المال الان

يوجد من ذهب الى حيث اراد
ويوجد من ذهب الى حيث ارادت الظروف
أصبح( المال الان) هو اهم شئ
الناس اصبحت تتنازل عن بعض حقوقها من اجل (المال الان )
اصبحت تتنازل عن عزة النفس ..ووقت الراحة ..بل ان بعضهم يعمل اكثر من 12 ساعة يوميا
اصبح العمل هو الحياة الاساسية من دونه قد ينهار المجتمع ..نسيت الناس الحياة
الحياة التى هى عبارة عن وقت راحة ..يكون مع الاولاد او خروجة ..او التمشية على شط النيل مع زوجتك..او برفقة صدبق.. الحياة التى هى عبارة عن كتاب او قصة فى وقت الفراغ ...لن يعطيك الكتاب مال
ولن تعطيك الاولاد مال ولن تعطيك الزوجة مال ...فلماذا وقت الفراغ ...العمل الاضافى قد يعطيك مال ..وسوف تنسى الحياة الانسانية
يوجد من رضى بالقليل ..وذهب الى حيث اراد ..وتحقق حلمه
ويوجد من نظر الى (المال الان) ونسى حلمه ...وذهب الى حيث ارادت الظروف ..
تم مسح كلمة (التمشية على شط النيل مع حبيبتك)
...................................................
اضافة .. بعد ما الاستاذ جاب الكوبيات وكان فيها اكواب كريستال جميلة واكواب عادية
قال الأستاذ لطلابه:
تفضلوا ، و ليصب كل واحد منكم لنفسه القهوة، وعندما بات كل واحد من الخريجين ممسكا بكوب تكلم الأستاذ مجددا، هل لاحظتم ان الأكواب الجميلة فقط هي التي وقع عليها اختياركم، وأنكم تجنبتم الأكواب العادية ؟؟؟
ومن الطبيعي ان يتطلع الواحد منكم الى ما هو أفضل، وهذا بالضبط ما يسبب لكم القلق والتوتر، ما كنتم بحاجة اليه فعلا هو القهوة وليس الكوب، ولكنكم تهافتم على الأكواب الجميلة الثمينة، و بعد ذلك لاحظت أن كل واحد منكم كان مراقباً للأكواب التي في أيدي الآخرين، فلو كانت الحياة هي القهوة، فإن الوظيفة والمال والمكانة الاجتماعية هي الأكواب...
وهي بالتالي مجرد أدوات ومواعين تحوي الحياة ، ونوعية الحياة (القهوة) تبقى نفسها لا تتغير، و عندما نركز فقط على الكوب فإننا نضيع فرصة الاستمتاع بالقهوة ..
وبالتالي أنصحكم بعدم الاهتمام بالأكواب والفناجين، وبدل ذلك أنصحكم بالاستمتاع بالقهوة، في الحقيقة هذه آفة يعاني منها الكثيرون
اللى عاوز يقراها من اولها .. http://www.amrkhaled.net/articles/articles2894.html

هو انتى مين

هو انتى مين
شعرك نخيل
وعنيكى نيل
مرسوم جواه قمر الليل
هو انتى مين
صوتك منقوش على الاحجار
فستانك اخضر مزروع اشجار
وطرحتك لونها قمحى
وانا لونى قمحى
وفى ابتسامتك دوا لجرحى
ابتسمى وزيدى الحنين ..هو انتى مين
لما بتمشى على الشط الميا بتمسح خطوات رجليكى
الميا ملحة لكن الحياة حلوة فيكى
وعلى اكتافك شنطة جواها كتب واقلام
جواها علم وايمان
جواها اسرار وتارخ ثوار
تلاميذ .. عمال ..كتاب ..ابطال ..ولوحة فنان
وناس كتير ..هو انتى مين
هو انتى نيل ولا عروسة النيل
ولا انتى نجمة منورة رغم الليل
هو انتى مين ..حبك جميل

هو انتى اى اصلك

هو انتى اى اصلك
بتكلمى فرعونى ولا عربى
ما تردى ..
ولا كلامى مش عجبك
...
سعات اشوفك لبسه فرعونى وانتى بتكلمى العالم
وسعات فى الفجر اشوفك لبسه حجاب وبتسجدى وتصلى
وتقولى يا رب يا عالم
وسعات فى الليل يطبلولك ..تحزمى وسطك
هو انتى اى اصلك
..
سعات اشوفك امى ..نفسى اقولك بحبك ..وارتمى فى حضنك
وسعات اشوفك مرات ابويا ..ظلمتى اختى سجنتى اخويا
واخدتى منى حقوقى وبرده مش عاجبك
...
سعات انادى عليكى واقول بلدى
حكالى ابويا عنك وقال ارضى
دلوقتى باعوا ارضك
هو انتى ليه ساكتة
هو انتى مين سجنك
.....

هو انت ليه معملك سور

هو انت ليه معمولك سور
وباب مقفول
ده الدنيا ضلمة وجواك نور
.......
هى ليه الجوامع بتتقفل ؟
.......هى مش مصر دولة اسلامية ..... !
تم تعديل كلمة سور بدل من صور ..
الحكاية بقى انى كنت ماشى ولقيت جامع حوليه سور حديد بباب حديد
والباب الحديد مقفول وباب الجامع هو كمان مقفول ...هما خايفين على الايمان ليسرق من الجامع
..المهم ..الكلمات دى خرجت من جوايا بجد ..ورغم كدة انا لسه شايف مصر من النضارة بتاعتى ..انها دولة اسلامية
..واحد قالى دى سياسة .. بيقفلوا الجوامع ..ويسيبوا الناس تبيع حشيش ..علشان يقللوا من الارهاب سلامات يا سياسة
..نخرج شوية عن النص ..السياسة عاوزة تكتب تاريخ على مزاجها او بمعنى اصح تألفه..لكن اللى محدش يعرفه ان كتاب التاريخ هو الكتاب الوحيد اللى بيكتب الحقيقة اللى الناس عايشاها وممنوع تألف فى كتاب التاريخ ..او تفرض نفسك بالعافية على كتاب التاريخ ...وتحياتى الى كتاب التاريخ من اول مينا موحد القطرين مرورا بالفتح الاسلامى مرورا بصلاح الدين مرورا بوقفة عرابى قدام الخديوى مرورا بالظباط الاحرار وتأميم قناة السويس حتى حرب اكتوبر المجيدة وبعد حرب اكتوبر المجيدة كدة مفيش مكان فى الكشكول علشان اكتب بقيت التاريخ الناصع بالبياض وكأنوا مغسول بــ كلوركس للأبيض والألوان ..

