريتشارد Catheart ..

بالمناسبة هى يعنى اى Catheart .
..

شكرا انك جيتى تانى زى ما قولتى ..
الشباك عندك مكنش نافذة وبس الشباك كان حياة
الشباك فى الدور الاول بيختلف كتير لانك بتكونى قريبة من الناس .. بتقدرى تخرجى وتدخلى بطرية مميزة .. وممكن كمان تعملى شقلبظات وتخديلك كام غرزة ..
كلامك اللى كاتبتيه يا ريتشاردايا المفروض يكون فى بوست لوحده اصلك اتكلمتى عن حياة انسانية بجد كلها مشاعر
(وانا رايحه لماما احسس على الحيطه واقولها فكرانى ) تحياتى لذلك الحنين

سجود يقول...

السلام عليكم
شباك شباك شباك
جيه منه شبكة موبايل وشبكة انترنت
بس ساعات بنشوف من الشباك الحزن اكتر
يمكن عشان الدنيا كلها مش فيها حاجه تفرح ويمكن عشان هي دنيا من الدنو ويمكن عشان لكل انسان مهما عمل نهايه
وانا بسال ليه برده قالوا عليه شباك؟

richardCatheart يقول...

بالمناسبة هى يعنى اى Catheart .
...
هههههههههه الله يكرمه اللى سمانى الاسم داويفتحها عليه

دى حكايه طويله يا ويل بس هو اسم غالى عاليا جدا ان شاء الله ماحايت مش هاغيره

مش فى الاساس رتشارد كان قلب الاسد
انا بقى رتشارد قلب القطه حاجه كده حريمى على رجالى هههههههههههه

والله تسلم على ذوقك ياويل وكلامك الطيب

تقبل مرورى

فكرة من الزمن ده يقول...
أزال المؤلف هذا التعليق.
فكرة من الزمن ده يقول...

الشباك
جميلة اوي ياويل فلسفتك دي
وخليت اسرح في حاجات كتير
اول شيء جا على بالي
كنت سنين دراستي كل ما امر وانا في الترام على منطقة اسمها مصطفى كامل ومنطقة اسمها السيوف
باشوف في كل منطقة شباك معين
وكل مرة لازم ابص اشوفه مفتوح ولا مقفول
واصحاب البيت خرجو الفرش يتشمس
عندهم ضيوف
طيب واقفين يتفرجو علينا واحنا بنمر من جانب بيتهم ويشربو الشاي
ارتبطت جدا مع الشباكين سنين بدون اي كلمة بيني وبين اصحابهم
ونسيت القصة
وفكرتني انت بيها ببوستك اللي كله شجن
تحياتي

ريمان يقول...

السلام عليكم

ازيك عامل ايه يا رب تكون بخير

معذره على التقصير بس بجد غصب عنى

جميل البوست ولاول مره بجد بتأمل معنى الشباك كده


وجميل اوى تحلليك وتفسيرك لمعنى الشباك

تحياتى ليك

mira يقول...

اولا البوست رائع بجد
وثانيا فكرة موضوعه اكثر روعه
وكلمه شباك تعنى منفذ لدخول او خروج شئ او حتى هروب
وممكن احلى ما فيه الهروب ..ممكن يكون هروب من او الى واحنا دايما بنهرب منه الى السماء ننظر لها ونتأملها وبننسى اللى فينا اهو على العموم الشباك بيدينا حاجات كتير
تحياتى
ميرا

well يقول...

سجود...

الشباك جه منه شبكة موبايل علشان الناس بتكلم وهى واقفة فى الشباك
لكن شبكة انترنت..انا عن نفسى ما بدخلش على الانترنت وانا على الشباك
وبعدين مين قال ان الدنيا مفهاش حاجة تفرح ...فيها اجمل حاجة ..فيها ابتسامتك
تحياتى

well يقول...

ريتشاردايا ..

هى Catheart ..تنطق كاثريت ...معلش بقه اصل اخوكى تعليم مجانى
..
تحياتى ريتشارد قلب القطة

well يقول...

فكرة من الزمن ده ...

قصة لم تكتمل ولم تبدأ بعد ..ولكنها قصة

شئ جميل اننا نهتم بالناس لو حتى مانعرفهمش ..الشباك لغة التواصل بدون كلام

تحياتى

well يقول...

ريمان الملائكية ..

حمدالله على السلامة ونورتى الكشكول والتدوين كله ...ونورتى الشباك كمان

يارب تكونى ديماً بخير

تحياتى

well يقول...

mira ..

شكرا يا ميرا على كلامك الجميل

الشباك فعلا هو محطة هروب ..لو حتى هنهرب بخيالنا مع نجمة بعيدة فى السما

نورتى الكشكول ..تحياتى

طهر فؤادك يقول...

السلام عليكم ورحمة الله وبركاتة

اذيك ياويل اخيارك اية

اسلوبك بديع ووصفك جميل جدااا وفعلا حببتنا فى الشبابيك ياويل ... بس هو فعلا موضوع شكلة كدة رمزى لحاجات كتيرة بعدت عن مفهومنا ... وربنا يوفقك اللهم امين والمسلمين ويبعد عنك كل سوءءء.

حصان المرجيحة يقول...

والله فعلا اول مرة اخد بالي من الكلمة دي
و فعلا مش عارف ليه هي اتسمت كده
يمكن علشان اول واحد عمل الفتحة دي في الحيطة كان اسمه الاسطة شباك
ههههههههههه
تحياتي
و تقبل مروري

Heba Faruq يقول...

