RSS Feed

مابحبش البطاطس ..يوميات راجل فقرى

لسه فاكر كل ليلة ساعة الغدا لما كنت اقول .. يا اما هو كل يوم بطاطس بطاطس انا خلاص بئى فأفأ من كتر اكل البطاطس انا ما بقتش احب البطاطس ..كانت تقولى حد مايحبش النعمة .
اللى فكرنى بالايام دى هو ابنى اللى عنده 8 سنين لما قام من على الاكل وقال هو كل يوم بطاطس بطاطس انا مابحبش البطاطس ..
هو ما يعرفش ان البطاطس ارخص من الفراخ واللحمة والسمك وحجات كتير كنت عاوز افهمه كدة بس اتعصبت عليه وشخط فيه وانا بقوله حد مايحبش النعمة يا ابن الـ*** ده فى اوربا وامريكا ما بيحبوش الا البطاطس
مش عارف ليه الواحد بقى فقير..
لانه افتقر.. ولا لأن كل شئ بيغلى يعنى مثلا زمان كنت بركب اتوبيس الهيئة بربع جنية ولو ركبت منى باص بنص جنيه دلوقتى اتوبيسات الهيئة بتختفى كل يوم والمنى باص غيره لونه وبقه اخضر وبقه لشركات خاصة وبقه بـ جنيه ونص وفين وفين لما بتلقيه .
زمان كان عزيز بنزيما صاحبى بيحلق دقنه بنفسه علشان يوفر اتنين جنيه ونص وكنت بقوله انا عمرى ما اعرف احلق دقنى لازم احلقها عند حلاق اى يعنى اتنين جنيه ونص
دلوقتى تملى بقول ان حلاقة الدقن قدام المرايا ده فن تشكيلى عاوز تحددها حددها عاوز تشيلها انت حر ..وكنت بكتم جوايا انى بكدة بوفر خمسة جنيه .
الحلم ديما كان بيلمع فى عيونى اخدت الشهادة لكن مقدرتش اتوظف اصلى معنديش واسطة وبيقت صنايعى او (ارزقى على باب الله ) اشتغل موسم وأأجز موسم ..ولما كنت بأجز كانت هموم الدنيا كلها بتبقى فى راسى لدرجة انى مبقدرش ارفعها لكن رغم كدة كنت برفعها للسما وانا بقول يا رب واقول لسه فى امل
اصعب شئ انك تمد ايدك لحد وتستلف منه والاصعب انك متقدرش تسد اللى عليك وتهرب من الناس ..وتعيش خايف يحسن وشك يجى فى وش حد مسلفك فلوس .
بيقولوا جاور السعيد تسعد ومن ساعة ما صاحبت عزيز بنزيما وانا ركبنى الفقر ..عزيز بنزيما هو فيلسوف الفقر لما كان يحب يخلع درسه كان يروح جامعة الازهر كلية طب الاسنان ..علشان الطلبة بيخلعولوا ببلاش .
بالمناسبة عزيز بنزيما كان محجوز الاسبوع اللى فات فى مستشفى حكومى علشان يعمل عملية لما روحت ازوره اول يوم طلعلى فلوس من جيبه وقالى ان العيال بتاعت كلية الطب كانوا بيكشفوا عليه ودفعولوا فلوس ...ولما روحت ازوره تانى يوم لقيته مخنوق ونفسه يبكى لما سألته عن السبب عرفت ان طالب من بتوع الطب صوره وهو بيكشف عليه ولما سألته ما منعتوش ليه بص ليا وبص للفلوس وسكت .ايوة سكت مقدرش يتكلم ..لانه محتاج للفلوس
مش عارف ليه كتبت الكلام ده كله يمكن لانى يا ابنى بحبك وعمرى مافكرت اخليك تقف فى طوابير العيش او طوابير الذل علشان تتعود على عزة النفس كان نفسى اقولك ان انا كمان ما بحبش البطاطس ومن شابه اباه فما ظلم ..
بس صدقنى يا ابنى لو كلتها من غير ملح مش هتحس بمرارتها وهيكون طعمها احلى ..انا مش هلومك لانى ما بحبش البطاطس .

72 الناس الى بتكتب فى الكشكول:

well يقول...

عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ : " وَاللَّهِ مَا الْفَقْرَ أَخَافُ عَلَيْكُمْ وَلَكِنْ أَخَافُ عَلَيْكُمْ أَنْ تُبْسَطَ عَلَيْكُمُ الدُّنْيَا ، كَمَا بُسِطَتْ عَلَى مَنْ كَانَ قَبْلَكُمْ ، فَتَنَافَسُوهَا كَمَا تَنَافَسُوهَا ، فَتُهْلِكَكُمْ كَمَا أَهْلَكَتْهُمْ " .

MR.PRESIDENT يقول...

والله ما أبسط واجمل اسلوبك ـ انك بحق رائع - صداق الكلمة صداق الاحساس عزيز النفس اضحكتني في البداية وهممتني في النهاية ـ ما اصعب الا يحقق اب مطلب ابنه لشعوره بصعوبة التحقيق ، وان كان يريحك شوية أنا بحب احلق شعري راسي ظلبطه عشان اوفر اجرة الحلاق فترة ومضيعش وقت قدام المراية ,,,
عندي الحل ::
ممكن تعمل بطاطس مختلفة يعني شبيسي ومهروسة وصنية وبطاطس جواها بيض كده وصدقني كل واحدة ليها طعم ,,,,, وربنا يكرمك يارب ..

(... وَلَكِنْ أَخَافُ عَلَيْكُمْ أَنْ تُبْسَطَ عَلَيْكُمُ الدُّنْيَا ، كَمَا بُسِطَتْ عَلَى مَنْ كَانَ قَبْلَكُمْ ، فَتَنَافَسُوهَا كَمَا تَنَافَسُوهَا ، فَتُهْلِكَكُمْ كَمَا أَهْلَكَتْهُمْ ) صدق رسول الله عليه وسلم

الملاك الحزين يقول...

السلام عليكم

على قد ما انبسط بقناعتك ورضاك امام ربنا ونعمته
بس زعلت على عزيز اوووى لان الحوجه وحشه اوووى

بجد بكتنى جامد اوووى

مافيش احسن من القناعة لان هى دى راحة البال ممكن يكون معانا فلوس كتير بس مش من عندنا راحة البال

كلها نعم ربنا علينا وغيرنا مش لاقيها
صدقنى احن احسن من غيرنا بكتير

والحمد لله على كل حال
وعجبنى اووى
استدلالاك بالحديث الشريف

ربنا يعزك ويكرمك

انحناء جامد لشخصك الجميل
انت اخ رائع

شذا الروح يقول...

عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ : " وَاللَّهِ مَا الْفَقْرَ أَخَافُ عَلَيْكُمْ وَلَكِنْ أَخَافُ عَلَيْكُمْ أَنْ تُبْسَطَ عَلَيْكُمُ الدُّنْيَا ، كَمَا بُسِطَتْ عَلَى مَنْ كَانَ قَبْلَكُمْ ، فَتَنَافَسُوهَا كَمَا تَنَافَسُوهَا ، فَتُهْلِكَكُمْ كَمَا أَهْلَكَتْهُمْ

************

مافيش احسن من الحديث لكلامك الجميل


يارب نفضل على راحة البال اللى دى اهم حاجه

واحنا بنعمه كبيره

وكلام ربنا خير دليل على الفقر لما اكون فقيره وراضيه عن نفسى ومرتاحه احسن لما اكون غنية ومفتريه ومش مرتاحه

ربنا يعزك يارب ويحفظك

دمت بكل الخير

خواطر شابة يقول...

تعرف دائما تحضرني كلمات أحمد زكي في دور مدرس الفلسفة في فيلم البيضة والحجر لما قال "انااذا غلا علي شئ تركته فيصبح رخيصا مهما غلا" أجدها فعلا فلسفة سنرتاح لو طبقناها على حياتنا

richardCatheart يقول...