ايتها الابتسامة

المنظر الاول
ينظر صاحب الكشك فإذا الذى امامه وجه عابس
صاحب الكشك .. أأمر يا استاذ
الوجه العابس ..!!!!!!!!!!!!
صاحب الكشك يهز رئسه وكأنه يقول ايوة انا فاهم بس قول انت
الوجه العابس .. يعطى له 20 جنيها وكمان يقوله علبة روزمن (وكل ده فى حركة واحدة)
صاحب الكشك .. اتفضل
الوجه العابس .. وولاعة لو سمحت
صاحب الكشك .. فى عادية وفى سخان تحب اجيبلك اى
الوجه العابس ..سخان . . من الزرقة دى .. ايوة اللون الغامق
صاحب الكشك.. اتفضل
الوجه العابس يمشى
صاحب الكشك ..يا استاذ يا كابتن
الوجه العابس ينظر فى زهول
صاحب الكشك .. بقيت العشرين جنيه
المنظر الثانى
الوجه العابس .. يقف امام النيل
الوجه العابس يخرج سيجارة ويضعها في فمه ويخرج الولاعة السخان
الوجه العابس يشعل الولاعة ثم يطفئها دون ان يشعل السيجارة
وقبل مايولع السيجارة كدة هنعمل تعديل صغير بدل الوجه العابس هنقول ميدو
يلا بقه نرجع لميدو
ميدو يشعل الولاعة ولكنه يطفيها دون ان يشعل السيجارة
ميدو والسيجارة المطفية فى فمه .. يتذكر ذلك المشهد
امه تمسك يده ..وتقوله ميدو ماتشربش سجاير تانى علشان خاطرى .. .. ثم تفارق الحياة بعد ساعة من هذه الكلمات
هذا المشهد فات عليه حوالى سنتين و7 شهور وميدو من ساعتها لم يشرب سجاير ...

ميدو كان بيشرب سجاير بقاله خمس تشهر لكن امه ماتعرفش
امه عرفت من ام بهاء
ميدو بيكره ام بهاء ..ميدو الان يضم يده جامد نفسه يضرب ام بهاء
وبهاء وكل عائلة بهاء
ميدو يمسك السيجارة بين اصابعه دون ان تشتعل ويسند علي صور كورنيش النيل
ميدو حوليه بنات وولاد جم علشان يحبوا بعض عند النيل
لكن ميدو جي للنيل علشان يقوله كل اسراره
والنيل تعب من كتر هموم ميدو ودلوقتى بقى استنوا علشان ميدوا هيقولى اسراره ..ميدو بيندهلى .. ويقول .. فاكرنى يانيل ولا نسيتنى ..يا نـيل
ميدو بيحكيلي .. ان هو واخته مابيكلموش بعض بقالهم 4 ايام
اخته ..ميدو بيجهزها علشان على وش جواز ..هو الكبير دلوقتى
ميدو عاوز يكلمها ويصالحها ويخدها فى حضنه ..لكنه زعقلها بصوت عالى..لغاية ما بكت
اصل ميدو مخنوق .. مسجون جوه شغل بيروح الصبح بدري ويدخل المعتقل
قصدى المصنع .. مايخرجش منه الا بالليل..يتعشى وينام وسعات بينام من غير عشى ..علشان مبيجلوش نفس ياكل
ميدو كان نفسه يشتغل فى وظيفة بالشهادة بتاعته ..
الوظايف كتير بس ميدو معندوش وسطة ..
ميدو بيرفع عينه لسما .. انا سمعه بيقول
انا عارف ان الوصية الوحيدة اللى امى وصتنى بيها
انى مشربش سجاير .. بس اعمل اى يا رب انا مخنوق
مخنوق من الشغل ومن زعلى مع اختى ..وو.. ميدو نزلت من عينه دمعة