ياااه فكرتني اني بقالي سنييييين طويلة مابصتش من الشباك..مين عنده وقت دلوقتي كمان للشباك
حتى الشباك دلوقتي مبقاش مصدر للاكسجين بالعكس بقى مصدر للتلوث وعادم السيارات ده غير الدوشة فقفله في الحالة دي احسن
الا اذا كان قصدك شباك بعيد جدا جدا عن القاهرة بتلوثها وضوضاءها

بوست اكتر من رائع
مع تحياتي

richardCatheart يقول...
أزال المؤلف هذا التعليق.
richardCatheart يقول...

ههههههههههههههههههههههههههههه
والنبى شرحو ماشوفانش الخاص غير فى الابتدائى رضا

كات هارت cat heart


وانت تقبل مرورى وكل الاحترام ياويل

well يقول...

طهر فؤادك ..

وعليكم السلام ورحمة الله

..

كويس ان قدرت احببك فى الشباك ..شكرا على كلامك الجميل وشطرا على الدعاء واللهم امين

تحياتى

well يقول...

حصان المرجيحة ...

هو عمل فتحة فى الحيطة ليه ..يمكن كان عاوز يهرب واتشبك علشان كدة سموه شباك

تحياتى ونورت الكشكول

well يقول...

هبه فاروق ..

الشباك للاسف فى قلب القاهرة فى قلب الزحمة والدوشة لكن رغم الدوشة إلا بنقدر نتواصل مع الناس من الشباك

تحياتى

well يقول...

richardCatheart ..

امممممممممممممممممممممم..

ازاى ماخدتش بالى ..
معلش اصلى عندى مشكلة مع الحروف المتشبكة

شكرا على التواصل والشرح ونورتى الكشكول والمدونة كلها
تحياتى

مصعب صلاح يقول...

السلام عليكم
بالنسبة لموضوع الكره..
أنا لا أكره الظالم ..بل أكره ظلمه فلو هو بطل ظلم هاحبه..
لكن بكره الصفة مش الشخص
-
اتمنى حضرتك تجيب ع التاج ده

norahaty يقول...

تصدق ياويــل
فعلاً الشـباك
كل الحاجات
الجميلة
اللى أنــت
قلتها دى
ممكن ماتلاقيش
بلكونة لكن لازم
تلاقى شباك فى اى بيت.

(حلـم)،، يقول...

اول مرور


الدنيا كدة كلها شبابيك



وشباكك صورة من صور



جميل ما سطرت


مودتي

قول ياااارب يقول...

جمييييييييل اوى البوست بجد وفعلا الشباك مهم اوى فى حياتنا وفعلا كل اسرارنا مع الشباك ,بس تخيل لو الشباك كان بيتكلم كنا اتفضحنا هههههههههه
بحييك ع البوست الحلو ده

طوبه فضه وطوبه دهب يقول...

عارف انه سؤال مهم اول مره اخد بالى منه ليه اسمه شباك يمكن كل اللى قلته صح ويمكن مايكنش ليه علاقه باى حاجه من دول وفعلا كلنا ممكن نبص من نفس الشباك لكن كل واحد يشوف حاجه مختلفه تماما عن غيره تسلم ايدك تفكير عميق وراى جميل

well يقول...

مصعب صلاح..
..
وعليكم السلام ورحمة الله وبركاته

مصعب الشخص عبارة عن شوية صفات مكتسبة ..يعنى لو ظلم يبقى ظالم يبقى بيجسد الظلم نفسه ...والانسان حر فى انه يحب او يكره
شكرا على التواصل
متهيئلى لسه بدرى عليا على ما اجاوب على تاج لكنى بشكرك على التقدير
تحياتى

well يقول...

نورهاتى
..
الشباك هو كل الحجات الجميلة لانه حاجة جميلة
شكرا على التواصل
تحياتى

well يقول...

حلم .. من احلامى
..
..
الدنيا كلها شباك ..شبابيك حرة وشبابيك حوليها اسلاك

اتمنى التواصل ..

تحياتى

well يقول...

قول يا رب .. يا رب

شكرا على الكلام الجميل
(تخيل لو الشباك كان بيتكلم كنا اتفضحنا هههههههههه) واضح ان اسرارك كتير اممممممم

تحياتى

well يقول...

طوبه فضه وطوبه دهب ..

ممكن فعلا يكون صح وممكن مايكنش له علاقة بالموضوع ..لكن ما يمنعش اننا نتخيل ليه قالوا عليه شباك

تحياتى

موجة يقول...

تصدق عندك حق
الشباك هو اللى بيتغير ولا احنا اللى بنكبر
انا لما كنت ببص ع الشباك وانا صغيرة كنت بحس بحاجة غير دلوقتى
خالص
مع ان المنظر هو هو
فعلا كلامك حكم
بس بوست عجبنى واحلى مافيه
انه فيه اسم مدونتى
انا زرتك اهو وسمعت الكلام

well يقول...

موجة وراها موجة

شكرا على الزيارة وكلامك الجميل ..وايوة كدة انا بحب الناس اللى بتسمع الكلام ..وان شاء الله يكون فى تواصل

تحياتى

الغاردينيا يقول...

كيف افسر حالتي و أنا أقرأ !!

احسست أني ايضا بين السماء و الأرض !

راقي بحروفك باحساسك بكلامك بوجعك بحزنك

بحبك بعواطفك كل دا محسوس ووصلني

بحييك اخي الكبير انحني لك

و عالي عالي ويارب دائما عالي

well يقول...

الغاردينيا ..

لكى منى كل احترام وتقدير وشكرا على كلماتك الجميلة

تحياتى