صباح الخير ياويل

الحمد لله رب العالمين وصدق رسول الله صلى الله عليه وسلم وعلى ال بيته وصحبه اجمعين


شوف بوستك بتاع البتاطس دا وجع قلبى وفلقنى من العياط على ابنك وعليك وعلى عزيز وعلى عيالى وعلى اخواتى وعلى صحابى


فى فرق بين القناعه والانهزام طيب يبقى عندنا ابسط حياه البنى ادمين وبعدين
نرضا بيها قناعتنا باقل القليل مش قناعه لاء
حتى مايرديش ربنا

بص ياويل نظرتى للدنيا اتغيرت بعد ماشوفت فيلم القادمون
ابقى شوفه هاتلاقى فيه ردود كتير يمكن هاتتصدم فى الاول بس هاتفهم
لو ماشوفتهوش شوفه

على فكره انا كنت بحب البطاس كرهتها يا اخى
وافضل قول يارب لانه هو وحده عز وجل الحل الوحيد لينا كلنا

تقبل مرورى

مرايتى يقول...

على فكره بره بيحبوا البطاطس مش علشان رخيصه أو غاليه ببساطه لأنهم بيحبوها إنما هنا بنتأمر عليها علشان أكل الغلابه الى طبعا مافيش فى إيدهم غيرها لولادهم

بوست فى بدايته يبان هزلى وفى نهايته أكد هزلنا ( ضعفنا ) وضعف عزيز إلى إرتضى زله علشان الفلوس
بس الأهم هو الرضا لأن ياما ناس بتاكل بس برضه مش مبسوطه

الحمد لله رب العالمين على كل ما أنعم به علينا ولا إعتراض على أى من قضاءه

تسلم إيدك يا ويل

Tarkieb يقول...

صدقني يا ويل في ناس بتحب اللحمة عشان مش بتاكلها وتكره البطاطس عشان مكررة يوميا...وظالميين البطاطس معاهم.بس بجد كرهك للبطاطس عملت منه حكاية جميلة مقرمشة تقدر تقول خفيفة وجميلة ....احمد ربنا بقى ان البطاطس اثرت فيك وعملتك كاتب ويل يا ويل...اما صاحبك ده فكرني بواحد جارنا كدة كان يروح يتسنكح على الطعمجي وفي الاخر يقولك وكدة بقى وفرنا وجبة ...

موجة يقول...

اقولك حاجة
انا بحب البطاطس حد يكره النعمة
انا قبل ما اشتغل مكنتش اعرف قيمة الجنية بيجى ازاى ولازم يتصرف فى ايه
وكنت بتبطر على الاكل وسندويتشات الفول والطعمية والكشرى وكدة
لكن بعد ما اشتغلت وتعبت فى الجنية اللى بيجى عرفت بجد قيمته وعرفت ان سندوتش الفول ده نعمة واللى يكرهها يعمى
بوست جميل ومفيد
وبالنسبة لصحبك اللى فى المستشفى
الف سلامة عليه وعليك وربنا يعزكو ويحميكو يارب

مجرد انسان يقول...

على اد ما الاسلوب بسيط بس ده اللى بيميزك
بجد اسلوبك رائع جدا
وعلى فكره ممكن باه تنوع يعنى بطاطس مقليه ومشويه ومطبوخه كده باه انت ومزاجك ههههه
لك منى كل تقدير واحترام

well يقول...

MR.PRESIDENT ..

شكرا على كلماتك الجميلة ..
..ظلبطة ..دى الحلاقة المفضلة لزيدان ووائل جمعة وهنرى وغيرهم كتير ..

انا بموت فى البطاطس المهروسة ..اما السيبسى دى بقه مزاج

تحياتى

well يقول...

الملاك الحزين ..

القناعة كنز لا يفنى ..

احنا احسن من غيرنا ..يعنى لو روحتى مستشفى هتلاقى فى الدور الاول طوارئ..والتانى حريق ..والتالت ..سرطان ..والرابع مشرحة ..الحمد لله احنا احسن من غيرنا

والحمد لله على كل نعمه
وشكرا على كلامك الجميل وربنا يجعلنا ديما اخوات فى الاسلام
تحياتى

well يقول...

شذا الروح ..

ديما الاختبارات اللى بتواجه الانسان ..علشان تحدد اذا كان الانسان راضى ولا لأ ..او علشان نتعلم منها الرضا
(رضينا بالله رباً وبالاسلام ديناً وبمحمد صلى الله عليه وسلم نبياً ورسولاً)

تحياتى

well يقول...

خواطر شابة ..