..عاوز اشرب سجاير علشان تطلعنى من الخنقة دى .. ميدو مسح الدمعة لكن الحزن باين فى عيونه ووجه العابس
.. فى صوت غريب .. ده تليفون ميدو .
الحمد لله ان التليفون رن يحسن كنت خلاص هدمع ويحصل فيضان
. ميدو طلع من جيبه عدة اريكسون من العدد القديمة ...ميدو كان كل مايشوف العدة دي يحلم انه يرميها فى اقرب صفيحة زبالة ويجيب عدة N90....لكن دلوقتى نسى الحلم ده .. كل حلمه اخته تتجهز ووظيفة حلوة
ميدو بيبص فى التليفون .. ده الواد عليوة
عليوة ده بقى ميدو مصاحبه بقاله كدة سنة و 8 شهور ميدو صاحبه علشان لقاه أقلع عن التدخين .. وقال فى نفسه هو ده اللى هيساعدنى علشان اقلع عن التدخين
ميدو .. اي بس اللى خلاك تتصل دلوقتى وانا هشرب السيجارة
ميدو يفتح التليفون ..الو اى يا علوة عامل اى
علوة .. الحمد لله .. انت فين كدة
ميدو .. انا عند كورنيش النيل كدة
علوة .. مع مين ياض .. بتمشى مع مزز من ورايا
ميدو .. مزز..انا لوحدى والله يا علوة
علوة .. عليا انا .. المهم انا كنت معدى من قدام بيتك وعارف ان النهاردة اجازتك
وقولت لما اتصل بيك كنت عاوز اعزمك علي حاجة ساقعة بس مالكش نصيب ..الحمد لله وفرت
ميدو .. فعلا مليش نصيب
علوة .. انت مالك ياعم من صوتك كدة باين عليك مخنوق
ميدو .. مفيش ياعلوة
علوة .. ياعم انت بس قول يارب وهو هيساعدك ويطلعك من الخنقة اللى انت فيها
علوة .. خلاص بقه لما توصل المنطقة ابقى رن عليا
ميدو .. ماشى ياصاحبى سلام .. تيت تيت ..
ميدو ..حط السيجارة تانى على بقه وولع الولاعة
ميدو بيولع السيجارة ..لكن فجأة افتكر كلام علوة
السيجارة وقعت من فمه .
قول يارب وهو هيساعدك ويطلعك من الخنقة اللى انت فيها
ميدو رفع عينه للسما ..معقول كنت بقول لربنا محتاج حاجة تساعدنى
وهو اللى بإيده يساعدنى ..
يارب ساعدنى ..
ميدو يرمى الولاعة فى النيل ..ويمشى خطوتين
ويرجع تانى ..يطلع علبة السجاير الروزمن ويرميها فى النيل
المنظر الاخير
ميدو طالع على السلم ..
ميدو شفايفه ما بتتحركش لكن لسانه بيتحرك ويقول لا اله الا الله
بيقولها من ساعة ما مشى من عند كورنيش النيل
ميدو قلبه اطمن شوية ..الابذكر الله تطمئن القلوب
ومن علامات الايمان ان الانسان يكون مطمن
ميدو خبط اخته فتحت ... نفسه يقولها ماتزعليش منى لكنه ساكت
ميدو دخل علي الاوضه بتاعته .. دخل بذلك الوجه العابس
خطوات تقترب من ميدو
ميدو ينظر .. إذ بوجه مبتسم يقترب منه ويقوله
(اى ياعم مالك اى بس اللى مزعلك منى )
ميدو يبتسم ..وقلبه يقول الحمد لله .

انتهت...

اقرأ ايضاً..stop Drugs.change your Life

اوقف المخدرات وغير حياتك 2قصة

1..دعونى انسان..........تتحدث عن التيمول

2..فى الليل والنهار...... تتحدث عن الحشيش

من هنا

http://kashkol100.blogspot.com/2009/01/stop-drugschange-your-life.html

.....

بمناسبة المولد النبوى

بمناسبة المولد النبوى تعالوا نعمل حاجة حلوة
اولا كل عام وانتوا طيبين ...
ثانيا ...تعالوا نصلى على النبى عليه الصلاة والسلام الف مرة ...الليلادى ..
واللى ملحقش الليلادى ....يبقى يوم فى الاسبوع ده ...او يوم فى الشهر ده ..
...من كتاب الدعاء المستجاب من الحديث والكتاب...
قال النبى صلى الله عليه وسلم :(من صلى عليه فى يوم الف مرة لم يمت حتى يبشر بالجنة ) رواه ابو الشيخ عن انس رضى الله عنه
----
قال النبى صلى الله عليه وسلم :(من صلى على فى يوم مائة مرة قضى الله له مائة حاجة : سبعين منها لاخرته وثلاثين منها لدنياه) رواه بن النجار عن جابر رضى الله عنه
----
قال النبى صلى الله عليه وسلم : (صلوا على انبياء الله ورسله كما تصلون على فإنهم أرسلوا كما أرسلت )رواه احمد والخطيب عن ابى هريرة رضى الله عنه
-----------------وكل عام وانتو طيبين

اروينى حب

فى الاسبوع الاول
*************
بينماوانا اسقى الاشجار
تفاجئت عندما رئيت تلك الشجرة
الشجرة التى كانت اوراقها دائما تقع
وجدتها وكأنها لوحدها بستان ...زاد جمالها
وتفتح الورد بها .. تقدمت منها فإذا بقلب مرسوم
لم اهتم بالحروف التى بداخله .. فقد اعجبنى منظر الشجرة
.....
فى الاسبوع الثانى
***************
عجبا ... ايتها الشجرة اين الاوراق اين الورود
ماذا جرى لكى ... اقتربت منها ..فسمعت صوت يقول اروينى
اروينى ...اروينى
فنظرت يمين وشمال لم اجد احد ..كان الصوت من الشجرة
اسرعت واحضرت مياه ...ورويتها
فوجدتها تقول ...اروينى ....قلت انا ارويكى
قالت لا ...اروينى حب
فنظرت للقلب الذى مرسوم عليها كان بداخله حرفين
(H,A) فظللت ارردد a و h مين دول
فوجدتها تقول حرف الـ a علاء ..##وحرف الاتش ****.خطيبته.ابحث عنهم ...
ثم سقط فرع من فروعها
......
بعدها باسبوع أمر المدير ان تقطع هذه الشجرة
بسبب سوء حالها ..
وعندما علمت بهذا الامر ...
جريت لكى احضن تلك الشجرة ..التى احببتها
ولكن فجأتنى كعادتها ..ووجد تلك الاوراق الخضراء
والورود الحمراء ..ووجد اثنين يجمعهما الحب ..وكان
احدهم يرسم القلب بجوار القلب الاول ويكتب بداخله
(H,A)...
....فقلت بصوت عالى ارويها حب
نظر اللى علاء واتش ..لعلهم ظنونى مجنون
ابتعدت .. فابسموا .. وابتسمت ..وازدادت الشجرة جمالا

هو انتى ليه مبتضحكيش

هو انتى ليه كده مبتضحكيش
تيجى عندى انا وتقفلى فى وشى الباب
هو انتى ليه يا دنيا كده بتجرحينى من غير اسباب
معاكى انا حالى ضاق
من كتر همى شافنى المسطول فاق
امتى يا دنيا هتفهمينى
امتى يا دنيا هتضحكيلى
امتى الاقيكى ومتكشريش
هو انتى ليه مابتضحكيش
مين علمك البكى
دانا من صغر سنى والضحكة على وشى غنوة
والقلب ابيض والفرحة حلوة
مين علمك البكى
دانا علمتك الحب وانتى متعلمتيش
هو انتى ليه مبتضحكيش

ملكى خلاص مبقاش ملكى

ملكى خلاص مبقاش ملكى ..ملكى بقى لحد تانى
لا دى حروفى ولا ده اسمى على ديبلتك فى اسم تانى
انا مش بلومك صدقينى
انا اللى سيبتك فى البداية
سيبتك ولما رجعت تانى
لقيتها خلصت الحكاية
حلمى خلاص ضاع منى حلمى
مقدرش اخد شئ مش ملكى
ورقة شجر إزاى ترجع للشجر تانى
قتلها الخريف والربيع صحانى
وجيت لقيت السما غيمت
لامطرت ولا نورت
انا راضى بالنصيب وبدعى ربى يكرمك
رجعت لكنى ماشى تانى
ملكى خلاص مبقاش ملكى
ملكى بقى لحد تانى

نظر احمد الى يد ريهام وهما واقفين عند الكورنيش
فمسك يدها ثم خلع الديبلة التى كانت تلبسها ونظر داخلها ثم البسها مرة اخرى فى يد ريهام
ثم قال لها دى مش حروفى ..علشان كدة ساكتة ومش عاوزة تتكلمى ومكنتيش عاوزة تقبلينى
ريهام قالت**ماتلومنيش ##انا مش بلومك انا عارف ان انا اللى سيبتك فى البداية بس خسارة رجعت متأخر
أحمد يمشى وكأن شئ لم يكن **احمد احمد ##ايوة **رايح فين ##خلاص يا ريهام انتى بقيتى ملك غيرى وانا مش متعود أخد حاجة مش بتاعتى **طب هتمشى كدة من غير حتى ما تقول سلام ..##سلام يا ريهام **سلام يا أحمد.

اضغاس احلام

كل ما أتذكره كان معى طفلين وإمرأة .. لا أعلم عنهم شىء ..
وكنت قريب من الحدود المصرية ..لا أعلم أكنت ذاهب من مصر الى فلسطين
أم كنت أجئ من فلسطين الى مصر ..وفجأة ..بدأ الضرب نظر اليا رجل فلسطينى
كبير فى السن وقال ان الطائرات تقترب فنظرت فإذا بطائرات العدو تحوم فوقنا
فقلت للإمرأة والطفلين وطوا..(انخفضوا ..)علشان محدش يشوفنا وحضنضهم من أجل ان لا أحد يرفع يده او رأسه .. ثم وجد الطائرات تقترب فعلمت ان الموت هو مصيرى ...
فهانت عليا نفسى ان اراها تتقطع بصواريخ العدو .. فأغمض عينى وبدأت اردت فى سرى
(أشهد ان لا اله الا الله وان محمد رسول الله )عليه الصلاة والسلام ..ومازلت مغمض العينين
وأرى ظلام ...ثم فجأة ..وكأننى كنت نائم وأستيقظت ومازلت مغمض العينين لا أستطيع ان افتح
عينى وبدأت أقول فى نفسى هل انا ..مــت..ثم اقول فى نفسى ..انا أفكر اذن انا موجود
..وحاولت ان احرك جسدى فتمكنت من تحريك صوابع يدى ..وقدمى كانت لا تتحرك فقلت لعلها قطعت
من صواريخ العدو ...وفى النهاية تمكنت من ان أفتح عينى ..فوجد هذا كله مجرد حلم.
فحكيت حلمى للعرب ..
فقالوا لى العرب ( أضغاث أحلام ومانحن بأضغاث الأحلام مفسرين) .