انا من ساعت ما وعيت على الدنيا ومشوفتش حاجة من اللى بتغلى رخصت تانى ...يمكن الحاجة الوحيدة اللى بشوفها بترخص هى الانسان
..
تحياتى

well يقول...

richardCatheart ..

يا صباح الفل
لا لا لا جمدى قلبك لسه اللى جى كتير

انا كنت شوفتك كاتبتى اسم الفيلم ده فى تعليق عند مدونة (تقريبا كدة والله اعلم كانت مدونة مش عارفة بس نفسى اعرف ) انا روحت داخل على طول اشوف اى حكايته ..اتفرجت على الفيديو الاول ...وان شاء الله هكمل بقيت اجزاء الفيدو
كرهتى البطاطس ليه بس ..دى البطاطس شئ جميل بس من غير ملح ..وفرتى عليا العزومة
تحياتى

well يقول...

مرايتى ..
تعليقك ممتاز ..هما فعلا بيحبوا البطاطس لانهم وببساطة بيحبوها
الرضا اهم شئ وانا عن نفسى شايفه نعمة من عند الله والحمد لله على نعمة الرضا
تحياتى

well يقول...

Tarkieb ...يا صباح القرمشة

انا ما بكرهش البطاطس .. بس صدقنى بحب اكلها من غير ملح او اغمزها فى الملح لكن مااحبش ان الملح يترش عليها ..
بشكرك على كلمة (كاتب)

بالسبة لعزيز بنزيما او صحبك بتاع الطعمية ..فى ناس كتير بتشبهم ..مش عارف ليه او يمكن لانهم محتاجين للفلوس

تحياتى

well يقول...

موجة ..

الواحد لما يطلب الفلوس وتجيله مش بيحس بتعابها ..صدقينى لما نشتغل ونجيب القرش بنفسنا بنحافظ عليه اكتر ..مش علشان بخلاء لأ بس علشان تعبنا فيه .

صحبى اللى فى المستشفى (عزيز بنزيما ده شخصية خيالية )

شكرا على تعليقك وليكى كل تحياتى

well يقول...

مجرد انسان ..

شكرا على كلامك الجميل ..

بطاطس مشوية اممممممممم جارى التنفيذ

تحياتى

أحمد الصعيدي يقول...

well


تعرف يا ويل ربما القناعة بما كتب الله هي أحد أسباب الرضا ولكن يسلط الله علينا حتي الفقر علي يد ظالم لأننا عاجزين عن العمل بالأسباب وكلامي لا ينطبق علي عم عزيز الفقير

أسعدك الله

richardCatheart يقول...

صباح الخير
وراااا هى ناقصه مأساويات ياول دانت قلبت عليا كل البلاوى اللى بشوفها فى التلفزيون ياخى
والناس اللى بنقف اؤدمها عجزين وبكره اللى ربنا يستر على ولدنا منه

ربنا يسترك ماتقلش العيار العمليه مش ناقصه مقاسى 45
صباحك خير ان شاء الله

richardCatheart يقول...

علي فكره لوناوي تشوف الفيلم كملو للاخر لانه متصل ببعضوالناس بتزهق لانه طويل وشوفه بعين النقد علشان تتاكد من هدفه تحياتي ليك يا ويل

إمرأه من ثلج يقول...

ربنا يكرمك يارب

مش عارفة بس حاسة ان دى خطة علشان نفضل مشغولين فى الاكل والعيش والعيال والمواصلات وننسى الاهم الفساد والغش الى يخلى ناس فوق قوى وناس تحت خالص

اسفى على تاخرى النت كان فاصل

ريمان يقول...

االسلام عليكم

والله لو جينا نفكر فى الموضوع ده هنلاقى ان الحكمه من غلاء الاسعاء واخفاض مستوى المعيشه بيرجع فى الاخر لحاجه اسمها السياسه
اه والله عشان يشغلوا الناس بالاكل والشرب والفلوس وينسوا نظام البلد ماشى ازاى
الوقتى الناس ماشيه فى الشاره بتكلم نفسها مش معاهم فلوس ونفسهم يشتروا ده وده وده ومش معاهم
نيجى قنول لواحد قضيه فلسطين ولا الفساد الاقتصادى هيقولك انا مفهمش فى الكلام ده

جارة القمر يقول...