ابعدوا .. ابو جهل

قد استيقظ .. بدأ يفكر فى ما حدث له امس
عند حلول الرابعة فجراً ..
نعم دخل الى فراشه عند الساعة الرابعة
لم يكن الفجر اذن .. ثم بدأ فى النوم
ولكنه لم ينم وإنما هو يذهب فى النوم
وفجأة .. يجد نفسه لا يمكنه التحرك ..
ويرى ظلام فى ظلام .. لا يعرف هل عيناه مفتوحة
ام مغموضة .. ولكنه فى الحالتين يرى .. ظلام فى ظلام
ومن بين الظلام يجىء رجل .. يلبس اسود ..نعم انه
يذكر هذا الرجل ..فقد كان يدعوا الناس الى الاسلام
وتوفى منذ زمن ...بين الظلام يجىء الرجل يرفع يده ويقول
ابعدوا عنى ابو جهل .. ابعدوا عنى ابو جهل ..
ابعدوا عنى ابو جهل.. وكلما كان يقولهاالرجل ..
كان النائم يشعر بأن جسمه يرتجف ..
حتى اصبح يرتجف ويرتجف.حس بالخوف.فقال فى نفسه..
يجب ان استيقظ .وقاوم حتى استيقظ من هذه الرؤية
ثم .. عاد الى النوم سريعا .
..
حسنا .. مازال الرجل يفكر .
المقصود بأبو جهل ..هى اسرائيل
اسرائيل .. التى بدأت تدبح غزة
والعرب صامتون يكتفون ان يعلنوا قمة
قمة لاتشبع ولا تغنى من جوع ..
قطر تعلن قمة .. وتوجه إصبع الاتهام ناحية مصر
وقد نسيت قطر ما فعلته بالامس ..عندما خرجت
من القاعدة الامريكية فى قطر طائرات حربية
لتساعد اسرائيل بالقنابل الذكية ..فى قتل لبنان
قطر نسيت هذا والجميع نسوا ..والسبب ان قناة الجزيرة
لم تنشر هذا ..قناة الجزيرة عيون كل العرب
قناة الجزيرة تسكت عن الحق .. قناة الجزيرة شيطان اخرس
ومصر تعلن قمة لا تشبع ولا تغنى من جوع ..
لتثبت انها فى القمة وتعلن مبادرة
وقناة النيل الاخبارية..التى تظهر نصف الكوب المليان فى مصر وتخفى حقيقة النصف الاخر..قناة النيل لا تظهر الحقيقة كاملة ..قناة النيل تدافع عن الاتهامات ..التى تسببها
قطر .من خلال قناة الجزيرة..حرب اخرى بين العرب انفسهم
لبيا ..تدعواالعرب الى فتح باب التطوع .. ولكنى لم
اجد رصاصة خرجت من لبيامن اجل ان تبعد ابو جهل عن غزة
وانما ارادوه ان يظهروا فى قنوات الاخبار ..الجزيرة اصبح لها حلفاء
مصر دورها الان فى السيناريو ان تفوز وبالفعل تفوز الان ..تفوز فى الحرب على قطر ..فقد تمكنت المبادرة من وقف اطلاق النار .. ولكن بعد ان تحللت الجثث.ومات الاطفال .والنساء . والابرياء ..وفعلت اسرائيل ما تريد
فهذا ليس بفوز وهذا ليس بفوز ..وانما هذا من اضعف اضعف الايمان
حتى الملك .. يرقص بالسيف ..مع بوش .. قاتل المسلمين فى العراق
الخليج .. لا تعرف الا لغة المساعدة بالمال .. ترسل معونات ولكن المعونات لا تبعد ابو جهل
..جميعهم يريدوا ان يظهروا على شاشة التلفاز ..يقولون ارسلنا معونات الى غزة ..وكأنهم اصحاب النصر
جميعهم(العرب) بلا استثناء.. يحملون ملامح الجهل .. ومازال ابو جهل يدبح غزة ومازال العرب يجهلون لغة الجند
ومازال الرجل ينادى ابعدوا عنى ابو جهل .
..ابعدوا!..لماذا لم يقل __ اقتلوا ابو جهل .. حاربوا ابو جهل
اكتفى بكلمة ابعدوا .. لعله كان يعلم ان ليس باليد حيلة
وان ابو جهل قد لطخ اقنعة الحكام بالجهل .
مازال الرجل مستمر فى التفكير ..
الخليج .. مصر -- سوريا .. لبنان --لبيا--
المغرب .. الجميع ينسى سبتة ومليلية الا ما رحم ربى
السودان .. تريد ان تتشبك بيد العرب ولكن يد عبد الناصر
دفنت مع عبد الناصر ..
...كاد التفكير يقتل الرجل ..الان توصل الى حقيقة
يجب ان يعترفوا العرب جميعا بإنهم دول متفرقة .. وليس بينهم وحدة
وصل الى حقيقة أخرى وسؤال يحتاج الى جواب ..
الحقيقة .. انه بدأ يبتعد عن الجهل
السؤال .. كيف يبعد ابو جهل ؟
الجواب .......

مـعـتـز الـصـيـنـى 私は私が逃す愛する:

المشهد الاول

######## لقاء الحبايب

معتز ينتظر نيرفانا عند محطة كوبرى القبة
نيرفانا تتقدم من معتز وتحمل ابتسامة
نيرفانا .. عامل اى يا حبيبى
معتز..الحمد لله
نيرفانا تنظر الى جاكت معتز
نيرفانا .. أش أش اى الحجات الحلوة دى
معتز.. اى رئيك
نيرفانا .. حلو الجاكت ده
معتز.. جيبتوا امبارح
نيرفانا .. بس حلو أوي ..شكله غالى
معتز.. تديلوه كام
نيرفانا ..اممم 250 جنية
معتز .. هاتى 200 جنيه وخديي
نيرفانا .. ههـ .. انت جيبتوا بكام اصلا
معتز .. بـ 150 جنيه
نيرفانا .. بس بجد حلو
معتز .. هو رخيص بس علشان صينى
نيرفانا .. اممم
نيرفانا .. نسيتنى صح .. فى اى ياعم
جايبنى على مالا وشى
معتز .. مفاجأة . . مشكلتنا اتحلت
نيرفانا .. بتكلم جد .. يعنى جبت الشقة
معتز .. لأ . بس جبت الشبكة
نيرفانا .. بجد يا معتز
معتز .. ايوة يا نيرفانا .. والشبكة كتيرة
نيرفانا.. كتيرة .. انت جيبت فلوسها منين يامعتز
معتز.. مش مهم جبت فلوسها منين المهم انها جات
نيرفانا .. معتز اوعى تكونــ..
معتز.. اكون اى بس .. ماتبقيش عبيطة انا مش بتاع الكلام ده
نيرفانا.. يعنى الشبكة دى فلوسها حلال
معتز .. ايوة ياستى فلوسها حلال
نيرفانا .. عارف يا معتز ممكن بعد ما تشبكنى
نبيع الشبكة ونكمل عليها ونجيب الشقة .. منى بنت خلتى عملت كدة
معتز .. ابيع الشبكة ...مش انا اللى ااقلعك الشبكة علشان ابيعها يا ماما
نيرفانا .. طول عمرك راجل يا معتز
معتز.. انا جي بكرة انا ومصطفى ابن خالتى الساعة 7 علشان
أورى الشبكة لأبوكى وامك
نيرفانا .. انت ومصطفى .. طب وأمك
معتز .. امي تعبانة شوية
نيرفانا .. الف سلامة عليها .. طب وأختك
معتز .. اختى قعدة معاها .. مينفعش تسيبها لوحدها
نيرفانا .. خلاص ماشى يا معتز
********
المشهد التانى