انا جاية اسلم وامشي

يارب تكون بخير

Just waiting يقول...

بجد بسم الله ما شاء الله عليك
انت اسلوبك حلو قوي وبسيط
ودي مش يوميات رجل فقري دي يوميات اكتر من نص الشعب المصري

احاسيس آيوشه يقول...

:(
للاسف ده بقى حال الناس كلها
ربنا يصلح الاحوال ياااااااارب

قهوة بالفانيليا - شيماء علي يقول...

مش معقول فعلا
المدونة دي اول مرة اشوفها النهاردة اصلا ..
المدونة حلوة
و اسلوبك جميل جدا في الكتابة ..
فعلا اسلوب جميل و قريب جدا لقلب اي حد بيقرا ..
مرحباً بي عندك.

داليــــــــــــــــــا يقول...

تعرف هقلك حاجه كلنا عارفنها بس مش عارفين ليه مبنعملش بيها

القناعه كنز لا يفنى

بس تعرف مشاعرك حلوه لان كل انسان فى الدنيا يتمنا ان اولاده يكونوا احسن منه فى كل حاجه
والا اتحرم منه ميحرمش اولاده منه

بس كل ده حاجه بتاع ربنا

كلامك جميل ومشاعرك رقيقه

تحياتى

فشكووول يقول...

ازيك يا ويل
الواد ابنك مش بيحب البطاطس
طبعا ما شابه اباه فما ظلم
عارف يا بنى ان احنا ما بنعرفش نعمل حاجه خالص وما بنعرفش الا ناخد ضرايب من الناس ودا كل ايرادات البلد عشان كدا بياخدوا منناويدونا وبالعكس ومافيش اى مشروعات انتاجيه عشان تجيب ايرادات يشغلوا ناس ويفتحوا ابواب رزق لناس
احنا عندنا بلد مكسحه وكتعه ولا لها فى اى حاجه .. الغلط الكبير اننا طلعنا مصريين ..

osama44 اسامه 44 يقول...

الله عليك يا ويل
بجد جميله
اللهك ارزقنا الهدى والتقى والعفاف والغنى

اشوفك على خير

عطش الصبار يقول...

على فكره ياويل
انا طول عمرى باموت فى البطاطس المحمره
وولادى بيحبوها وحفيدى كمان كل شويه يقول ما فيش بطاطس
كمان زاد حبى ليها لما قريت عنها كدا بس فين مش فاكره ان البطاطس بتعدل الحاله المزاجيه
فكر فيها من النا حيه دى كدا
احنا لازم نحبها لانها بتنفع مع الايام البيضاء اللى احنا عايشين فيها دى
تحياتى

مهموهـــــــة يقول...

اسلوب متميز و رائع كالعادة يا ويل

ماشاء الله عليك
ربنا يوفقك يا رب
و من نجاح لنجاح

دمت مبدع و متميز يا ويل

خالص تحياتي و تقديري

أحمد الصعيدي يقول...

ويل اانا فاكر اني علقت هنا


ماعلينا

الرضا بالقليل شئ جميل ولكن من يقتنع بذلك


ربنا يكرمك

ليله شتاء يقول...

السلام عليكم
يعنى مالها البطاطس !!! زى الفل اه مش كل يوم بس أحسن من مفيش ههههههههههه

أسلوبك جميل ومميز

دام قلمك

Heba Faruq يقول...

صدقني فيه ناس اساسا مش لاقيين حتى البطاطس..

بوست رائع
احييك على اسلوبك الصادق الجميل

الغاردينيا يقول...

هذة اجمل ماقرأت لهذا الأسوع اقولها بكل امانه ... حبيت كل كلمه قلتها
انت يمكن اعطتنا كلنا فكرة هو مستقبلنا
احنا برضه هيكون ازاي !!

يمكن يجي يوم ونفس الدلع اللى بندلعه مع اهلينا يدلع فيه ابناءنا علينا !
دنياااااااا وبتلف بيناااا

تالمت على صديقك ربنا يكون معاه ومعاك
ويرزقكم من حيث لا تحتسبواااا
ويا اخي انت يمكن فقيرر بس غني بعلمك بروحك بدينك ودا يكيفيك يمكن كلامي ما ياكلك عيش بس ثق دوما بغد افضل وثق ان ربنا كريمممممم ,

وعن نفسي بموووووت بالبطاطس بجد بجد
ومستعدة اكلها كل يوم ههههه
اساسا انا بكلها بالكلية بطلبها طلب خاص واذا مالقيتها يتعكر يومي ,
ههههه

اعذب تحيااااااات وربي يحميلك ابنك
واسرتك ويحميك لهم , وانحني لك وارفع قبعتي عاليا ,

richardCatheart يقول...