#######
في بيت نيرفانا
كيمو .. ايي . اسمع منى وركزلى
وكل واحد يجهزلى عل ترمادول
انا هتكلم ورييت محدش يغمزلى
نيرفانا ..انت يا زفت ياكيمو وطى الكمبيوتر
ده شوية معتز زمانه جى
ام نيرفانا .. ماتسيبى الواد يفرح يابت
دانا النهاردة هنشوف الشبكة
نيرفانا.. ياماما طب يشغل اغانى فاررحى
مش يشغلى الترمادول
ابو نيرفانا .. ما هى دى برضوا اغانى
بتاعت افراح .. شغل ياض

اغنية سيجارة بنى
ام نيرفانا.. تفتكري يا بت الواد معتز جاب
فلوس الشبكة منين ..اوعي
يابت يكون سارقهم
نيرفانا.. يا ماما هو معتز برضوا بتاع كدة
ابو نيرفانا..هو ده لو كان بتاع كدة
كان ده بقه حاله
جرس الباب يرن
نيرفانا .. ياكيمو اطفى الزفت ده وافتح الباب ده اكيد معتز
كيمو يفتح الباب يجد معتزشايل علبة شوكلاته
في اليمين وشنطة الشبكة فى الشمال
ومعاه مصطفى بن خالته
ابو نيرفانا .. ادخل ياعريس بنتى نورت البيت
ادخل يا مصطفى يا ابنى
يجلسوا داخل غرفة الصالون
مصطفى ينظر الى معتز ويغمزله برجله
معتز .. عامل اى يا عمى
ابو نيرفانا.. الحمد لله
معتز.. وانتى ياحماتى عاملة اي
ام نيرفانا.. الحمد لله .. والله انا زعلت على امك لما عرفت انها تعبانة
قولها ان انا جيا ازورها انا ونيرفانا
معتز.. فيكى الخير ياحماتى
ام نيرفانا .. ماتورينا يابنى الشبكة
معتز يفتح علبة الشبكة والجميع ينظر فى زهول
ام نيرفانا تمسك خويشة وتقعد تبص فيها
ام نيرفانا .. ده اى ده يا ابنى
معتز .. دي.. الشبكة
ابو نيرفانا..دى عيار كام دى يا ابنى
معتز .. ده ده عيار
معتز.. ده ياعمى دهب صينى
ام نيرفانا .. صينى .. انا بنتى تشبك بدهب صينى
هي بنات الناس لعبة فى اديك ولا اى
معتز .. ولا لعبة ولا حاجة ياحماتى
ام نيرفانا.. اخرس متجيبش كلمة حماتى دى على لسانك
مصطفى .. ياجماعة وحدوا الله بس مش كدة
ابو نيرفانا .. لا اله الا الله .. انت مش سامع
يامصطفى ابن خالتك بيقول اى
ابن خالتك بيقول صينى بذمتك

يا مصطفى يا ابنى انت ترضاها لاختك
معتز.. ياعمى اي بس المشكلة ماهو ده دهب وده دهب
ام نيرفانا .. اسمع يا ابنى . انا بنتى مش لعبة فى اديك
وياحبيبى اللى معهوش مايلزموش
نيرفانا مازالت مزهولة تريد ان تغير عقارب الساعة
وترجع بالزمن .. ترجع لغاية محطة كوبرى القبة
وتقول لمعتز ..ليه كدة يا معتز .. انا بس كنت عملتلك اى
ولا هى دى غلطتى علشان حبيتك.

************

المشهد الثالث..

######### علــ القهوة

معتز يجلس هو ومصطفى على القهوة

معتز يخرج سيجارة من العلبة LM بتاعت مصطفى

ويولع بالولاعة السخان

مصطفى .. يا ابنى حرام عليك دى تاسع سيجارة بتشربها

وانت اصلا مبتشربش سجاير .. وكمان دى

خامس كباية شاى ..

معتز .. سيبنى وحياة ابوك يامصطفى .. يحسن انا مخنوق

مصطفى ..أنت بتحسسنى ان انت بتشرب خمرة علشان تنسى

معتز.. انسى .. انا مش ممكن انسى الا لما اقتلها

مصطفى .. حرام عليك يا ابنى تقتلها اى بس .. دى البت بنت حلال وبتحبك

معتز.. بنت اى اللى اقتلها .. انا اقصد امها الحيزبون المملة .. نفسى افش غلى فيها

مصطفى .. حيزبون .. ومملة .. وعايز تفش غلك ..انا عندى اللى يحققلك حلمك

مصطفى يخرج التليفون من جيبه وأصابعه تلامس زراير التليفون

معتز .. هو أنت..هـتكلم مين

مصطفى .. تسمع عن اللهو الخفى ..ده بقى اجمد من اللهو الخفى

معتز..ده مجرم ده ولا اى

مصطفى..ههــ ال مجرم ال __ ده بقه ياعم وخدها هيواية

مصطفى .. الو .. ازيك ياباشا .. ليك عندى حتة من اللى قلبك يحبها

..حيزبون ومملة .. ايوة مملة ..طب اكتب العنوان عندك

*******

المشهد الرابع

#######نهاية طاغية

ام نيرفانا قاعدة فى الاوضة بتاعتها

والواد كيمو مشغل اغنية سيجارة بنى بصوت عالى قوى

ام نيرفانا تنظر الى الغوايش اللى لبساها وتقول

ام نيرفانا..ال صينى ال ..ده عبيط ده ولا شكله كدة

.. الحق مش عليه الحق على الهبلة بنتى

.. ال بتحبه ال ...

ام نيرفانا ..بصوت عالى .. ياض ياكيمو وطى الزفت ده

ام نيرفانا.. شربت سيجارة بنى لللا للللااا .. ياعم ولع يا سيدى ولع

وفجأة ام نيرفانا تحس ان حد واقف وراها . تبص تلاقى واد عجل

لابس اصفر فى اصفر وعامل جناحات سودة ..يمسك النضارة وينزلها

على عينه ويقولها .