صباح الخير ياويل

اكيد النت قاطع عندك

حبيت اعدى اسلم عليك واطمن يارب تكون بالف صحه وخير دا وش صنيه البطاطس ولا ايه

صباحك خير ان شاء الله

حصان المرجيحة يقول...

اولا احييك علي الاسلوب الخفيف و صاحب المعاني الكتيرة
ثانيا مش عارف اقول حاجة و كان عندي خرس مؤقت
عشلان كده بدور علي عروسة عندها شقة و فلوس و ربنا يقدرنا علي الباقي
ههههههههههه

هيوووم يقول...

القصه هزتمى جدا فهى تمثل مايعيشه معظم الناس فى بلدنا والقناعه كنز لكن احيانا الانسان بيفيض نيه ليه فيه ناس لازم تعيش فى قناعة وناس تحصل على كل شىءربنا يرزقنا القناعه وما عند الله خير وأبقى...القصة جميله بجد...تحياتى

الشـوكة الــنـاعـمـة يقول...

بحب الاسلوب ده اوى
بس والله البطاطس مش وحشه اوى
بالشكل ده
بس فعلا ده حال كتير من الناس مش عيب اننا نطمح فى حاجه احسن بس الاهم نسعى ليها
تقبل مرورى
تحياتى

well يقول...

أحمد الصعيدي ..

الرضا ان ترضا بحالك وبما تملك واظن ان هذا قناعة
تحياتى

well يقول...

richardCatheart..
ياصباح الفل
بما انها قلبت بمواجع انا مايريضنيش كدة طبعا وعشان كدة زورى البوست ده ..علشان ماشيلش زمب المواجع
http://kashkol100.blogspot.com/2009/05/blog-post_22.html

تحياتى

well يقول...

richardCatheart ..

بمناسبة الفيلم ان شاء الله هشوفوا وهكمله لاخره ..وشكرا

تحياتى

well يقول...

إمرأه من ثلج ...

انا كمان مش عارف هى خطة ولا الحياة كدة
انا كمان النت عندى كان فاصل باين عليها خطة

تحياتى

well يقول...

ريمان ..

وعليكم السلام ورحمة الله ..

السياسة طبعا ليها دور كبير فى الحالة الاقتصادية ..وانا فعلا شوفت ناس بتكلم نفسها

ربنا يصلح الحال

تحياتى

well يقول...

جارة القمر ..

وليه تمشى ..هنا مكانك قبل ما يكون مكانى
ياريت لو ديما تنورى الكشكول وطمنينا عليكى

تحياتى

well يقول...

Just waiting ...

ههههه دى فعلا يوميات الشعب كله

تحياتى

well يقول...

احاسيس آيوشه..

ربنا يصلح الحال ..امين

تحياتى

well يقول...

قهوة بالفانيليا - شيماء علي ..


شكرا اوى يا شيماء ماتعرفيش مدى السعادة وانا بقرأ كلماتك
ان شاء الله هيكون فى تواصل
نورتينى
تحياتى

well يقول...

دالــيـا..

القناعة كنز لا يفنى ..والرضا هو اسباب السعادة

نورتينى ونورتى الكشكول

تحياتى

well يقول...

فشكول ..

مش عارف ليه وانا بقرا كلماتك جات فى بالى اغنية ..يبقى انت اكيد اكيد فى مصر ترررم رم

القصة خيالية والواد ابنى ده خيالى ..بس زى العسل

تحياتى

well يقول...

اسامة ..

كفارة يا راجل ..اخيرا ظهرت ..ياعم براحتك ..

والله ليك وحشة .. وحشة من بتاعت وحشتنى مش اللى فى بالك

تحياتى

well يقول...

عطش الصبار ..

تحياتى لحبك للبطاطس

وانا كمان بحب البطاطس

تحياتى

well يقول...