الواد العجل ..دانا اللى هولع فيكى

طاخ..طرااااااااااااااااااااااااااااخ....بـــ..ـومممم

ام نيرفانا .. اه ........اه..............ه

طــ...........ــ.......ــ..ــراااااااااخ

**********مولدى تتحدى المملل**********

************The End*************

stop Drugs.change your Life

stop Drugs.change your Life

2 قصة
(1) .. دعونى انسان
سيد .. مد يا طيفا
طيفا .. امشى عادى ماتبقاش غبى
سيد .. انت شايف كده
طيفا ..ايوة .. وادخل الشارع اللى جى يمين
سيد .. يفتح يده وينظر الى تلك البرشامة المغلفة ويقول
.. اى ده احنا اضحك علينا
طيفا .. فى اى ؟
سيد.. البرشامة معليهاش علامة الاكس دي مش تيمول
هما ولاد الريس بقوا يبيعوا تيمول مضروب ولا أي
طيفا .... يأخذها وينظر بدقة .. ثم ينظر الى سيد ويقوله
.. دى تيمول اصلى مش مضروب
سيد .. ينظر الى البرشامة مرة اخرى ويصمت
وكأنه اقتنع بكلام طيفا
سيد .. بقولك اى انا هفتحها وابلع نص وانت تبلع التانى
طيفا .. استنى مش دلوقتى
سيد .. نبلعها احسن علشان ميبقاش معانا حرز
طيفا .. لو خايف تشيلها هات انا اشيلها
سيد .. ليه ياعم هو احنا مش قدها ولا اى
سيد يشيل برشامة التيمول فى جيب البنطلون
سيد.. الواد حوده وتامر النهاردة جيبين حتة حشيش هيشربوها مع بعض

طيفا .. لو عاوز تشرب حشيش روح معاهم انا مش ناقصك بروح امك

سيد .. ياعم اهدى بس علينا ماتبقاش قافش كده

سيد ..اى ده ..ده الواد انور بيرن عليا .. اصلى كنت قايله اننا ريحين نجيب
حباية تيمول .. شكله كدة عاوزنى اجيبله .
طيفا .. كنسل انا مش هرجع تانى
سيد .. الواد ده صعبان عليا .. أصله اضرب بالتيمول
.. اليوم اللى مابيشربش فيه تيمول بيخده كله نوم فى البيت
طيفا ..يستاهل
سيد .. بتعجب ليه!
طيفا .. علشان بياخد تيمول
طيفا .. سيد انت بتاخد تيمول ليه ياسيد
سيد .. علشان امم ايوة علشان بيدينى بور
وبيخلينى عامل دماغ تمام .. بيخللى الواحد ميفكرش
تحس بسعادة يعنى و..و..
طيفا .. سعادة .. ومتفكرش
سيد .. انت مالك النهاردة قافش كده ليه
طيفا.. لا ابدا مفيش حاجة
طيفا .. عارف يا سيد .. انا امباح راجع البيت الساعة كام
راجع الساعة 4 الفجر
اصل كنت مع خالتى عند الدكتور
كانت بتكشف على ابنها الصغير .. عند دكتور مخ واعصاب
اصل الدكاترة دول بيعملوا عمليات الصبح ويكشفوا على الناس بالليل
عارف ياسيد انا امبارح اول مرة جسمى يقشعر اوى .. لما شفت بنت
قدنا كدة يا سيد كانت مع ابوها وامها .. اول لما سمعت ضحكتها ياسيد
جسمى اشعر .. ضحكة معناها انها فرحانة الفرح كله دى مش ضحكة
دى ضحكة مع ابتسامة يا سيد فاهم ياض ..شكلك حمار ومش فاهم حاجة
البت كانت جميلة اوى .. انا مقدرتش ابص فى وشها وهى بتضحك
سيد .. ازاى مابصتش فى وشها .. وازاى عرفت انها جميلة اوى
طيفا .. سمعت الناس بتقول عليها جميلة اوى .. بس كان ناقصها حاجة .. العقل .. اللى انت عاوز توقفه شوية
عارف ياض ابوها كان عمال يحكى ويقول ان هو بقاله سنتين عند الدكتور ده
وان بنته اتقدمت عن الاول بكتير وكان فرحان قوي
ولما واحد سأله اتقدمت ازاى يعنى
ابوها قال .. انها بقت تغير هدومها لوحدها .. وتدخل الحمام لوحدها
يا يا سيد . علشان عقلها بس اتحرك خطوة ابوها بقه فرحان
وعنده امل وبيقول انها اتقدمت
واحنا يا سيد عاوزين ناخد تيمول علشان نريح دماغنا شوية
طيفا .. اى ده يا! سيد عربية كلاب (ميكروباص .. بيبقى تبع الحكومة )
اتنين شحوطا بيتقدموا من سيد وطيفا .. جى منين ؟ جى منين
طيفا وسيد وقفوا ..
بطايئكوا
طيفا وسيد طلعوا البطايق
واحد من الاتنين الشحوطة بس فى البطايق قوام
لكنه شد المحفظة من طيفا فضل يقلب فيها وجواها
خد بتاعت سيد
سيد ..على فكرة المحفظة فيها حجات خاصة
حجات اى
سيد ..فيها فلوس وصور وأوراق
يبص بصه سريعة فيها ويدهالوا تانى
..جاين منين
سيد ..كنا بنتمشى شوية
بتتمشوا اى!
سيد .. ايوه بنتمشى .. الانسان المفروض يمشى كل يوم نص ساعة
طيفا نفسه ينطق ويقول لسيد .. اى الثقافة اللى نزلت عليك دى مرة وحدة ياروح امك دلوقتى يطلع البرشامة من جيبك ونروح فى ستين داهية
واحد من الاتنين الشحوطا .. بدا فى تفتيش جيوب طيفا و لم يجد معه شىء
ثم بدا بتفتيش جيوب سيد
وهنا طيفا قلبه وقع فى رجله وبدا يقول يارب انا بعد اللى شوفته امبارح
انا كنت ناوى ماخودش التيمول ده تانى ..بس .سامحنى يا رب. يارب استر
دخل ايده فى جيوب سيد وخرجها من غير مايطلع حاجة
بعدين بص لسيد وقال شكلكوا نضاف .. ومشيوا الاتنين الشحوطا وكأن
شيئاً لم يكن
طيفا .. معقول اللى حصل ده ..ياا الحمد لله
مخدوش بالهم من البرشامة
سيد ..برشامة اى .. البرشامة اصلا انا رميتها
طيفا ..لحقت ترميها ياض
سيد ..انا اصلا رميتها من بدرى .. اصلى كلامك عن البنت
بتاعت المخ والاعصاب فكرنى بموضوع كنت بفكر فيه
طيفا.. موضوع . موضوع اى
سيد .. انا لما باخد التيمول بحس انى حيوان .. ايوة يا طيفا بحس انى حيوان .. عنده باور لكن مخه واقف
طيفا ..حيوان ..
سيد .. ايوة يا طيفا بحس انى حيوان انا نفسى اعيش انسان ياطيفا ولو مرة وحدة .

----------

(2) .فى الليل .و النهار.
فى الليل ..
ينادى الله هل من عبد تائب اتوب عليه .
.
فى الليل ..
تامر ينظر الى حوده وهو بيلف الجيوان
ينظر اليه وكأن على رأسه الطير
تامر يقول فى سره .. انا بعرف اعمل خابور 100/100
بس ناقصنى انى اعرف اعمل جيوان ..
.
فى الليل ..
ينادى الله هل من عبد تائب اتوب عليه .
.
فى الليل ..
حوده يمد يده التى تحمل الجيوان الى تامر ويقوله .. خش يا معلم
تامر .. يولع الجيوان بالولاعة السخان ويخرج من فمه السحاب .
.
فى الليل ..
ينادى الله هل من عبد تائب اتوب عليه .
.
فى الليل ..
تامر .. بعد ان انتهى من تثبيت الخابور فى السيجارة
وقطع حتة من السيجارة علشان تبقى على مقاس فتحة الكوباية
تامر .. يمد يده التى تحمل الخابور الى حوده دون ان يتكلم
ويكتفى بالنظر الى عين محمود
.
فى الليل ..
ينادى الله هل من عبد تائب اتوب عليه .
.
فى الليل ..
حوده قد فهم ما يريد ان يقول تامر من هذه النظرة ..
ويمسك بإيده الولاعة السخان ويولع الخابور
تامر يضع الخابور داخل الكوباية ويغطى الكوباية بكرتونة مدورة .
.
فى الليل ..
ينادى الله هل من عبد تائب اتوب عليه .
.
فى الليل ..
تامر .. بس الحشيشة دى 100/100
حودة .. يا بنى دى اسمها بسكوتة..صنف تلاتات
تامر.. بس ملهاش حل .
حودة.. انا طاير هههـ .. انت روحت ولا لسه .
فى الليل ..
ينادى الله هل من عبد تائب اتوب عليه .
.
فى الليل ..
تامر .. بدأ مفعول الحشيش معاه .. بدأ يفكر كتير
حتى انه لا يستطيع ان يوقف تفكيره .
تامر .. تعرف يا حوده انا بكره الحشيش علشان بيخلينى افكر
حوده .. يا معلم احسن حاجة انك تشرب حشيش ومتفكرش
تامر ..ليه ياض
حوده.. علشان سعات بتفكر فى الله يعنى استغفر الله العظيم ..يعنى ..
تامر ..عارف انت عاوز تقول اى .. مبتقدرش تحط حدود لتفكيرك .
.
فى الليل ..

ينادى الله هل من عبد تائب اتوب عليه .
.
فى الليل ..
تامر .. يقول فى سره استغفر الله العظيم والله انا ما أقصد يا رب افكر
فى كدة .. بس مش قادر أوقف تفكيرى .. يارب سامحنى
تامر قد بدأ يخرج عن حدود التفكير فى الله ..
تامر يعترف لنفسه ان الحشيش كافر .. لا يستطيع ان يوقف تفكيره
تامر مازال يقول فى سره .. يارب سامحنى مش هفكر فى كدة تانى
..ولكنه كان يفكر .. ولا يستطيع التوقف .. لانه اسطل ومش قادر يسيطر على عقله.
فى الليل ..
ينادى الله هل من عبد تائب اتوب عليه .
.
فى الليل ..
تامر .. يارب سامحنى .. انا مش ناوى اشرب حشيش تانى .
...
فى النهار ...
بعد ما تامر فاق ..مازال يتذكر هذه الكلمات
..يارب سامحنى انا مش ناوى اشرب حشيش تانى .
.
فى النهار ..
الله يبسط يده بالنهار ليتوب مسيء الليل .

---------

كشكول 100 ورقة

عزيزتى الورقة ..عزيزى القلم .. أعزائى المستمعين
هذه اللحظة يجب ان تذكر فى التاريخ ...لأنها اللحظة اللتى سوف أقرب فيها
أصابعى من الكيبورد ..علشان اترجم ما بداخلى الى كـلـمـ ـ ـات
..كلمات ليست كالكلمات ..وفى هذه اللحظة قررت ان اكتب نعم أعترف بهذا الذنب
..وفى هذه اللحظة قررت ان لا أشيل هموم الوطن....الـ ـ ـوطـ ـ ـن..
..لأننا مش عارفين نعمل وحدة وطنية ...ومش عارفين نعيش كدول متفرقة ..
يعنى لا طولنا ابيض ولا أسود ..وقررت ان لا أتكلم عن الـ ـسـ ـلام ....
علشان حمامة السلام ..جالها الفلونزا الطيور
..تمنياتنا لها بالشفاء العاجل ..
واهلا بيكوا فى مدونة كشكول 100 ورقة ..ده كشكول على طول جمبى
كل لما اقرا حاجة تستاهل اكتبها فيه
..واهلا بيكوا مرة تانية ..وختاما لكم منى الف سلاماً