مهمومة ..

شكرا على كلماتك الجميلة ديما كدة بترفعى من روحى المعنوية

تحياتى

well يقول...

احمد الصعيدى ..

انت فعلا علقت هنا ..بس انت تعلق هنا فى اى وقت يعجبك المكان مكانك والكشكول كشكولك ..نورتنى

تحياتى

well يقول...

ليلة شتا ..

تخيلى كدة لو اختفت البطاطس ..تصدقى ينفع نصنع منها قصة امممممم

المدونة كلها نورت

تحياتى

well يقول...

Heba Faruq ..

ربنا يصلح الحال ..

شكرا على تعليقك ونورتينى

تحياتى

well يقول...

الغاردينيا ...

شكرا على كلامك الجميل
على فكرة دى قصة خيالية ..انا اصلا مش عندى ابن ..انا اصلا مش متجوز .انا اصلا لسه ماخطبتش ههههه

مرة تانية شكرا على كلامك الجميل

تحياتى

well يقول...

richardCatheart ...

ياصباح الفل ...شكرا على السؤال

الواحد اصلوه ملوش حظ مع الالكترونيات سواء كان نت او كمبيوتر او الزفت الدى فى دى اللى مش عاوز يشتغل

شكرا على السؤال
تحياتى

well يقول...

حصان المرجيحة ...

ههههههه دورلى معاك على عروسة ..

تحياتى

well يقول...

هيوووم...

الارزاق هى شئ من عند الله او كما تقال الارزاق بيد الله

تحياتى

well يقول...

الشـوكة الــنـاعـمـة ...

انا كمان بحب البطاطس

تحياتى

richardCatheart يقول...

ههههههههههههههههههههههههههههههههه

الو
الو
الووووووووووو

صباح الفل متشكرين يا ويل

حلو اوى بوست الاذاعه يا ممدوح بيه فرج ههههههههه

والله انت من الناس اللى بتكتب فنتازيا وكوميدى جميبل

ماتحاول تشتغلنا حاجه كده تبقى مضمون وفرفشه
تسلم ياول وشكرا على ذوقك والله

richardCatheart يقول...

صحيح معلش بخصوص اليكترونياتك
ربنا يبختلك بقى هانعمل ايه
كل واحد بياخد ال24 قراط بتوعوههههههه

ّّ همســــآت قلبي ّّّ يقول...

كلام رااااااائع جذبني طريقه كلامك تقبل مروري كشككولك

miroooo يقول...

القناعه كنز لايفنى
بس مش كتير مننا عنده قناعه بس الامل فى ربنا كبير انه يحسن من اوضاعنا واخلاقنا كمان ربنا يهدينا
البوست جميل وهادف جدا
احييك على تناولك لهذا الموضوع والاسلوب الرائع اللى كتبت بيه
دمت بكل الخير

well يقول...

richardCatheart...
يا مساء الفل ..

هههه ده مش ممدوح فرج ده ممدوح منير
بخصوص الالكترونيات اهو الحظ بدأ يلعب

تحياتى وشكرا على المتابعة

well يقول...

ّّ همســــآت قلبي ّّّ...

يا ويلكم يا ويلكم ..الحمد لله انها عجبتك ..وان شاء الله يكون فى تواصل
تحياتى

well يقول...

miroooo ...

الناس اللى بتيجى متأخرة ...امممممممم

..شكرا على كلامك الجميل

تحياتى

ساسو يقول...

weel
كلامك جميل اوي وممتع جدا جدا جدا ودمه خفيف
بس والله العظيم البطاطس دلوقتي اجمل كتير من اللحمه وياسلام بقي لو مقليه ومقرمشه كدهومعاك طبق مليان وتتخايل نفسل وكأن في ايدك كيس شبسي عائلي ياه احساس يجنن
وياسلام بقي لو البطاطس دي في صنيه واو
بس والله اجمل شيئ ان الواحد يرضي بالمكتوب
ودلوقتي بتاكل بطاطس وانت راضي بكره ربنا علشان رضاك وعفه نفسك يرزقك برزق كبير جدا
والقناعه دي اهم حاجه
ربنا يوفقك

ومستنياك في مدونتي

ساسو يقول...

سوري well
غلطه مطبعيه